Roma 13

O le Amio e Tatau ‘ona fai i Ali‘i ma Tagata uma Lava

1‘Ia usiusita‘i tagata uma i faipule silisili; auā e leai se pule pe ā lē mai le Atua; o pule uma lava o lo‘o fai nei, ‘ua fa‘atūina e le Atua.#Tito 3.1; Ioane 19.11; Fa‘ata 8.15 2O lenei, o lē na te tete‘e i le pule, ‘ua tete‘e e ia i le sauniga a le Atua; o ē tete‘e fo‘i e sala lava i latou. 3Auā o ali‘i, e lē se fa‘amata‘u i latou e amio lelei, na o ē amio leaga. O lo‘u mana‘o ‘ea ‘ia e lē fefe i le pule? ‘Ia e amio lelei, ‘ona ta‘uleleia mai lea o oe e ia.#1 Pete 2.13-14; 3.13 4Auā o le ‘au‘auna ia a le Atua ‘iā te oe, ‘ia lelei ai; ‘ae ‘āfai ‘e te amio leaga, ‘ia e fefe ai, auā e lē fai fua o ia lana pelu; auā o le ‘au‘auna o ia a le Atua, o lē na te taui atu i le to‘asā i lē amio leaga.#Sala 82.6; Roma 12.19 5O lenei, e tatau ‘ona usiusita‘i, e lē gata ‘ona o le to‘asā, ‘ae peita‘i ‘ona o le loto fuatia ifo.

6O le mea fo‘i lea tou te avatu ai taulaga, auā o ‘au‘auna i latou a le Atua, o lo‘o finafinau i lenei lava mea. 7O lenei, ‘ia avatu i tagata uma lava a latou mea; o le lafoga i ē ‘ua tatau i ai le lafoga; o le tiute i ē ‘ua tatau i ai le tiute; o le mata‘u i ē ‘ua tatau i ai le mata‘u; o le fa‘aaloalo i ē ‘ua tatau i ai le fa‘aaloalo.

O le Ola Fētausia‘i

8‘Aua ne‘i ‘iā te ‘outou se mea e tasi a se tasi tagata; ‘ae tau lava o le fealofani; auā ‘ai sē alofa atu i se tasi tagata, ‘ua ‘ato‘atoa ‘ona faia e ia o le tulafono.#Kala 5.14; 1 Timo 1.5 9Auā o ‘upu ia, “‘Aua le mulilua, ‘Aua le fasioti tagata, ‘Aua le gaoi, ‘Aua le molimau pepelo, ‘Aua le tu‘inanau;” ‘āfai fo‘i ‘ua toe se isi poloa‘iga, o lo‘o ‘ua aofia lava i lenei ‘upu, “‘Ia e alofa atu i lē lua te tuā‘oi, ‘ia pei o oe lava ‘iā te oe.”#Eso 20.13-17; Levi 19.18; Teu 5.17 10E lē agaleaga atu le alofa i lē la te tuā‘oi; o lenei, o le alofa o le ‘ato‘atoa lea o le tulafono.#1 Kori 13.4; Mata 22.40

11‘Ia fa‘apea fo‘i, ‘ina ‘ua tatou iloa ona po, ‘ua o‘o i le itū po ē ala ai ē na momoe; auā ‘ua latalata nei ‘iā te i tatou le ola, sa mamao ‘ina o tatou ulua‘i fa‘atuatua.#Efe 5.14; 1 Tesa 5.6-7 12‘Ua leva le po, ‘ua lata mai le ao; o lea ‘ia tatou fa‘ate‘a ‘ese ai galuega o le pogisā, a ‘ia tatou ‘o‘ofu i ‘ofu tau o le malamalama.#1 Ioane 2.8; Efe 5.18; 2 Timo 1.10 13‘Ia tatou sāvavali ma le matagofie e tusa i le ao; ‘aua le poula ma le ‘onā, ‘aua le faita‘aga ma le mataitu, ‘aua le femisa‘i ma le matau‘a.#Luka 21.34; Efe 5.18 14A ‘ia ‘outou ‘o‘ofu i le Ali‘i o Iesu Keriso; ‘aua fo‘i le sauniuni mo le tino, e o‘o ai ona tu‘inanau.#Kala 3.27

Currently Selected:

Roma 13: RSCB

Highlight

Copy