Roma 12

O le ‘Ai‘oi atu a Paulo i le Ekalesia ‘ia Lelei a Latou Amio

1O lenei, le ‘au uso e, ‘ou te ‘ai‘oi atu ‘iā te ‘outou, ‘ona o le alofa mutimutivale o le Atua, ia ‘outou tu‘uina atu o ‘outou tino i le Atua, o le taulaga ola, ma le pa‘ia, ma le mālie, o le mea lea e tatau ai ‘ona ‘outou faia. #Roma 6.11, 13; 1 Pete 2.5; Ioane 4.24 2‘Aua fo‘i tou te amio fa‘atasi ma lenei lalolagi, ‘ae peita‘i ‘ia liliuina i le toe fuata‘iina o ‘outou loto ‘ina ‘ia ‘outou su‘esu‘e pe se a le finagalo o le Atua, o mea ‘ua lelei, ma le mālie, ma le ‘ato‘atoa. #Efe 4.23; 5.10, 17; Roma 1.28; Kala 1.4

3Auā o le alofa tunoa ‘ua tu‘uina mai ai ‘iā te a‘u, ‘ou te fai atu ai ‘iā te ‘outou uma, ‘aua le fa‘asili le manatu o se tasi i le mea ‘ua tatau ‘ona manatu ai, a ‘ia mamā le manatu, ‘ia tusa ma le tofiga o le fa‘atuatua ‘ua ta‘itasi ma tofu ai mai le Atua. #1 Kori 12.11; Efe 4.7 4Auā fa‘apei o itū tino e tele i le tino e tasi, ‘ae lē tasi se faiva i itū tino uma; #1 Kori 12.12 5e fa‘apea i tatou nei le to‘atele, ‘ua tino e tasi ‘iā Keriso, ‘ina ‘ua fēfa‘afeagaia‘i itū tino. #1 Kori 12.27; Efe 4.25 6O lo‘o ‘ese‘ese fo‘i a tatou mea e tufaina mai i le alofa tunoa ‘ua foa‘iina mai ‘iā te i tatou; po o le perofeta, ‘ia fa‘atatauina ma le tofi o le fa‘atuatua; #1 Kori 12.4-11 7po o le tiakono, ‘ia faia le faiva o le tiakono; po o le a‘oa‘o, ‘ia a‘oa‘o, atu ia; #1 Pete 4.10-11 8po o le apoapoa‘i, ‘ia apoapoa‘i o ia; o lē foa‘i mea ‘ia faia ma le matamau; o lē pule, ‘ia faia ma le filigā; o lē fai mea alofa, ‘ia faia ma le loto fiafia. #Mata 6.3; 2 Kori 8.2; 9.7

9‘Aua ne‘i fa‘atagā alofa; ‘ia ‘ino‘ino i le leaga, ‘ia pipi‘i i le lelei. #1 Pete 1.22; 1 Timo 1.5; Amo 5.15 10‘Ia fefa‘apelepelea‘i i le fealofani o uso; ‘ia tausolomua ona āva o le tasi i le tasi. #2 Pete 1.7; Fili 2.3 11‘Aua le fa‘avaivai i le filigā, ‘ia malosi le loto, ‘ia ‘au‘auna i le Ali‘i. 12‘Ia ‘oli‘oli i le fa‘amoemoe ‘ia ‘onosa‘i i le puapuagā, ‘ia finafinau i le tatalo. #1 Tesa 5.17 13‘Ia tufatufa atu ni a ‘outou mea i le mativa o le ‘au pa‘ia, ‘ia tausisi i le alofa i tagata ‘ese. #Epe 13.2

14‘Ia fa‘amanuia atu i ē fa‘asauā mai ‘iā te ‘outou, ‘ia fa‘amanuia lava, ‘ae ‘aua le fetu‘u. #Mata 5.44; Luka 6.28 15‘Ia ‘outou ‘oli‘oli fa‘atasi ma ē ‘ua ‘oli‘oli, ‘ia ‘outou tagi fo‘i fa‘atasi ma ē ‘ua fētāgisi. #Sala 35.12 16‘Ia gatasitasi o ‘outou manatu; ‘aua le manatu i mea silisili, a ‘ia feoa‘i ma ē ‘ua fa‘amaulalo; ‘aua le fa‘afiapopoto. #Fa‘ata 3.7; Roma 15.5; 11.20

17‘Aua le taui atu le leaga i le leaga i se tasi; ‘ia sauniuni mea e tusa i luma o tagata uma lava. #Isai 5.21; 1 Tesa 5.15 18‘Āfai e mafaia ‘iā te ‘outou, ‘ia ‘outou nofo lelei ma tagata uma lava. #Mare 9.50; Epe 12.14 19Le ‘au pele e, ‘aua le taui atu ma sui, a ‘ia ‘outou tu‘u atu i le to‘asā, auā ‘ua tusia, ‘Ua fa‘apea mai i le Ali‘i, “O ‘iā te a‘u le taui ma sui, ‘ou te taui atu.” #Teu 32.35; Levi 19.18; Mata 5.39; 2 Tesa 1.6-7; Roma 13.4; Epe 10.30 20“O lenei, ā matelaina lē ‘ua ita mai ‘iā te oe, fafaga ‘iā te ia, a fia inu o ia, avatu ‘iā te ia e inu ai; auā o le amio fa‘apea e fa‘afaupu‘e ai malala ola i luga i lona ulu.” #Fa‘ata 25.21-22; Mata 5.44 21‘Aua le fa‘ato‘ilaloina oe i le leaga, a ‘ia e fa‘ato‘ilaloina le leaga i le lelei.

Currently Selected:

Roma 12: RSCB

Highlight

Copy