Salāmo 78
78
O le Tala o le To‘asā o le Atua i ē lē Fa‘alogo
O le salāmo a Asafo e a‘oa‘o ai
1Lo‘u nu‘u e,#Sala 49.1; Isai 51.4
‘ia ‘outou fa‘alogologo mai i la‘u tulafono;
‘ia ua‘i mai o ‘outou taliga i ‘upu a lo‘u gutu.
2‘Ou te tautala atu lava i le fa‘ata‘oto;#Mata 13.35; Sala 49.3
‘ou te ta‘u atu mea lilo talu anamuā,
3o mea na tatou fa‘alogologo i ai, ma tatou iloa;
na talaina mai fo‘i ‘iā te i tatou e o tatou tamā.
4Tatou te lē natia ia mea ‘iā latou fānau,#Eso 12.26-27; Teu 4.9; Iosu 4.6-7
‘ae ta‘uta‘u atu i tupulaga amulī o vi‘iga o le ALI‘I,
ma lona malosi ma ona vāvega na na faia.
5‘Ua ia fa‘atūina le tulafono ‘iā Iakopo,
‘ua ia tu‘uina fo‘i le poloa‘iga ‘iā Isaraelu,
o mea na ia poloa‘i atu ai i o tatou tamā,
‘ina ‘ia latou fa‘ailoa ai ‘iā latou fānau;
6‘ina ‘ia iloa ai e le tupulaga amulī,
o fānau lava e fānau mai;
e tutupu mai i latou, ma ta‘u atu ai ‘iā latou fānau.
7‘Ina ‘ia fai le Atua mo latou fa‘atuatuaga;
ma ‘ia lē galo galuega a le Atua;
a ‘ia latou tausi i ana poloa‘iga;
8‘ina ‘ia lē pei o latou tamā i latou,#Eso 32.9; 2 Tu 17.14; Iere 5.23
o le tupulaga vaogatā ma le fouvale:
o le tupulaga na lē sauni o latou loto;
e le‘i fa‘amaoni fo‘i o latou loto i le Atua.
9O le fānauga a Efaraima ‘ua i ai ‘au‘upega,
o ē na fanafana i u;
na liutua i latou i le aso na tau ai le tau‘a.
10Na latou le tausia le feagaiga a le Atua,#2 Tu 17.15
na lē mafafai fo‘i ‘ona latou sāvavali i lana tulafono.
11Na latou fa‘agalogaloina fo‘i ana galuega,
ma ona vāvega na ia fa‘aali ‘iā te i latou.
12Na ia faia vāvega i luma o latou tamā#Eso 7.8—12.32; Nume 13.22; Isai 19.11
i le nu‘u o Aikupito o le lau‘ele‘ele o Soana.
13Na ia vavaeina le sami ma fa‘aui ane ai i latou;#Eso 14.21-22
na ia fa‘atūina fo‘i le suāsami e pei o se mea maupu‘epu‘e.
14Na ia ta‘ita‘i ‘iā te i latou ‘ina o ao i le ao#Eso 13.21-22
a o le malamalama o le afi na ia ta‘ita‘i ai ‘iā te i latou i le po ‘atoa.
15Na ia vaevaea papa i le vao;#Eso 17.1-7; Nume 20.2-13
na ia fa‘ainu ‘iā i latou e peiseaī sa i ai vai loloto.
16Na ia fa‘aoso fo‘i o vaitafe nai le papa,
na ia fa‘atafe ifo le vai e pei o vaitafe.
17A ‘ua fa‘aopoopo ‘ona toe agasala atu i latou ‘iā te ia,
i lo latou fa‘a‘ono‘ono i lē Silisili‘ese i le nu‘u naumati.
18Na latou tofotofo i le Atua i o latou loto#Eso 1.2-15; Nume 11.4-23, 31-35
i lo latou ole atu i mea e ‘ai i lo latou tu‘inanau.
19Na ‘upuia le Atua e i latou; ‘ua fa‘apea a latou,
“‘Ua mafaia ‘ea e le Atua ‘ona laulau mai mea e ‘ai i le vao?
20Fa‘auta, na ia taia le papa, ‘ua tafe mai ai le vai;#Sala 78.15; Nume 11.1
‘ona oso ai lea i tua o vaitafe;
e mafaia fo‘i ‘ea ‘ona foa‘i mai ni mea e a‘i?
e mafaia ‘ea ‘ona ‘aumai o ‘a‘ano o manu mā lona nu‘u?”
21O le mea lea na fa‘afofoga mai ai le ALI‘I,
‘ona to‘asā mai ai lea o ia;
na tutu ai le afi ‘iā Iakopo,
na o‘o a‘e fo‘i le to‘atama‘i ‘iā Isaraelu;
22auā ‘ua latou lē fa‘atuatua i le Atua,
‘ua latou lē fa‘alagolago i le olataga mai ‘iā te ia.
23Na ia poloa‘i i ao mai luga;
na ia tō mai fo‘i o puipui o le lagi,
24na ia fa‘atotō fa‘aua i luga ‘iā te i latou le manai e ‘a‘ai ai;#Ioane 6.31; Eso 16.4; Nee 9.15, 20; 1 Kori 10.3
na ia avatua fo‘i ‘iā te i latou o mea e ‘ai mai le lagi.
25Na ‘a‘ai tagata i le mea e ‘ai ‘ae malolosi;
na ia tu‘uina atu ‘iā te i latou le mea e ‘ai latou te mā‘o‘ona ai.
26Na ia fa‘aoso mai i le lagi le matagi mai sasa‘e;
o lona malosi fo‘i na ia fa‘aagi mai ai le matagi mai saute.
27Na ia fa‘atotō fa‘aua fo‘i i luga ‘iā te i latou o manu e pei o le efuefu;
o manu felelei fo‘i e pei o le oneone i le sami;
28na ia fa‘atotōina ai i totonu i lo latou toagalauapi;
e fa‘ata‘ali‘oli‘o ai i mea sa latou nonofo ai.
29Na latou ‘a‘ai, ‘ona matuā mā‘o‘ona ai lea o i latou;
auā na ia avatu ‘iā te i latou o mea na latou tu‘inanau i ai.
30Na lē te‘a i latou i le mea na latou tu‘inanau i ai;#Nume 11.33-34
a o i o latou gutu a latou mea e ‘ai,
31‘ua o‘o ai ‘iā te i latou le to‘asā o le Atua,
‘ua fasiotia fo‘i o latou tagata puputa,
ma na lafo i lalo taulele‘a o Isaraelu.
32E ui lava i ia mea uma, a ‘ua latou agasala pea;#Nume 14.1-4, 11
e ui lava i ona vāvega, ‘ae latou te le‘i fa‘atuatua lava.
33‘Ona fa‘aumatia fa‘alēaogā ai lea e ia o latou olaga,
na fa‘aumatia fo‘i o latou tausaga i le atuatuvale.
34Na latou sā‘ili‘ili atu ‘iā te ia ‘ina o fasiotia i latou e ia;#Sala 63.1; Hose 5.15
‘ona latou fo‘i ai lea i le sā‘ili‘ili i latou i le Atua.
35‘Ona latou manatu ifo ai lea o le Atua o lo latou papa ia;
o le Atua silisili o ia na te fa‘aolaina i latou.
36A ‘ua latou pepelo ‘iā te ia i o latou gutu,#Isai 29.13; 57.11; Eseki 33.31
ma ‘ua latou fa‘a‘ole‘ole ‘iā te ia i o latou laulaufaiva.
37E le‘i tūtūmau fo‘i o latou loto ‘iā te ia,
e le‘i fa‘amaoni fo‘i latou i lana feagaiga.
38A o ia, ‘ua alofa mutimutivale,#Eso 34.6; Nume 14.20; Nee 9.17; Sala 86.15
‘ua ia fa‘amāgaloina a latou amio leaga;
na ia lē fa‘aumatia ai i latou;
‘ua liliu ‘ese fa‘alasi e ia lona to‘asā,
na ia lē fa‘atupuina fo‘i lona to‘atama‘i ‘ato‘atoa;
39auā na ia manatua, ‘ua na o tagata lava i latou;#Kene 6.3; Iopu 7.7; Iako 4.4
o le matagi o lo‘o mavae atu, e lē toe fo‘i mai lava.
40Na fa‘alasi na‘uā ‘ona latou fa‘a‘ono‘ono ‘iā te ia i le vao;
na latou fa‘alili lava ‘iā te ia i le vao.
41Na latou toe tofotofo lava i le Atua;
ma latou fa‘a‘ono‘ono i le Pa‘ia o Isaraelu.
42Latou te le‘i manatua lona ‘a‘ao,
o le aso na ia fa‘aolaina ai i latou a‘i le puapuagā;
43o ona fa‘ailoga na na faia i Aikupito,
‘atoa ma ona vāvega i le lau‘ele‘ele o Soana.
44Na ia liua fo‘i o latou vaitafe ma toto,#Eso 7.17-21
‘atoa ma o latou vaitai, ‘ina ‘ia latou lē inu ai.
45Na ia ‘a‘auina atu ‘iā te i latou o garova, na ‘aina ai i latou;#Eso 8.1-6, 20-24
o rane fo‘i na fa‘aumatia ai i latou.
46Na ia avatua fo‘i o fua o lo latou fanua i le sē kasili,#Eso 10.12-15
na avatua fo‘i a latou galuega i le sē akerise.
47Na ia fa‘amateina o a latou vine i le uato‘a,#Eso 9.22-25
na ia fa‘amateina fo‘i a latou sukamoru i le uato‘a tetele.
48Na ia tu‘uina atu fo‘i o a latou manu i le uato‘a
ma na tu‘uina a latou lafu mamoe i le uila.
49Na ia fa‘ao‘o ‘iā te i latou o lona to‘asā mamafa,#Eso 12.13, 23; 2 Samu 24.16
o le ma‘ema‘eā, le to‘atama‘i, ma le puapuagā,
i lona ‘a‘auina atu o ‘au‘auna e i ai mala.
50‘Ua na saunia le ala o lona to‘asā;
e le‘i fa‘asaoina e ia o i latou i le oti,
a ‘ua tu‘uina atu o latou ola i le fa‘ama‘i.
51Na ia fasia fo‘i ulumatua uma i Aikupito;#Eso 12.29; Sala 105.23, 36
o le amataga o lo latou malosi na i fale ‘ie o Hamo.
52Na ia ‘aumaia fo‘i lona nu‘u e pei o mamoe,#Eso 13.17-22
ma na ta‘ita‘iina i latou i le vao e pei o se lafu.
53Na ia ta‘ita‘iina i latou ‘ua saogalemū,#Eso 14.26-28
o lea na lē fefefe ai i latou;
a o ē ‘ua ita i ai, ‘ua lofia i latou i le sami.
54Na ia fa‘ao‘o ‘iā te i latou i lona lau‘ele‘ele pa‘ia,#Eso 15.17; Iosu 3.14-17
o lenei lava mauga na ia maua i lona ‘a‘ao taumatau.
55Na ia tulia fo‘i nu‘u ‘ese i o latou luma,#Iosu 11.16-23
‘ona vaevaeina atu lea e ia ‘iā te i latou le tofi ‘ua fuatia,
ma na fa‘anonofo o itū‘āiga o Isaraelu i o latou fale ‘ie.
56A ‘ua latou tofotofo ma fa‘a‘ono‘ono i le Atua silisili ‘ese;#Fa‘ama 2.11-15
e le‘i tausi fo‘i e i latou ana tulafono.
57‘Ua toe liliu i latou ma fa‘a‘ole‘ole e pei o latou tamā;
‘ua liua i latou e pei o le ‘aufana ‘ua pepelo.
58Na latou fa‘alili fo‘i ‘iā te ia ‘iā latou mea maualuluga;
na latou fa‘atupuina fo‘i lona fuā ‘iā latou tupua ‘ua ta.
59‘Ua fa‘afofoga le Atua, ‘ona to‘asā tele ai lea o ia,
‘ona matuā ‘ino‘ino ai lea o ia ‘iā Isaraelu.
60Na ia lafoa‘i ai le malumalu i Sailo,#Iosu 18.1; Iere 7.12-14; 26.6
o le fale fetāfa‘i sa mau ai o ia ma tagata.
61Na ia tu‘uina atu fo‘i lona malosi ‘ia tāfea,#1 Samu 4.4-22
na ia tu‘uina atu fo‘i lona matagofie i le lima o lē ‘ua ita mai.
62Na ia tu‘uina fo‘i o lona nu‘u i le pelu,#1 Samu 4.10
ma ‘ua to‘asā tele ia i lona lava tofi.
63O latou taulele‘a ‘ua fa‘aumatia i le afi;
o latou taupou fo‘i ‘ua lē vi‘ia i latou.
64O latou ositaulaga, ‘ua oti i latou i le pelu;#1 Samu 4.11; Iopu 27.15
e le‘i taufaiauē fo‘i a latou avā.
65‘Ona maleifua ai lea o le ALI‘I e peiseaī na tofā,
e pei o se tagata malosi ‘ua ‘alaga ‘ona o le uaina.
66‘Ua na taia ē ‘ua ita ‘iā te ia i o latou tua;
‘ua na faia lea mo latou luma e fa‘avavau.
67Na ia tete‘e atu fo‘i i le fale ‘ie o Iosefa,
na ia lē filifilia fo‘i le itū‘āiga o Efaraima.
68A ‘ua ia filifilia le itū‘āiga o Iuta,
o le mauga o Siona na ia finagalo i ai.
69‘Ua na faia fo‘i o lona malumalu e pei o mea maualuluga,#1 Tu 6.1-14
e pei o le lalolagi na ia fa‘avaeina e fa‘avavau lava.
70‘Ua na filifilia fo‘i Tavita lana ‘au‘auna,#1 Samu 16.11-12; 2 Samu 7.8; 1 No 17.7
ma na ‘aumaia o ia nai lotoā mamoe;
71na ia ‘aumaia o ia sa mulimuli i mamoe fānanau,
‘ina ‘ia fafaga lava o ia ‘iā Iakopo lona nu‘u,
o Isaraelu fo‘i lona tofi.
72Na fafaga fo‘i e ia ‘iā te i latou e tusa ma le fa‘amaoni o lona loto;#1 Tu 9.4; Sala 101.2
na ia ta‘ita‘i ‘iā te i latou i le poto o ona lima.
Currently Selected:
Salāmo 78: RSCB
Highlight
Share
Compare
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
