Salāmo 40
40
O le Vi‘iga i le ALI‘I ‘ina ‘ua ia Fa‘aolaina ona Tagata
Ma le usu pese. O le salāmo a Tavita
1Na ‘ou matuā fa‘atalitali lava i le ALI‘I;
‘ona fa‘asaga mai ai lea o ia ‘iā te a‘u,
‘ua fa‘afofoga mai fo‘i o ia i la‘u ‘alaga.
2Na ia ‘aveina a‘e a‘u a‘i le lua e malaia ai,#Sala 27.5; 69.2, 14
ma le mea matuā palapalā;
na fa‘atūina fo‘i o‘u vae i luga o le papa,
‘ua fa‘amautūina ai ‘ou savali.
3‘Ua tu‘uina mai e ia le pese fou i lo‘u gutu,
o le vi‘iga i lo tatou Atua;
e iloa ai e le to‘atele,
e matata‘u fo‘i i latou ma latou fa‘atuatua i le ALI‘I.
4‘Amu‘ia le tagata o lē fa‘atuatua i le ALI‘I,
‘ae lē fa‘asaga i ē fa‘amaualuluga,
ma ē ‘ua liliu ane i mea pepelo.
5Le ALI‘I e, lo‘u Atua, e tele lava mea ‘ua e faia,#Iopu 5.9; Sala 139.17-18
o ou vāvega ma ou manatu ‘iā te i matou,
e lē mafai ‘ona laulauina atu ai ‘iā te oe;
‘ou te fia fa‘ailoa ma tautala i ai,
‘ae lē mafaitaulia lava.
6‘E te lē finagalo i le taulaga ma le taulaga i mea e ‘ai;#1 Samu 15.22; Sala 51.16; Hose 6.6; Mata 9.13; Epe 10.5-7
‘ua ‘elia e oe o‘u taliga.
O le taulaga mū ma le taulaga mo le agasala
‘e te le‘i fetalai mai ai.
7‘Ona ‘ou fai ane ai lea,
“Fa‘auta, ‘ou te alu atu;
‘ua tusia a‘u i le tusi ta‘ai.
8Lo‘u Atua e,#Iopu 23.12; Sala 119.35; Iere 15.16; Ioane 4.34; Roma 7.22
‘ou te fiafia e fai lou finagalo;
o lo‘o i totonu lava ‘iā te a‘u lau tulafono.”
9‘Ua ‘ou tala‘i le amiotonu i le fa‘apotopotoga tele;
fa‘auta, ‘ou te le‘i tāofia lava o‘u laugutu,
le ALI‘I e, ‘ua e silafia lava.
10‘Ou te le‘i natia lava i lo‘u loto lau amiotonu;#Galu 20.20, 27; Roma 1.16-17
‘ua ‘ou ta‘uina atu lou fa‘amaoni ma lau fa‘aolataga;
‘ou te le‘i fa‘alilolilo lou alofa ma le mea moni,
mai ‘iā te oe i le fa‘apotopotoga tele.
11Le ALI‘I e,
‘aua ‘e te tāofi e oe lou alofa mutimutivale ‘iā te a‘u;
‘ia leoleoina pea lava a‘u e lou alofa ma lou fa‘amaoni.
Tatalo mo se Fesoasoani
(Sala 70)
12Auā ‘ua si‘osi‘omia a‘u i mea leaga e lē mafaitaulia;#Sala 38.4, 10; 116.3
‘ua maua mai a‘u e a‘u agasala,
o lea ‘ou te lē mafaia ai ‘ona va‘ai;
‘ua sili ia ‘ona tele i ‘ou lauulu;
‘ua matuā fa‘avaivai ai lo‘u loto.
13Le ALI‘I e,
‘ia e finagalo e lavea‘i mai ‘iā te au;
le ALI‘I e,
‘ia vave ‘ona e fesoasoani mai ‘iā te a‘u.
14‘Ia taufaimamā ma ia māsiasi fa‘atasi ē#Sala 6.10; 35.4
‘ua fia fasioti ‘iā te a‘u;
‘ia liutuaina ma fa‘amāina ē
‘ua manana‘o i se mea ‘ia leaga ai a‘u.
15‘Ia femēmēa‘i ‘ona o lo latou mā#Sala 35.21, 25
o ē fai mai ‘iā te a‘u, “Ue! ue!”
16‘Ia ‘oli‘oli ma fiafia ‘iā te oe o i latou uma
o ē sā‘ili‘ili ‘iā te oe.
‘Ia fai ane pea i latou o ē fiafia i lau fa‘aolataga,
“‘Ia vi‘ia le ALI‘I.”
17A o a‘u nei, ‘ua ‘ou puapuagātia ma ‘ou mativa;#Sala 86.1; 1 Pete 5.7
e manatua mai a‘u e le ALI‘I.
O oe lava lo‘u fesoasoani ma lo‘u fa‘aola;
lo‘u Atua e, ‘aua lava ‘e te tuai mai.
Currently Selected:
Salāmo 40: RSCB
Highlight
Share
Compare
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
