Popular Bible Verses from Salāmo 40

Share

Na ‘ou matuā fa‘atalitali lava i le ALI‘I; ‘ona fa‘asaga mai ai lea o ia ‘iā te a‘u, ‘ua fa‘afofoga mai fo‘i o ia i la‘u ‘alaga. Na ia ‘aveina a‘e a‘u a‘i le lua e malaia ai, ma le mea matuā palapalā; na fa‘atūina fo‘i o‘u vae i luga o le papa, ‘ua fa‘amautūina ai ‘ou savali.

‘Ua tu‘uina mai e ia le pese fou i lo‘u gutu, o le vi‘iga i lo tatou Atua; e iloa ai e le to‘atele, e matata‘u fo‘i i latou ma latou fa‘atuatua i le ALI‘I.

‘Amu‘ia le tagata o lē fa‘atuatua i le ALI‘I, ‘ae lē fa‘asaga i ē fa‘amaualuluga, ma ē ‘ua liliu ane i mea pepelo.

Lo‘u Atua e, ‘ou te fiafia e fai lou finagalo; o lo‘o i totonu lava ‘iā te a‘u lau tulafono.”

Le ALI‘I e, ‘aua ‘e te tāofi e oe lou alofa mutimutivale ‘iā te a‘u; ‘ia leoleoina pea lava a‘u e lou alofa ma lou fa‘amaoni.