Isaia 54
54
O le Manuia e maua e Tagata a le Atua; o le a Tupu tele le Galuega a le Atua
1‘Ia pese oe na le fafine pā sa le fānau;#1 Samu 2.5; Isai 62.4; Kala 4.27
‘ia leo tele ma ‘ia ‘alaga fiafia oe sa le fa‘atigā,
Auā ‘ua sili ‘ona to‘atele o le fānau a le nofo fua,
i le fānau a le nofo tane,
‘ua fetalai mai ai le ALI‘I.
2‘Ia fa‘alautele le mea e tu ai lou fale ‘ie;#Isai 49.19
‘ia fāloina ‘ie puipui o mea ‘e te nofo ai.
‘Aua ‘e te fa‘aitiitia;
‘ia fa‘aumiumiina au maea ma ‘ia malolosi au fao.
3Auā ‘e te osofia le tuāpā i le itū taumatau ma le itū tauagavale;#Kene 28.14
o lau fānau fo‘i e fai mo latou tofi nu‘u ‘ese,
e ‘ainā fo‘i e i latou o ‘a‘ai tu‘ufua.
4‘Aua ‘e te fefe, auā ‘e te lē mā;
‘aua fo‘i ‘e te māsiasi, auā e le fa‘amāina oe.
auā e galo ‘iā te oe lou mā ‘ina o ē teine muli;
‘e te lē toe manatua fo‘i lou luma ‘ina o ē nofo fua.
5Auā o lē na faia oe o lau tane lea,#Isai 62.4, 5; Saka 14.9
o le ALI‘I o ‘au o lona igoa lea.
O lē na fa‘atauina oe, o le Pa‘ia o Isaraelu lea;
e ta‘ua o ia, O le Atua o le lalolagi uma.
6Auā ‘ua vala‘au le ALI‘I ‘iā te oe,
e pei o le avā ‘ua lafoa‘iina,
ma ‘ua fa‘anoanoa lona loto.
O le avā fo‘i sa nofo a o teine muli
‘ina ‘ua lafoa‘iina oe,
‘ua fetalai mai ai lou Atua.
7‘Ua se ‘emo lava o le mata na ‘ou lafoa‘iina ai oe,#Isai 26.20
a o le alofa tele lava ‘ou te fa‘apotopotoina mai ai oe.
8O le sasa‘aina atu o lo‘u ita,
na ‘alo ai o‘u mata ‘iā te oe,
‘ua se ‘emo o le mata.
A o le alofa e fa‘avavau ‘ou te alofa atu ai ‘iā te oe,
‘ua fetalai mai ai le ALI‘I, o lē na fa‘atauina oe.
9Auā e pei o le lolo ‘iā Noa lenei mea ‘iā te a‘u;#Kene 9.8-17
na ‘ou tautō ai a‘u e lē toe lofia le lalolagi i le lolo ‘iā Noa.
E fa‘apea ‘ona ‘ou tautō,
‘ou te lē ita ‘iā te oe,
‘ou te lē a‘oa‘i atu fo‘i ‘iā te oe.
10Auā e mavae atu ō atu mauga e lūlūina fo‘i mauga;#Nume 25.12; Eseki 34.25
a o lo‘u alofa e lē mavae atu lea nai ‘iā te oe,
ma la‘u feagaiga e manuia ai e le lūlūina lea.
‘Ua fetalai mai ai le ALI‘I o lē alofa ‘iā te oe.
O le Lumana‘i o Ierusalema
11O oe na lē ‘ua tigā,#Fa‘aa 21.18-21; Isai 51.21
‘ua āfatia, ‘ua lē fa‘amafanafanaina.
Fa‘auta, ‘ou te atiina a‘e au ma‘a i mea e vali a‘i mata,
ma ‘ou fa‘avaeina oe i safaira.
12‘Ou te faia ou matagi‘olo i ma‘a mūmū,
ma ou faitoto‘a i ma‘a tioata,
ma ou tuā‘oi uma i ma‘a matagofie.
13E a‘oa‘oina lau fānau uma lava e le ALI‘I;#Ioane 6.45; Isai 9.7; Iere 31.33
e tele fo‘i le manuia o lau fānau.
14E fa‘atumauina oe i le amiotonu;
e mamao ma oe le sauāga, auā ‘e te lē fefe.
E mamao fo‘i ma le mata‘u,
auā e lē fa‘alatalata mai lea ‘iā te oe.
15Fa‘auta, latou te fa‘apotopoto lava i latou,#Isai 8.9-10
‘ae lē ‘ona o a‘u.
O i latou uma o ē fa‘apotopoto e tau ma oe,
e vavae mai i latou ‘iā te oe.
16Fa‘auta, o a‘u ‘ua ‘ou faia lē fai mea u‘amea,
o lo‘o tapili i malala ola,
ma gaosi ai ‘au‘upega i lana galuega.
O a‘u fo‘i ‘ua ‘ou faia lē na te fa‘atafunaina,
na te fa‘aumatia.
17O ‘au‘upega uma e faia e tau ma oe
e le manuia ia;
o laulaufaiva uma e finau atu ‘iā te oe
i le fa‘amasinoga ‘e te fa‘asalaina ia.
O le tofi lenā o ‘au‘auna a le ALI‘I,
o a latou amiotonu fo‘i mai ‘iā te a‘u lea,
‘ua fetalai mai ai le ALI‘I.
Currently Selected:
Isaia 54: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
