Isaia 53
53
O le Puapuagā o le Mesia
1O ai ‘ea ‘ua talitonu i la matou ‘upu e taulogologo atu;#Ioane 12.38; Roma 10.16; Isai 51.9
‘ua fa‘aalia ‘iā te ai le ‘a‘ao o le ALI‘I?
2Na tupu a‘e o ia e pei o se tātupu i ona luma,
e pei o le pogai i le nu‘u naumati;
e lē ‘aulelei pe lālelei o ia;
A tatou va‘ava‘ai ‘iā te ia e leai sona matagofie,
‘ina ‘ia tatou manana‘o ai ‘iā te ia.
3‘Ua ‘inosia ma tu‘ulafoa‘iina o ia e tagata;#Sala 22.6; Mare 9.12; Ioane 1.10-11
o le tagata fa‘anoanoa,
‘ua masani fo‘i ma le tigā.
E peiseaī ‘ua ‘alo ‘ese mata ‘iā te ia;
‘ua ‘inosia o ia ma ‘ua tatou lē manatua lava o ia.
4E moni, ‘ua na tau‘ave o tatou tigā,#Mata 8.17; Sala 69.26
ma na tau‘ave o tatou fa‘anoanoa.
A ‘ua tatou manatu o ia ‘ua taia,
‘ua fasia e le Atua ma ‘ua fa‘atigāina.
5A ‘ua manu‘a o ia ‘ona o a tatou solitulafono,#1 Pete 2.24; Roma 4.25
‘ua momomo o ia ‘ona o a tatou amio leaga.
O le a‘oa‘iga e filemū ai tatou sa i ona luga lea,
o ona fa‘alavalava fo‘i ‘ua mālōlō ai tatou.
6O i tatou uma ‘ua sē i tatou e pei o mamoe,#1 Pete 2.25; Iere 50.6, 17; 2 Kori 5.21
‘ua ta‘itasi ma fa‘asaga i lona lava ala.
A ‘ua fa‘ao‘o ‘iā te ia e le ALI‘I,
le amio leaga o i tatou uma.
7Na fa‘asauāina o ia, sa tigāina fo‘i o ia,#Iere 11.19; Mata 26.63; Galu 8.32; 1 Pete 2.23
‘ae lē tautala mai o ia.
E pei o le tama‘i mamoe ‘ua ta‘ita‘iina ‘ia fasia,
e pei o le mamoe fo‘i i luma o ē sele lona fulufulu,
‘ua fa‘alologo ia, o ia fo‘i ‘ua lē tautala mai.
8O le fa‘asauā ma le fa‘amasinoga na ‘ave‘eseina ai o ia;
o ai fo‘i na te talatalaina lana tupulaga?
Auā ‘ua vavae‘eseina o ia i le nu‘u o tagata ola,
na taia o ia ‘ona o le solitulafono a lo‘u nu‘u.
9Na tofia o ia ‘ia fai lona tu‘ugamau fa‘atasi ma ē pagotatā,#1 Pete 2.22; Mata 27.57, 60
‘ae peita‘i sa i le mau‘oa ‘ina ‘ua maliu.
Auā na lē faia e ia se fa‘asauāga,
‘ua leai fo‘i se pepelo i lona fofoga.
10A ‘ua finagalo le ALI‘I e tu‘imomomo ‘iā te ia,
‘ua ia fa‘atigāina o ia.
Pe ‘āfai na te faia se taulaga mo agasala,
‘ona iloa lea e ia o lana fānau,
e fa‘alevalevaina ona aso,
o le finagalo fo‘i o le ALI‘I e manuia lea ‘iā te ia.
11‘Ona o le tigā o lona agaga na te iloa ai lana fānau,
e malie ai o ia;
O le malamalama mai ‘iā te ia,
e ta‘uamiotonuina ai tagata e to‘atele e la‘u ‘au‘auna ‘ua amiotonu;
auā e tau‘ave e ia a latou amio leaga.
12O le mea lea ‘ou te vaevaea ai se vaega mo ia fa‘atasi ma ē ‘ua sili,#Mare 15.28; Luka 22.37; Roma 8.34; Fili 2.9; Kolo 2.15; 1 Timo 2.5
e vaea fo‘i le vete fa‘atasi ma ē fitafita,
‘ona ‘ua ia sasa‘a atu o lona ola ‘ia oti.
Na faitauina fo‘i o ia fa‘atasi ma ē pagotatā,
na ia ‘aveina fo‘i le agasala a tagata e to‘atele,
‘ua fautua fo‘i o ia mo ē solitulafono.
Currently Selected:
Isaia 53: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
