Popular Bible Verses from Isaia 53

Share

A ‘ua manu‘a o ia ‘ona o a tatou solitulafono, ‘ua momomo o ia ‘ona o a tatou amio leaga. O le a‘oa‘iga e filemū ai tatou sa i ona luga lea, o ona fa‘alavalava fo‘i ‘ua mālōlō ai tatou.

O i tatou uma ‘ua sē i tatou e pei o mamoe, ‘ua ta‘itasi ma fa‘asaga i lona lava ala. A ‘ua fa‘ao‘o ‘iā te ia e le ALI‘I, le amio leaga o i tatou uma.

E moni, ‘ua na tau‘ave o tatou tigā, ma na tau‘ave o tatou fa‘anoanoa. A ‘ua tatou manatu o ia ‘ua taia, ‘ua fasia e le Atua ma ‘ua fa‘atigāina.

‘Ua ‘inosia ma tu‘ulafoa‘iina o ia e tagata; o le tagata fa‘anoanoa, ‘ua masani fo‘i ma le tigā. E peiseaī ‘ua ‘alo ‘ese mata ‘iā te ia; ‘ua ‘inosia o ia ma ‘ua tatou lē manatua lava o ia.

Na fa‘asauāina o ia, sa tigāina fo‘i o ia, ‘ae lē tautala mai o ia. E pei o le tama‘i mamoe ‘ua ta‘ita‘iina ‘ia fasia, e pei o le mamoe fo‘i i luma o ē sele lona fulufulu, ‘ua fa‘alologo ia, o ia fo‘i ‘ua lē tautala mai.

A ‘ua finagalo le ALI‘I e tu‘imomomo ‘iā te ia, ‘ua ia fa‘atigāina o ia. Pe ‘āfai na te faia se taulaga mo agasala, ‘ona iloa lea e ia o lana fānau, e fa‘alevalevaina ona aso, o le finagalo fo‘i o le ALI‘I e manuia lea ‘iā te ia.

Na tupu a‘e o ia e pei o se tātupu i ona luma, e pei o le pogai i le nu‘u naumati; e lē ‘aulelei pe lālelei o ia; A tatou va‘ava‘ai ‘iā te ia e leai sona matagofie, ‘ina ‘ia tatou manana‘o ai ‘iā te ia.

O le mea lea ‘ou te vaevaea ai se vaega mo ia fa‘atasi ma ē ‘ua sili, e vaea fo‘i le vete fa‘atasi ma ē fitafita, ‘ona ‘ua ia sasa‘a atu o lona ola ‘ia oti. Na faitauina fo‘i o ia fa‘atasi ma ē pagotatā, na ia ‘aveina fo‘i le agasala a tagata e to‘atele, ‘ua fautua fo‘i o ia mo ē solitulafono.

‘Ona o le tigā o lona agaga na te iloa ai lana fānau, e malie ai o ia; O le malamalama mai ‘iā te ia, e ta‘uamiotonuina ai tagata e to‘atele e la‘u ‘au‘auna ‘ua amiotonu; auā e tau‘ave e ia a latou amio leaga.

O le fa‘asauā ma le fa‘amasinoga na ‘ave‘eseina ai o ia; o ai fo‘i na te talatalaina lana tupulaga? Auā ‘ua vavae‘eseina o ia i le nu‘u o tagata ola, na taia o ia ‘ona o le solitulafono a lo‘u nu‘u.

Na tofia o ia ‘ia fai lona tu‘ugamau fa‘atasi ma ē pagotatā, ‘ae peita‘i sa i le mau‘oa ‘ina ‘ua maliu. Auā na lē faia e ia se fa‘asauāga, ‘ua leai fo‘i se pepelo i lona fofoga.