Kalatia 6
6
O ‘Upu Apoapoa‘i
1Le ‘au uso e, ‘āfai e maua se tagata i se tasi agasala, o ‘outou o i la le Agaga, ‘ia ‘outou fa‘afo‘i mai lē ‘ua fa‘apeaina ma le loto o le agamalū. ‘Ia fa‘aeteete oe ‘ina ne‘i fa‘aosoosoina fo‘i oe.#Mata 18.15; Iako 5.19 2‘Ia ‘outou fesui ‘iā ‘outou avega e ‘ave, ma ia fa‘apea ‘ona ‘outou faia le tulafono a Keriso. 3Auā pe a manatu se tasi o le tagata aogā ia, ‘ae leai, ‘ua pelogia o ia e ia i lona manatu. 4A ‘ia ta‘ito‘atasi ma fa‘amasino i lana lava galuega, ‘ona ‘iā te ia lea o se mea e mitamita ai ‘iā te ia lava, ‘ae lē o se tasi.#2 Kori 13.5 5Auā e ta‘itasi ma ‘ave i lana lava avega.#Roma 14.12
6A o lē ‘ua a‘oa‘oina i le ‘upu, ‘ia tufa atu e ia mea lelei uma lava i lē ‘ua a‘oa‘o mai.#1 Kori 9.14
7‘Aua ne‘i fa‘asesēina ‘outou, e lē ulagia le Atua auā o le mea e lūlūina e le tagata, o le mea lava lea e seleseleina mai ai e ia. 8O sē lūlū i la lona tino, e selesele mai ai o ia i la le tino le mea e pala; a o sē lūlū i la le Agaga, e selesele mai ai e ia i la le Agaga le ola fa‘avavau.#Roma 8.13; Ioane 6.63; 3.6 9‘Aua ne‘i tatou fa‘apalapala i le amio lelei; auā o ona po e tatau ai tatou te selesele mai ai, pe ‘āfai tatou te lē fa‘avaivai.#2 Tesa 3.13 10O lenei, ‘ia tatou agalelei, ‘ia fa‘atatau i mea e tutupu i lea aso ma lea aso, i tagata uma lava, ‘ae maise i le ‘āiga o le fa‘atuatua.#2 Pete 1.7
O ‘Upu Mulimuli ma Fautuaga
11Fa‘auta i le tetele o mata‘itusi ‘ua ‘ou tusi atu ‘iā te ‘outou i lo‘u lava lima. 12O i latou uma o ē fia ta‘uleleia e tagata, latou te fa‘atauānau ‘ia peritomeina ‘outou, ‘ua na o lea, ‘ina ne‘i fa‘asauāina i latou ‘ona o le satauro o Keriso.#Kala 5.11; Fili 3.18; 1 Kori 1.31; 2.2 13Auā fo‘i o i latou o ē ‘ua peritomeina, latou te lē ‘ana‘ana i le tulafono; ‘ae peita‘i latou te loto ‘ina ‘ia peritomeina ‘outou, ‘ina ‘ia latou mitamita ai i o ‘outou tino. 14A o a‘u, ‘aua ne‘i ‘ou mitamita i se mea, tau lava o le satauro o lo tatou Ali‘i o Iesu Keriso, ‘ua fa‘asatauroina ai le lalolagi ‘iā te a‘u, o a‘u fo‘i i le lalolagi. 15Auā e lē aogā le peritome, po o le lē peritomeina tau lava ‘ina ‘ia toe faia ‘ia fou.#Kala 5.6; 1 Kori 7.19; Fili 3.3 16O i latou uma fo‘i o ē sāvavali e fa‘atatau i lenei matā‘upu, ‘ia ‘iā te i latou le manuia ma le alofa, ‘ia i ai fo‘i i le Isaraelu o le Atua.#Sala 125.5; 128.6
17E amata i ona po nei, ‘aua le toe fa‘alavelave se tasi ‘iā te a‘u; auā o a‘u ‘ou te tau‘ave fa‘ailoga o le Ali‘i o Iesu i lo‘u nei tino.#2 Kori 4.10
18Le ‘au uso e, ‘ia i ai i o ‘outou agaga le alofa tunoa o lo tatou Ali‘i o Iesu Keriso. Amene.
Currently Selected:
Kalatia 6: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
