Kalatia 4
4
O Atali‘i i Tatou o ē sa Nofo Pologa i le Tulafono
1‘Ou te fai atu fo‘i, o aso uma o itiiti ai le suli, e ui lava o ia e ana mea uma, e leai se mea e ‘ese ai o ia ma le pologa. 2‘Ae pule ‘iā te ia fa‘atamā ma ‘au‘auna e pule, se‘ia o‘o atu i ona po na tu‘upoina e le tamā. 3Sa fa‘apea fo‘i i tatou ‘ina o tama iti, sa nofo pologa i tatou i matā‘upu muamua a le lalolagi.#Kala 3.23; 5.1; Kolo 2.20 4A ‘ua o‘o atu i le fa‘a‘atoaga o tausaga, ‘ona ‘auina mai lea e le Atua o lona Alo, ma fānau i le fafine, na fānau ‘ua nofo i le tulafono;#Efe 1.10 5‘ina ‘ia fa‘atau mai e ia ē na nofo i le tulafono, ia ‘avea i tatou ma atali‘i.
6O atali‘i ‘outou,#4.6 O atali‘i ‘outou: O nisi fa‘aliliuga; o atali‘i ma afafine ‘outou. o le mea lea ‘ua ‘auina mai ai e le Atua le Agaga o lona Alo i o ‘outou loto, e vala‘au. “Ava, Le Tamā e.”#Roma 8.15 7O lea ‘ua lē toe fai oe ma pologa, a o le atali‘i; ‘ae ‘āfai o le atali‘i, o le suli fo‘i ‘ona o le Atua.#Kala 3.29; Roma 8.16-17
O le Naunauta‘iga a Paulo i Kalatia
8E moni, o ia ona pō ‘ua lē iloa ai e ‘outou le Atua na fai ai ‘outou ma pologa i mea e lē ni atua; 9a o nei ona pō ‘ina ‘ua ‘outou iloa le Atua, pe sili pe a fa‘apea ‘ina ‘ua iloa lava ‘outou e le Atua, pe fa‘apefea ‘ona ‘outou toe liliu i matā‘upu muamua e vaivai ma fa‘atauva‘a, ‘ua ‘outou toe manana‘o ‘ea ia ‘outou toe nofo pologa i ai? 10Tou te ‘ana‘ana i aso, ma masina, ma tau, ma tausaga.#Roma 14.5; Kolo 2.16 11‘Ou te fefe ‘iā te ‘outou, ‘ina ne‘i i‘u ‘ina fa‘alēaogāina la‘u galuega na ‘ou faia ‘iā te ‘outou.
12Le ‘au uso e, ‘ou te ‘ai‘oi atu ‘iā te ‘outou, ‘ia fa‘apei o a‘u ‘outou, auā o a‘u ‘ua pei o ‘outou; na lē agaleagaina a‘u e ‘outou i se mea e tasi. 13‘Ua ‘outou iloa o le ma‘i ‘ua ala ai ‘ona mua‘i folafola ai le tala lelei ‘iā te ‘outou;#Galu 16.6; 1 Kori 2.3 14o le tofotofoga fo‘i sa ‘iā te ‘outou i lo‘u nei tino e le‘i ta‘ufa‘atauva‘aina ai a‘u e ‘outou, pe ‘inosia fo‘i, a ‘ua ‘outou talia mai a‘u peiseaī se agelu a le Atua, peiseaī o Keriso Iesu. 15Pe fa‘apefea fo‘i lo ‘outou manuia sa fai mai? Auā o la‘u mau lenei ‘iā te ‘outou, ‘ana ‘outou mafaia, po ‘ua ‘outou sasali mai o ‘outou mata, ma foa‘i mai ‘iā te a‘u. 16‘Ia, po ‘ua ‘outou ‘avea ‘ea a‘u mo ‘outou fili i lo‘u ta‘uina atu ‘iā te ‘outou le ‘upu moni?#Amo 5.10
17Latou te naunau#4.17 naunau: O nisi fa‘aliliuga; mā‘elegā. ‘iā te ‘outou, ‘ae fa‘alētatau; ‘ae peita‘i latou te fia, tu‘u‘ese‘eseina ‘outou ma a‘u, ‘ina ‘ia ‘outou naunau ‘iā te i latou. 18E tatau le ta‘uleleia pea i le mea lelei e lē aunoa, ‘aua ne‘i gata ‘ina o ‘iā te ‘outou o a‘u. 19La‘u fānau e, ‘ou te toe ‘o‘ono ai i ‘ou fa‘atigā, se‘ia tino Keriso i totonu ‘iā te ‘outou.#1 Kori 4.15 20‘Ou te loto ‘ina ‘ia ‘ou i ai ‘iā te ‘outou i ona po nei, ma tautala fa‘atatau atu, auā ‘ua fa‘alētonu lo‘u manatu ‘iā te ‘outou.
O le Fa‘ata‘ita‘iga o Sara ma Akara
21‘Inā ta‘u mai ia ‘iā te a‘u ‘outou o ē fia nonofo i le tulafono, tou te lē fa‘alogo atu ‘ea i le tulafono?#Kala 3.23 22Auā ‘ua tusia, sa ‘iā Aperaamo atali‘i e to‘alua, o le tasi na fānau mai i le fafine nofo pologa, a o le tasi i le fafine sa‘oloto.#Kene 16.15; 21.2, 9 23‘Ae peita‘i o le tama a le fafine nofo pologa, ‘ua fānau lea i la le tino; a o le tama a le fafine sa‘oloto, na fānau ia ‘ona o le mea na folafolaina.#Roma 9.7-9; Kene 17.16 24‘Ua fai ma mea fa‘atusa ia mea; auā o fafine nei o feagaiga e lua ia; o le tasi mai le mauga o Sinai, e fānau mai tama e fai ma pologa, o Akara lea.#Kala 5.1; Roma 8.15 25Auā o Akara lenei o le mauga o Sinai ia i Arapi; ‘ua la tutusa ma Ierusalema i ona po nei, ‘ua nofo pologa ‘atoa ma lana fānau. 26A o Ierusalema i lugā o le sa‘oloto ia, o le tinā o i tatou uma lava ia.#Epe 12.22 27Auā na tusia, #Isai 54.1
“‘Ia e ‘oli‘oli oe le fafine e pā sa lē fānau;
ia ē uiō ma leo tele oe sa le fa‘atigā;
auā ‘ua tele le fānau a lē ‘ua nofo fua,
i la le nofo tane.”
28A o i tatou, le ‘au uso e, o fānau i tatou e tusa ma le mea na folafolaina, pei o Isaako; 29‘ae fa‘apei ‘ona sauā o le na fānau i la le tino i le na fānau i la le Agaga i ia ona po, e fa‘apea fo‘i i ona po nei.#Kene 21.9 30‘Ae peita‘i se a ‘ea e fai mai ai le Tusi? “‘Inā tutuli ia le fafine nofo pologa ma lana tama; auā e lē tofia le tama a le fafine nofo pologa fa‘atasi ma le tama a le fafine sa‘oloto.”#Kene 21.10-12; Ioane 8.35 31O lenei, le ‘au uso e, e lē ni fānau i tatou a le fafine nofo pologa, a o le fafine sa‘oloto.#Kala 3.29
Currently Selected:
Kalatia 4: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.