1 Tesalonia 5
5
O le Sauniuni mo le Afio mai o le Ali‘i
1A o aso ma tausaga, e lē aogā ‘iā te ‘outou, le ‘au uso e, ‘ona ‘ou tusi atu ai ‘iā te ‘outou.#Mata 24.36 2Auā ‘ua ‘outou iloa lelei lava, o le aso o le Ali‘i e pei o le gaoi i le po, e fa‘apea ‘ona o‘o mai ai.#Mata 24.42-44; 2 Pete 3.10; Fa‘aa 3.3; 16.15 3Auā pe a latou fai ane, “O lo‘o filemū, ‘ua lē afaina,” ‘ona o‘o lea ‘iā te i latou o le fano fa‘afuase‘i, e fa‘apei o le fa‘atigā o le fafine tō a fānau mai, latou te lē sōsōla ai lava.#Iere 6.14; Ioane 16.21, 22; Mata 24.39; Luka 21.34-35 4A o ‘outou, le ‘au uso e, tou te lē ō i le pouliuli, ‘ia maua mai ai ‘outou e lenā aso, pei o se gaoi. 5O tagata o le malamalama ‘outou uma lava, ma tagata o le ao; tatou te lē ō i le po ma le pouliuli.#Roma 13.12; Efe 5.9 6O lea, ‘aua ne‘i tatou momoe ai fa‘apei o isi, a ‘ia tatou mataala, ma ‘ia fa‘autauta. 7Auā o ē momoe, e momoe i latou i le po; o ē inu ia ‘onā, e ‘onā i latou i le po; 8a o i tatou nei o ē o le ao, ‘ia fa‘autauta i tatou, ‘ia tatou ‘o‘ofu i le ufifatafata o le fa‘atuatua ma le alofa, ma le puloutau o le fa‘amoemoe i le fa‘aolataga.#Efe 6.14, 17; Isai 59.17 9Auā e le‘i tofia i tatou e le Atua i le to‘asā, a ‘ia maua le fa‘aolataga ‘ona o lo tatou Ali‘i o Iesu Keriso.#1 Tesa 1.10; 2 Tesa 2.14 10O lē na maliu mo i tatou, ‘ina ‘ia tatou ola fa‘atasi ma ia, pe tatou te mataala, pe tatou te momoe.#1 Tesa 4.14; Roma 14.8-9 11O lea ‘ia ‘outou feapoapoa‘i ai, ma ‘ia fēfa‘amafanafanaa‘i, fa‘apei ‘ona ‘outou faia lava.#Iuta 20
O Tima‘iga ma le ‘Upu Mulimuli
12Matou te ‘ai‘oi atu fo‘i ‘iā te ‘outou, le ‘au uso e, ‘ia ‘outou iloa ē o galulue ‘iā te ‘outou, ma pule ‘iā te ‘outou i la le Ali‘i, ma latou apoapoa‘i atu ‘iā te ‘outou.#1 Kori 16.18; 1 Timo 5.17 13‘Ia matuā manatua i latou ma le alofa, ‘ona o la latou galuega ‘Ia ‘outou nonofo fefilemūa‘i.
14Matou te ‘ai‘oi atu fo‘i ‘iā te ‘outou, le ‘au uso e, ‘ia ‘outou apoapoa‘i atu i ē amio fa‘atalanoa, ‘ia fa‘amafanafana i ē loto iti, ‘ia fesoasoani i ē o vaivai, ‘ia ‘outou ‘onosa‘i i tagata uma lava.#2 Tesa 3.6, 11, 15 15‘Ia ‘outou, ne‘i taui atu e se tasi le leaga i le leaga i se tasi tagata, a ‘ia ‘outou tausisi e lē aunoa i le mea lelei, o le tasi i le tasi, ‘atoa ma tagata uma lava.#Fa‘ata 20.22; Roma 12.17; 1 Pete 3.9
16‘Ia ‘outou saga ‘oli‘oli pea lava. 17‘Ia tatalo e lē aunoa.#Luka 18.1; Roma 12.12; Kolo 4.2 18‘Ia ‘outou fa‘afetai i mea uma lava, auā o le finagalo lea o le Atua ‘iā te ‘outou, ‘iā Keriso Iesu.#Efe 5.20
19‘Aua tou te tineia le Agaga.#1 Kori 14.1, 29, 30, 39 20‘Aua le ta‘ufa‘atauva‘a i perofetaga. 21‘Ia tofotofo i mea uma lava, ‘ia tāofi mau i le mea lelei.#1 Ioane 4.1 22‘Ia mamao ‘outou ma mea leaga ‘ese‘ese uma lava.#Iopu 1.1-8; 2.3
23‘Ia ‘ato‘atoa ‘ona fa‘apa‘iaina o ‘outou e le Atua lava e ona le manuia; ‘ia tausia lava lo ‘outou agaga ‘atoa uma, i le ma le loto, ‘atoa ma le tino, ‘ia lē mata‘uleagaina, i le afio mai o lo tatou Ali‘i o Iesu Keriso.#2 Tesa 3.3 24E fa‘amaoni lava o lē ‘ua vala‘auina ‘outou, o lē na te faia lava.#1 Kori 1.9; 2 Tesa 3.3
25Le ‘au uso e, ‘ia ‘outou tatalo mo i matou.#2 Tesa 3.1
26‘Ia alolofa atu i le ‘au uso uma i le feasogi pa‘ia.#1 Kori 16.20
27‘Ou te matuā fai atu ‘iā te ‘outou i le suafa o le Ali‘i ‘ia faitaulia lenei tusi i le ‘au uso pa‘ia uma lava.
28‘Ia ‘iā te ‘outou le alofa tunoa o lo tatou Ali‘i o Iesu Keriso.#5.28 O nisi fa‘aliliuga e fa‘aopoopo i ai le Amene.
Currently Selected:
1 Tesalonia 5: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.