1 Tesalonia 4
4
O Apoapoa‘iga
1O lenei, le ‘au uso e, o le toe ‘upu lenei, matou te ‘ai‘oi atu ma apoapoa‘i atu ‘iā te ‘outou ‘ona o le Ali‘i o Iesu, fa‘apei ‘ona talia e ‘outou mai ‘iā te i matou le uiga o le ala e tatau ‘ona ‘outou sāvavali ai, ‘ia fiafia mai ai le Atua ‘iā te ‘outou, ‘ia fa‘asilisili pea i ai ‘outou.#2 Tesa 3.6; 1 Tesa 5.23; Epe 10.10; 1 Pete 1.16 2Auā ‘ua ‘outou iloa ‘ia poloa‘iga na matou tu‘uina atu ai ‘iā te ‘outou mai le Ali‘i o Iesu. 3O le finagalo fo‘i lenei o le Atua, ‘ia fa‘apa‘iaina ‘outou, ‘ina ‘ia fa‘amamao ‘outou ma le faita‘aga. 4‘Ia ta‘itasi ‘outou ma iloa ‘ona fai o lona lava tino#4.4 ‘Ia ta‘itasi ‘outou ma…fai o lona lava tino: po o ‘Ia ta‘itasi ‘outou ma āva i lana avā. ma le fa‘apa‘iaina ma le ta‘uleleia,#1 Kori 6.13, 15 5‘aua ma le tu‘inanau o le mana‘o, fa‘apei o nu‘u ‘ese ‘ua lē iloa le Atua.#Iere 10.25; Sala 79.6 6‘Aua ne‘i sopo tapula‘a se tasi, ma agaleaga i lona uso i lenei mea; auā o le Ali‘i na te taui atu ma sui i nei mea uma, fa‘apei ‘ona matou mua‘i fai atu ai, ma ta‘utino atu ‘iā te ‘outou.#Sala 94.2 7Auā e le‘i vala‘auina i tatou e le Atua ‘ia amio leaga, a ‘ia fa‘apa‘iaina lava.#2 Tesa 2.13-14 8O lenei, o lē fa‘alēaogā mai, ‘ua ia lē fa‘alēaogā i tagata, a o le Atua lē ‘ua foa‘i mai lona Agaga Pa‘ia ‘iā te i matou.#Luka 10.16; Eseki 36.27; 37.14
9‘Ae lē aogā ‘ona ‘ou tusi atu ‘iā te ‘outou e uiga i le alofa i le ‘au uso; auā, ‘ua a‘oa‘oina ‘outou lava e le Atua ‘ia fealofani.#Ioane 13.34; Iere 31.33-34 10Auā fo‘i ‘ua fa‘apea lava ‘ona ‘outou faia i le ‘au uso uma lava o i Maketonia ‘atoa uma. ‘Ae matou te apoapoa‘i atu ‘iā te ‘outou le ‘au uso e, ‘ia fa‘asilisili pea i ai; 11ma ‘ia ‘outou taumafai ‘ina ‘ia ‘outou nofo fīfīlemū ‘ia faia a ‘outou lava fe‘au, a ‘ia galulue i o ‘outou lava lima, pei ‘ona matou fai atu ai ‘iā te ‘outou.#Efe 4.28; 2 Tesa 3.8, 12 12‘Ina ‘ia ‘outou sāvavali ma le matagofie i luma o ē o i tuā, ma ‘ia lē matitiva ‘outou i se mea e tasi.#Kolo 4.5; 1 Kori 5.12-13
O le Afio mai o le Ali‘i
13Matou te loto ‘ina ‘ia ‘outou iloa, le ‘au uso e, e uiga i ē o momoe, ‘ina ne‘i ‘outou fa‘anoanoa, pei o isi e leai so latou fa‘amoemoe.#1 Kori 15.20; Efe 2.12 14Auā ‘āfai tatou te talitonu, ‘ua maliu Iesu ma toetū mai, e fa‘apea fo‘i ‘ona ‘aumaia e le Atua fa‘atasi ma ia ē o momoe ‘ona o Iesu.#Roma 14.9; 1 Kori 15.3, 4, 12
15Matou te fai atu fo‘i lenei mea ‘iā te ‘outou i le afioga a le Ali‘i, o i tatou o ē ola ma totoe se‘i afio mai le Ali‘i, tatou te lē muamua i ē o momoe.#1 Kori 15.51; 7.10, 25 16Auā e afio ifo mai le lagi le Ali‘i lava, ma le ‘alaga ma le leo o le agelu sili, ma le pū a le Atua. E muamua fo‘i ‘ona toe tutū mai o ē ‘ua oti o ‘iā Keriso.#1 Kori 15.52; 2 Tesa 1.7 17‘Ona fa‘afuase‘i lea ‘ona ‘aveina a‘e o i tatou o ē ola ma totoe, fa‘atasi ma i latou i ao, ‘ina ‘ia fetaia‘i ma le Ali‘i i le vā nimonimo; ‘ona tatou fa‘atasi pea lava lea ma le Ali‘i.#Ioane 12.26; 17.24 18O lenei, ‘ia ‘outou fēfa‘amafanafanaa‘i i nei ‘upu.
Currently Selected:
1 Tesalonia 4: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.