1 Samuelu 30
30
‘Ua Fa‘amūina Sekeleka e Amaleka
1‘Ua o‘o Tavita ma ona tagata i Sekeleka i le aso tolu, a ‘ua uma le osofia le itū i saute ma Sekeleka e Amaleka; ‘ua fasia fo‘i Sekeleka, ma ‘ua fa‘amūina i le afi.#1 Samu 15.3, 7-8; 27.8; 29.4, 11; 30.14 2‘Ua tafea fo‘i fafine sa i ai, o ē iti ‘atoa ma ē matutua; e le‘i fasiotia se tasi, a ‘ua ‘avea i latou ma ‘ua latou o. 3‘Ua o‘o atu Tavita ma ona tagata i le ‘a‘ai, fa‘auta, ‘ua mū i le afi, a o a latou avā, ma o latou atali‘i, ma o latou afafine ‘ua tafea i latou. 4‘Ona fētāgisi ai lea o Tavita ma le nu‘u sa ‘iā te ia, ‘ua leo tetele, ‘ua o‘o ‘ina le toe lavā ‘ona tagi. 5‘Ua tāfea fo‘i avā a Tavita e to‘alua, o Ainoama le Isereelu, ma Apikaila le avā a Napalu le Karamelu.#1 Samu 25.42-43
6‘Ua atuatuvale tele lava Tavita, auā na tautala le nu‘u e fetogi ‘iā te ia i ma‘a, ‘ina ‘ua tigā loto o le nu‘u uma ta‘itasi i ona atali‘i ma ona afafine; a ‘ua fa‘amalosi Tavita lona loto i le ALI‘I lona Atua. 7‘Ua fai atu Tavita ‘iā Aviata le ositaulaga, le atali‘i o Aimeleka, “‘Inā ‘aumai ia ‘iā te a‘u le efota;” ‘ona avatu ai lea e Aviata o le efota ‘iā Tavita.#1 Samu 22.20-23 8‘Ona fesili lea o Tavita i le ALI‘I, ‘ua fa‘apea atu, “‘Ou te tuliloa ‘ea i lenā ‘au? ‘Ou te maua atu ‘ea ‘iā te i latou?”
‘Ona fetalai mai lea o ia ‘iā te ia, “Tuliloa ia auā ‘e te maua atu ai lava, ma e maua mai lava mea uma.”#1 Samu 23.2, 4; 30.18
9‘Ua alu atu Tavita, o ia ma tagata e to‘aono galau sa ‘iā te ia, ‘ua o‘o i le alia o Pesora, ‘ua nonofo ai e na nonofo. 10‘Ua tulituliloa e Tavita ma tagata e to‘afa galau, a ‘ua nonofo le to‘alua selau na lē lavā e ō atu i le la itū o le alia o Pesora.#1 Samu 30.21 11‘Ona latou maua lea le tagata Aikupito o le vao, ‘ua avatu o ia ‘iā Tavita; na latou avane ‘iā te ia se areto ‘ua ‘ai ai, ma latou fa‘ainu ‘iā te ia i le vai. 12‘Ua latou avatu fo‘i ‘iā te ia se fasi potopotoga mati mamago ma fuifui vine mamago e lua, ‘ua ‘ai o ia ‘ona toe fo‘i mai lea o lona malosi ‘iā te ia; auā e tolu ao e tolu fo‘i po ‘ua ia le ‘ai ni areto, ‘ua lē inu fo‘i se vai.#Fa‘ama 15.19 13‘Ona fai atu lea o Tavita ‘iā te ia, “O ai ‘ea oe? maifea fo‘i oe?”
‘Ona fai mai lea o le taule‘ale‘a, “O a‘u le Aikupito, le ‘au‘auna a le tagata Amaleka; na tu‘ulafoa‘i mai lo‘u ali‘i ‘iā te a‘u, auā na maua a‘u i le ma‘i anapō luā. 14Na matou osofia le itū i Saute o tagata Kereti, ma le lau‘ele‘ele o Iuta, ma le itū i saute o Kalepo; na matou fa‘amū fo‘i Sekeleka i le afi.”#1 Samu 25.3; 27.10; 30.1; 2 Samu 8.18; 15.18; 20.7, 23; Eseki 25.16; Sefa 2.5
15‘Ona fai atu lea o Tavita ‘iā te ia, “‘E te ta‘ita‘i ifo ‘ea ‘iā te a‘u i lenā ‘au?”
‘Ona fai mai lea o ia, “‘Inā tautō ia i le Atua ‘iā te a‘u, ‘e te lē fasioti ‘iā te a‘u, ‘e te lē tu‘uina atu fo‘i a‘u i le lima o lo‘u ali‘i, ‘ona ‘ou ta‘ita‘i ifo lea ‘iā te oe i lenā ‘au.” 16‘Ua ia ta‘ita‘i ifo ‘iā te ia, fa‘auta, o lo‘o salalau i latou i le fogā‘ele‘ele uma, o lo‘o ‘a‘ai ma feinu ma sisiva, ‘ona o le vete e tele ‘ua latou ‘aumaia mai le nu‘u o Filisitia, ma le nu‘u o Iuta. 17‘Ona fasia lea o i latou e Tavita e āfua i le segisegi o le taeao ‘ua o‘o i le afiafi o le tasi aso; ‘ua lē sao so latou e to‘atasi, na o taulele‘a e to‘afa galau sa ti‘eti‘e i kamela, ma latou sōsōla. 18‘Ona maua lea e Tavita mea uma na ‘ave e Amaleka, ma ana avā e to‘alua ‘ua maua e Tavita. 19‘Ua leai sa latou mea ‘ua lē iloa, o se mea itiiti po o se mea tele, o atali‘i ma afafine, o vete ma mea uma na ‘ave e i latou, ‘ua toe ‘aumai uma e Tavita.#1 Samu 30.8 20‘Ua ‘ave e Tavita mamoe uma ma povi, ‘ua latou tutuli atu i luma o le tasi lafu, ma ‘ua latou fai ane, “O vete nei a Tavita.”
21‘Ua o‘o atu Tavita i tagata e lua selau sa le lavā ‘ona mulimuli atu ‘iā Tavita, sa nonofo i le alia o Pesora; na ō mai i latou e fa‘afetaia‘i ‘iā Tavita, e fa‘afetaia‘i fo‘i i le nu‘u sa ‘iā te ia; ‘ua fa‘alatalata atu Tavita i le nu‘u, ‘ona alofa atu lea o ia ‘iā te i latou. 22‘Ona fai atu ai lea tagata agaleaga uma ma ē ulavavale o le nu‘u na ō ma Tavita, ‘ua fa‘apea, “‘Ona ‘ua lē ō latou ma i tatou, o le mea lea tatou te lē avatu ai ‘iā te i latou ni vete na matou fao mai, na ‘ona ta‘itasi ma ta‘ita‘i atu lana avā ma ana fānau ma ‘ia latou ō.”#1 Samu 25.17
23A ‘ua fai atu Tavita, “O‘u uso e, ‘aua le fa‘apea ‘ona fai i mea ‘ua foa‘i mai e le ALI‘I ‘iā te i tatou; ma na leoleo ‘iā te i tatou, ma tu‘uina mai i o tatou lima le ‘au na ō mai ‘iā te i tatou. 24O ai fo‘i sē fa‘alogo ‘iā te ‘outou i lenei mea? auā e tusa le vaegā‘oa o lē na alu ifo i le tau‘a, ma le vaegā‘oa o lē na fa‘amuli i ‘oa, e fa‘agatasi lava o latou vaegā‘oa.”#Nume 31.27; Iosu 22.8 25Na āfua mai i lea aso, ‘ua fa‘atūina lenei mea e fai ma tulafono ma masani ‘iā Isaraelu, ‘ua o‘o i le aso nei.
26‘Ua o‘o atu Tavita i Sekeleka, ‘ona avatu ai lea e ia o mea o le vete i toeaina o Iuta o ana uō, ‘ua fa‘apea atu, “Fa‘auta, o le mea alofa ‘iā te ‘outou a‘i le vete na maua i fili o le ALI‘I;” 27mo ē i Peteli, mo ē i Ramota i le itū i saute, mo ē i Iatira,#Iosu 15.48 28mo ē i Aroeru, mo ē i Sefemo, mo ē i Esetemoa, 29mo ē i Rakala, mo ē i ‘a‘ai o sa Ieramaelū, mo ē i ‘a‘ai o sa Kenī, 30mo ē i Horema, mo ē i Koroasa, mo ē i Ataka, 31mo ē i Heperona, ma mea uma sa fealua‘i ai Tavita o ia ma ona tagata.#Iosu 14.13-15; Fa‘ama 1.10; 2 Samu 2.1-4
Currently Selected:
1 Samuelu 30: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
