1 Samuelu 25
25
O le Oti o Samuelu
1‘Ua oti Samuelu, ‘ona fa‘apotopoto ai lea o Isaraelu uma, ‘ua latou taufaitagitu‘i ‘iā te ia, ma tanu ‘iā te ia i lona fale i Rama. ‘Ua tula‘i Tavita, ma alu ifo i le vao o Parana.#1 Samu 1.19; 15.35; 28.3; 1 Tu 2.34
O Tavita ma Apikaila
2Sa i ai le tasi tagata i Meona, o ana mea fo‘i sa i Karamelu; ‘ua tagata ola lava ia, sa ‘iā te ia o mamoe e tolu gaafe, ma ‘oti e tasi le afe; sa sele fulufulu o ana mamoe i Karamelu. 3O Napalu le igoa o le tagata, o Apikaila le igoa o lana avā; o le fafine mafaufau lelei, ma le lālelei, a o le tane o le finauvale ia ma le leaga i ana mea e fai; o le sa Kalepō fo‘i o ia.#Nume 13.6; 1 Samu 30.14; 1 No 2.42 4‘Ua fa‘alogo Tavita i le vao, o lo‘o sele e Napalu fulufulu o ana mamoe; 5‘ona ‘auina atu lea e Tavita o taulele‘a e to‘asefulu; ‘ua fa‘apea ane Tavita i taulele‘a, “Ō a‘e ia ‘outou i Karamelu, ma ō atu ‘iā Napalu, ma ofo atu ‘iā te ia i lo‘u igoa; 6tou te fa‘apea atu i le ‘ua tagata ola, ‘‘Ia manuia oe, ‘ia manuia lou ‘āiga, ‘ia manuia au mea uma lava.#1 No 12.18; Mata 10.13; Luka 10.5 7O lenei, ‘ua au fa‘alogo atu o lo‘o ‘iā te oe e ‘ua sele fulufulu; o lenei, o au leoleo mamoe sa matou nonofo ma i matou, sa le afaina i latou; e leai fo‘i se mea na lē iloa ‘iā te i latou i aso uma na latou i ai i Karamelu. 8‘Ia e fesili i ou taulele‘a, latou te ta‘u atu ai ‘iā te oe; ma ia alofagia taulele‘a e oe; auā o le aso lelei ‘ua ō atu ai i latou; ‘ia e foa‘i ane se mea e so‘ona maua e oe i au ‘au‘auna ma lou atali‘i o Tavita.’”
9‘Ua o‘o atu taulele‘a o Tavita, ‘ona latou fai atu lea ‘iā Napalu, e pei o ‘upu nei uma, i le igoa o Tavita, ‘ona fa‘alologo ai lea o i latou. 10‘Ona tali mai lea o Napalu i ‘au‘auna a Tavita, ‘ua fa‘apea mai, “O ai ‘ea Tavita? O ai fo‘i le atali‘i o Iese e to‘atele ‘au‘auna i nei ona po, ‘ua ta‘itasi ma sola ‘ese i o latou matai.#Fa‘ama 9.28 11‘Ou te ‘ave ‘ea a‘u areto, ma a‘u vai, ma a‘u manu ‘ua ‘ou fasia mo e sele mo a‘u, ‘ou te foa‘i atu ai i tagata ‘ou te lē iloa pe maifea i latou?”
12‘Ona liliu mai ai lea o taulele‘a o Tavita i lo latou ala, ‘ua latou toe fo‘i mai; ‘ua o‘o mai ma latou ta‘u mai ‘iā te ia, e tusa ma ia ‘upu uma. 13‘Ona fai atu lea o Tavita i ona tagata, “‘Ia ta‘itasi ma fusi i lana pelu;” ‘ona ta‘itasi lea ma fusi i lana pelu, ‘ua fusi fo‘i e Tavita i lana pelu; ‘ona mulimuli a‘e lea ‘iā Tavita pe ‘atoa se to‘afa galau o tagata, ‘ae fa‘amuli le to‘alua lau i ‘oloa.#1 Samu 23.13; 27.2; 30.24
14Na ta‘u atu e le tasi taule‘ale‘a ‘iā Apikaila le avā a Napalu, ‘ua fa‘apea, “Fa‘auta, na ‘auina mai e Tavita o ‘au‘auna nai le vao e fa‘amanuia i lo tatou ali‘i a ‘ua ia oso fe‘ai atu ‘iā te i latou. 15Sa agalelei tasi ia tagata ‘iā te i matou; sa le afaina i matou, na leai fo‘i sa matou mea e lē iloa i aso uma na matou feoa‘i ma i latou, a o i ai i matou i le vao.#1 Samu 25.7, 21 16Sa fai ma pā i latou ‘iā i matou i le po ma le ao i aso uma na matou i ai ma i latou o leoleo mamoe. 17O lenei, ‘ia e iloa ma e mafaufau pe se a se mea ‘e te faia, auā ‘ua uma ‘ona saunia mai se leaga i lo tatou ali‘i, ‘atoa ma lona ‘āiga uma; o ia fo‘i le tagata ulavale, e lē matautala atu se tasi ‘iā te ia.”#1 Tu 21.10
18‘Ona fa‘ata‘alise ai lea o Apikaila, ‘ua ia avane areto e lua selau, ma fagu pa‘u o uaina e lua, ma mamoe ‘ua uma ‘ona saunia e lima, ma sea o saito tunu e lima, ma fuifui vine mago e selau, ma potopotoga mati e lua selau, ‘ua ia fa‘ae‘e a‘i i luga o asini. 19‘Ua fai atu i ona taulele‘a, “Muamua ia ‘outou i o‘u luma; fa‘auta, ‘ou te mulimuli atu ‘iā te ‘outou;” a ‘ua ia lē ta‘u atu ai ‘iā Napalu lana tane.
20Sa ti‘eti‘e ia i luga o le asini, ma alu ifo i le itū e lilo o le mauga; fa‘auta fo‘i, o lo‘o ō ifo Tavita ma ona tagata ‘ua feagai ma ia na latou fetaia‘i ma ia. 21Na fai ane Tavita, “E moni, ‘ua ‘ou leoleo fua i mea uma a lenā tagata i le vao, ‘ua leai lava sana mea e tasi e lē iloa; a ‘ua taui mai o ia ‘iā te a‘u le lelei i le leaga.#1 Samu 25.7, 15; Sala 109.5; Fa‘ata 17.13; 1 Pete 2.20 22‘Ia fa‘apea ‘ona fai e le Atua i ē ita ‘iā Tavita, ma ia fa‘aopoopo i ai, pe ‘āfai ‘ou te fa‘asao, ‘ia o‘o i le malama a‘e o le taeao, so latou uma o ‘iā te ia e tula‘i atu i se ‘aupā.”
23‘Ua iloa e Apikaila ‘iā Tavita, ‘ona fa‘ata‘alise ai lea ‘ona alu ifo o ia nai le asini, ‘ua fa‘apa‘ū faō ia i luma o Tavita, ma ifo to‘ele.#Kene 24.64; Fa‘ama 1.14; Ruta 2.10; 1 Samu 25.41 24‘Ua fa‘apa‘ū mai i ona vae, ‘ua fai mai, “Le ali‘i e, ia ‘iā te a‘u lenei agasala; o a‘u nei lau ‘au‘auna fafine, se‘i ‘ou fai atu i ou fofoga, ma e fa‘afofoga mai i ‘upu a lau ‘au‘auna fafine; 25‘aua ne‘i tu‘u a lo‘u ali‘i i lona finagalo o amio a lenā tagata ulavale, o Napalu; auā e pei o lona igoa e fa‘apea fo‘i o ia; o Napalu lona igoa, o lo‘o ‘iā te ia fo‘i le valea; a o a‘u lau ‘au‘auna fafine, ‘ou te le‘i iloa taulele‘a o lo‘u ali‘i, na e ‘auina atu ai.#2 Samu 13.13; Isai 32.6 26“O lenei, le ali‘i e, o lo‘o soifua le ALI‘I, o lo‘o e soifua fo‘i oe, ‘ua tāofi le ALI‘I ‘iā te oe, ‘ina ne‘i e alu atu e sasa‘a le toto, ma taui atu ai e lou lima ‘iā Napalu, o lenei, ‘ia pei o Napalu e ‘ua ita ‘iā te oe, ‘atoa ma ē ‘ua sā‘ili e agaleaga i lo‘u ali‘i. 27O lea fo‘i, o le alofa lenei ‘ua ‘aumai e lau ‘au‘auna fafine i lo‘u ali‘i; ‘ia avatu ia i taulele‘a o lo‘o mulimuli mai i lo‘u ali‘i.#Kene 33.11; 1 Samu 30.26; 2 Tu 5.15 28‘Ia e fa‘amāgalo le agasala a lau ‘au‘auna fafine; auā e faia lava e le ALI‘I mo lo‘u ali‘i se ‘āiga tumau, auā ‘ua tau e lo‘u ali‘i tau‘a o le ALI‘I, e le‘i iloa fo‘i se leaga ‘iā te oe i ou aso uma. 29A ‘ua tula‘i mai le tagata e tulituliloa ‘iā te oe, o lo‘o sā‘ili‘ili fo‘i ‘ia maliu oe; ‘ae fusifusia le ola o lo‘u ali‘i i le taui o le ola e le ALI‘I lou Atua, a o le ola o ē ita ‘iā te oe, na te sasau i ai i le ma‘atā.#Iere 10.18; Sala 69.28 30A uma ‘ona fai e le ALI‘I i lo‘u ali‘i o mea lelei uma na ia fetalai mai ai ‘iā te oe ma ‘ua tofia oe e fai ma ta‘ita‘i e pule ‘iā Isaraelu, 31e lē fai le mea nei ma fa‘alavelave ‘iā te oe ma mea e tigā ai le finagalo o lo‘u ali‘i, ‘ina ‘ua e lē sasa‘a fua le toto, ma ‘ua lē taui atu e lo‘u ali‘i le leaga. A fa‘amanuia mai fo‘i e le ALI‘I i lo‘u ali‘i, ‘ia e manatu mai i lau ‘au‘auna fafine.”#Roma 12.19; Epe 10.30
32‘Ona fai atu lea o Tavita ‘iā Apikaila, “Fa‘afetai i le ALI‘I le Atua o Isaraelu, o lē na ‘auina mai oe i le aso nei e fa‘afetaia‘i ‘iā te a‘u. 33Fa‘afetai fo‘i i lou mafaufau, ma fa‘afetai ‘iā te oe, ‘ina ‘ua e tāofi ‘iā te a‘u i lenei aso, ‘ina ne‘i ‘ou alu e sasa‘a le toto, ma taui le leaga e lo‘u lava lima. 34E moni, o lo‘o soifua le ALI‘I le Atua o Isaraelu, lē na tāofi mai ‘iā te a‘u, ‘ina ‘ia ‘ou lē fai se mea leaga ‘iā te oe; auā ‘ana e le fa‘ata‘alise ‘ona sau e fa‘afetaia‘i ‘iā te a‘u, po ‘ua lē toe ‘iā Napalu i le malama a‘e o le taeao se tula‘i atu i se ‘aupā.”#Kene 20.6; Ruta 3.13; 1 Tu 14.10 35‘Ona talia lea e Tavita nai lona lima o mea ‘ua ia au mai ‘iā te ia; ‘ua fai atu fo‘i ‘iā te ia, “Alu a‘e ia oe ma le manuia i lou fale; fa‘auta, ‘ua ‘ou fa‘alogo i lau ‘upu, ‘ina ‘ou alofa ‘iā te oe.”
36‘Ona alu atu lea o Apikaila ‘iā Napalu; fa‘auta, ‘ua fai o ia le tausamiga i lona fale, pei o le tausamiga a se tupu; ‘ua fiafia fo‘i le loto o Napalu i totonu ‘iā te ia o lo‘o inu ia ‘ua ‘onā tele ai. ‘Ua ia le ta‘u atu ai ‘iā te ia se ‘upu itiiti, po o se ‘upu tele se‘i malama a‘e le taeao.#2 Samu 13.28 37‘Ua o‘o i le taeao, ‘ua mavae le ‘onā i le uaina ‘iā Napalu, ‘ona ta‘u atu ai lea e lana avā ‘iā te ia o nei mea uma; ‘ona oti ai lea o lona loto i totonu ‘iā te ia, ‘ua ‘avea o ia pei se ma‘a. 38Pe ‘atoa le sefulu o aso, ‘ona taia lea o Napalu e le ALI‘I; ‘ua oti ai.#1 Samu 26.10; 2 No 13.20; Galu 12.23
39‘Ua fa‘alogo Tavita ‘ua oti Napalu, ‘ona fai ane lea o ia, “Fa‘afetai i le ALI‘I, ‘ua ia taui atu i le agatele mai o Napalu, ma na tāofi i lana ‘au‘auna nai le leaga a ‘ua fa‘afo‘i atu e le ALI‘I le leaga o Napalu i lona lava ulu.”
‘Ua alu le fe‘au a Tavita e tautalatala ma Apikaila, ia fai māna avā. 40‘Ua o‘o atu ‘au‘auna a Tavita ‘iā Apikaila i Karamelu, ‘ona latou tautala atu lea ‘iā te ia, ‘ua fa‘apea atu, “‘Ua ‘a‘auina mai i matou e Tavita ‘iā te oe ‘ina ‘ia fai oe māna avā.”
41‘Ona tula‘i lea o ia, ‘ua ifo to‘ele ‘ua fai mai, “Fa‘auta i lau ‘au‘auna fafine, ‘ia fai ma ‘au‘auna e mulumulu i vae o ‘au‘auna a lo‘u ali‘i.”#Ruta 2.10 42‘Ua fa‘ata‘alise ‘ona tula‘i o Apikaila, ‘ua ti‘eti‘e i luga o le asini, ‘ua mulimuli fo‘i ‘iā te ia ona teine e to‘alima ‘ua ia mulimuli atu i ‘au‘auna a Tavita, ‘ona fai ai lea o ia māna avā.
43‘Ua fai avā fo‘i Tavita ‘iā Ainoama le Isereelu, ‘ua fai māna avā o i lā‘ua e to‘alua. 44A ‘ua foa‘i atu e Saulo lona afafine o Mekala le avā a Tavita ‘iā Paleti, le atali‘i o Laisa, o le Kali.#1 Samu 18.27; 2 Samu 3.13-16
Currently Selected:
1 Samuelu 25: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
