1 Samuelu 26
26
‘Ua Toe Fa‘asaoina Saulo e Tavita a o moe o Ia
1‘Ua ō atu tagata o Sifi ‘iā Saulo i Kipea, ‘ua fa‘apea atu, “E lē o lafi ‘ea Tavita i le mauga o Hakila i luma o Iesimoni?”#1 Samu 23.19 2‘Ona tula‘i lea o Saulo, ‘ua alu ifo i le vao o Sifi ‘ua ‘iā te ia fo‘i tagata o Isaraelu ē na filifilia e tolu gaafe, e sā‘ili ‘iā Tavita i le vao o Sifi. 3‘Ua tolauapi o Saulo i le mauga o Hakila, ‘ua i luma o Iesimoni i le ala; a o Tavita, ‘ua nofo o ia i le vao, ‘ua iloa e ia ‘ua mulimuli mai Saulo ‘iā te ia i le vao. 4‘Ua ‘a‘auina atu e Tavita ni matavao;#26.4 ni matavao: po o ni tagata sipai. ‘ua ia iloa ai, e moni lava ‘ua sau Saulo. 5‘Ona tula‘i atu lea o Tavita, ‘ua alu atu i le mea ‘ua tolauapi ai Saulo ‘ua va‘ai atu Tavita i le mea ‘ua ta‘oto ai Saulo, o Apineru fo‘i le atali‘i o Neru, le ali‘i e pule i ana ‘au ‘ua ta‘oto Saulo i le ‘olo, a o le nu‘u ‘ua tolauapi i latou e si‘osi‘o ai ‘iā te ia.#1 Samu 14.50; 17.20, 55
6‘Ona fai atu lea o Tavita, ‘ua fa‘apea atu ‘iā Aimeleka le sa Hetī, ma Apisai o le tama a Seruia, le uso o Ioapo, ‘ua fa‘apea, “O ai ‘ea na te ō ifo ma a‘u ‘iā Saulo i le togālauapi”
‘Ua fai mai Apisai, “O a‘u, tā te ō ifo ma oe.”
7‘Ona ō atu lea o Tavita ma Apisai i le nu‘u i le po; fa‘auta ‘iā Saulo ‘ua ta‘oto, o lo‘o moe i le ‘olo, ma lona tao ‘ua sunu‘i i le ‘ele‘ele i tafatafa o lona ulu; o Apineru fo‘i ma le nu‘u, o lo‘o ta‘o‘oto i latou e fa‘asi‘osi‘o ai ‘iā te ia.#1 Samu 26.16 8‘Ona fai mai lea o Apisai ‘iā Tavita, “‘Ua tu‘uina mai e le Atua i le po nei lē ‘ua ita ‘iā te oe; o lenei, se‘ia ou tutu‘i fa‘atasi ‘iā te ia i le tao e o‘o i le ‘ele‘ele, ‘ou te lē tutu‘i fa‘alua ‘iā te ia.”
9‘Ona fai atu lea o Tavita ‘iā Apisai, “‘Aua ‘e te fasioti ‘iā te ia; auā po o ai ‘ea na te fa‘ao‘o lona lima i lē ‘ua fa‘au‘uina e le ALI‘I, ‘ae lē nofo sala ai o ia?”#1 Samu 24.6, 10; 26.16, 23; 31.4; 2 Samu 1.16 10‘Ua fai atu fo‘i Tavita, “O lo‘o soifua le ALI‘I, e fasia lava o ia e le ALI‘I, pe a o‘o i ona aso e oti ai, pe alu ifo i se tau‘a e fano ai. 11‘Ia fa‘amamao e le ALI‘I ‘iā te a‘u, ‘ina ne‘i fa‘ao‘o lo‘u lima i lē ‘ua fa‘au‘uina e le ALI‘I, a ‘ia e tago i le tao o lo‘o i tafatafa o lona ulu ma le fagu vai, i le tā ō ai i tā‘ua.”#1 Samu 24.6 12‘Ua ‘ave e Tavita le tao ma le fagu vai sa i tafatafa o le ulu o Saulo, ‘ona ō lea o i lā‘ua ‘ua lē va‘ai mai se tasi, ‘ua leai sē iloa, ‘ua leai fo‘i sē ala, auā ‘ua momoe i latou uma, ‘ona o le moe gase mai i le ALI‘I ‘ua o‘o ‘iā te i latou.#Kene 2.21; 15.12; Iopu 4.13
13‘Ona alu ane ai lea o Tavita i le tasi itū, ‘ua tu i le tumutumu o le mauga, e mamao atu, e telē se mea ‘ua vā a‘i i latou. 14‘Ona vala‘au ai lea o Tavita i le nu‘u ‘atoa ma Apineru le atali‘i o Neru, ‘ua fa‘apea, “‘E te lē tali mai ‘ea, Apineru?”
‘Ua tali mai Apineru, ‘ua fa‘apea mai, “O ai ‘ea oe, ‘e te vala‘au ai i le tupu.”
15‘Ona fai atu lea o Tavita ‘iā Apineru, “‘E te lē se toa, ‘ea oe? O ai se lua te tusa ma oe i Isaraelu o le a le mea ‘e te lē leoleo ai lou ali‘i le tupu? Auā na alu atu le tasi tagata e fasioti i lou ali‘i le tupu. 16E lē lelei lenei mea ‘ua e faia; o lo‘o soifua le ALI‘I, o tagata e tatau ‘ona oti ‘outou, auā na ‘outou lē leoleo i lo ‘outou ali‘i lē ‘ua fa‘au‘uina e le ALI‘I. O lenei fo‘i, ‘inā iloilo po o fea le tao o le tupu, ma le fagu vai sa i tafatafa o lona ao.”#1 Samu 26.7, 11; 2 Samu 12.5; 1 Tu 2.26
17‘Ua iloa e Saulo le leo o Tavita, ‘ona fai mai lea o ia, “O lou leo ‘ea lea, lo‘u atali‘i e Tavita.”
‘Ua fai atu Tavita, “o lo‘u leo lava, lo‘u ali‘i e le tupu.” 18‘Ua fai atu fo‘i, “O le a ‘ea lenei, lo‘u ali‘i e, ‘ina ‘ua e tulituliloa mai i lau ‘au‘auna auā se a se mea ‘ua ‘ou faia? po o le a ‘ea le leaga o lo‘o ‘iā te a‘u?#1 Samu 24.9, 11 19O lenei, ‘ia fa‘afofoga mai lo‘u ali‘i e le tupu, i ‘upu a lau ‘au‘auna ‘āfai ‘ua ului atu oe e le ALI‘I ‘iā te a‘u, ‘ia fa‘alauleleiina lona finagalo i se taulaga; ‘ae ‘āfai o tagata, ‘ia malaia i latou mai luma o le ALI‘I, auā ‘ua latou tuli ‘ese ‘iā te a‘u i nei ona po, ‘ina ‘ia a‘u le fa‘atasi atu i le tofi o le ALI‘I, o lo‘o fa‘apea mai i latou, ‘Alu ia, ‘inā ‘au‘auna i atua ‘ese.’ 20O lenei, ‘aua ne‘i masa‘a ifo lo‘u toto i le ‘ele‘ele i luma o le ALI‘I; auā ‘ua maliu mai le tupu o Isaraelu e sā‘ili se ‘utu fiti, peiseaī ‘ua tuli e se tasi le koli i mauga.”
21‘Ona fai mai lea o Saulo, “‘Ua ‘ou agasala; ‘inā fo‘i mai ia, lo‘u atali‘i o Tavita, auā ‘ou te lē toe agaleaga ‘iā te oe, auā ‘ua e fa‘apelepeleina lo‘u ola i lenei po; fa‘auta, ‘ua ‘ou amio fa‘avalea, ma ‘ou sesē tele lava.”#1 Samu 15.24; 24.17-18
22‘Ona tali atu lea o Tavita, ‘ua fa‘apea atu, “Fa‘auta, o le tao o le tupu, ‘ia sau se taule‘ale‘a na te avatu ai. 23A o le ALI‘I na te taui atu i tagata ta‘itasi i lana amiotonu ma lona fa‘amaoni; auā na tu‘uina mai oe e le ALI‘I ‘iā te a‘u i lenei po, a ‘ua ‘ou lē mafai ‘ona fa‘ao‘o lo‘u lima i lē ‘ua fa‘au‘uina e le ALI‘I.#1 Samu 26.9; Sala 7.8; 18.20 24Fa‘auta, pei ‘ona fa‘apelepeleina lou ola i lenei po e a‘u, ‘ia fa‘apea ‘ona fa‘apelepeleina lo‘u ola e le ALI‘I, ma ‘ia lavea‘i ‘iā te a‘u a‘i puapuagā uma.”
25‘Ona fai mai lea o Saulo ‘iā Tavita, “‘Ia manuia oe lo‘u atali‘i e Tavita, ‘e te faia e oe mea e sili, ‘ua e mālō pea lava.”
‘Ona alu ai lea o Tavita i lona ala, ‘ae fo‘i Saulo i le mea e nofo ai o ia.#1 Samu 24.20
Currently Selected:
1 Samuelu 26: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
