1 Samuelu 24
24
‘Ua Fa‘asaoina Saulo e Tavita i le ana i Enokati
1‘Ua fo‘i mai Saulo ‘ina ‘ua tulia Filisitia, ‘ona ta‘u atu ai lea ‘iā te ia, ‘ua fa‘apea atu, “Fa‘auta ‘iā Tavita, o lo‘o i le vao o Enokati.”#1 Samu 23.28 2‘Ona ‘ave lea e Saulo tagata o tolu afe ‘ua filifilia nai Isaraelu uma, ‘ua alu atu e sā‘ili ‘iā Tavita ma ona tagata i papa o ‘oti o le vao. 3‘Ua o‘o atu i lotoā o mamoe i le ala, ‘ua i ai le ana, ‘ona ulu atu ai lea o Saulo e ufiufi i ona vae, a o lo‘o nonofo Tavita ma ona tagata i le muliana.#Fa‘ama 3.24 4‘Ona fai mai lea o tagata o Tavita ‘iā te ia, “Fa‘auta, o le aso lenei na fetalai ai le ALI‘I ‘iā te oe, ‘Fa‘auta, ‘ou te tu‘u atu lē ‘ua ita ‘iā te oe i lou lima, ‘e te faia ‘iā te ia pei ‘ona e loto i ai.’” ‘Ona tula‘i lea o Tavita, ‘ua ia sesele ‘ese lemū le pito ‘ofu o Saulo. 5E mulimuli ane ‘ua tuia o le loto o Tavita ‘iā te ia, ‘ina ‘ua ia sesele ‘ese le pito ‘ofu o Saulo.#2 Samu 12.3; 1 Samu 26.9, 11 6‘Ua fai atu fo‘i o ia i ona tagata, “‘Ia fa‘amamao e le ALI‘I ‘iā te a‘u ‘ona ‘ou faia lenā mea i lo‘u ali‘i, lē ‘ua fa‘au‘uina e le ALI‘I, e fa‘ao‘o ai lo‘u lima ‘iā te ia, auā o ia ‘ua fa‘au‘uina e le ALI‘I.” 7‘Ua tāofi e Tavita i ona tagata i nei ‘upu; ma na lē tu‘u atu i latou e laga atu ‘iā Saulo; ‘ua tula‘i atu Saulo i le ana, ‘ua alu atu i lona ala.#Mata 5.44; Roma 12.17
8E mulimuli ane ‘ona tula‘i lea o Tavita, ‘ua alu atu nai le ana, ‘ua vala‘au atu ‘iā Saulo, o lo‘o fa‘apea, “Lo‘u ali‘i e, le tupu.” ‘Ua tepa mai Saulo i ona tua, ‘ona punou lea o Tavita i lalo i le ‘ele‘ele ma ifo atu i ai. 9‘Ona fai atu lea o Tavita ‘iā Saulo, “O le a le mea ‘ua e fa‘afofoga ai i ‘upu a tagata, ‘ua fa‘apea, ‘Fa‘auta ‘iā Tavita, o lo‘o sā‘ili e agaleaga ‘iā te oe.’#1 Samu 27.8 10Fa‘auta, o le aso nei ‘ua e silafia e ou lava fofoga, na tu‘uina mai oe e le ALI‘I i le aso nei i lo‘u lima i le ana, na fai mai fo‘i le tasi ‘ou te fasioti ‘iā te oe; a ‘ua ‘ou alofa ‘iā te oe, ‘ina a‘u fai atu, ‘‘Ou te lē fa‘ao‘o lo‘u lima i lo‘u ali‘i, auā o lē na fa‘au‘uina e le ALI‘I.’ 11Lo‘u tamā e, ‘ia e silasila mai fo‘i i lou pito ‘ofu i lo‘u lima, auā o lo‘u sesele ‘ese i lou pito ‘ofu, a ‘ua ‘ou lē fasi ‘iā te oe, ‘ia e iloa ai, ma e silafia, ‘ua leai se leaga, po o se fouvale ‘iā te a‘u, ma a‘u le agaleaga ‘iā te oe; a o oe, o lo‘o e lamalama ‘ia ‘ou oti ‘iā te oe.#1 Samu 24.4; 2 Samu 1.14 12‘Ia fa‘amasino e le ALI‘I ‘iā te i tā‘ua nei ma oe, ‘ina ‘ia taui atu e le ALI‘I ‘iā te oe ‘ona o a‘u; a o lo‘u lima, e lē o‘o lea ‘iā te oe. 13Pei ‘ona fai mai le ‘upu o le muāgagana mai anamua, ‘E tupu mai le amioleaga i ē amioleaga;’ ‘ae lē o‘o lo‘u lima ‘iā te oe. 14‘Ua maliu mai le tupu o Isaraelu e mulimuli mai ‘iā te ai? ‘E te tulituliloa mai ‘iā te ai? E mulimuli mai i le uli mate; e mulimuli mai i le ‘utu fiti.#1 Samu 26.20; 2 Samu 9.8 15‘Ia fai ma fa‘amasino le ALI‘I ma ‘ia fa‘amasino ‘iā te i tā‘ua ma oe, ma ‘ia silasila mai ma fa‘atonu mai a‘u mea, ma ‘ia lavea‘i mai ‘iā te a‘u a‘i lou lima.”
16‘Ua fa‘auma e Tavita ‘ona tautala i nei ‘upu ‘iā Saulo, ‘ona fai mai lea o Saulo, “O lou leo ‘ea lea, lo‘u atali‘i e Tavita?” ‘Ona tagi ai lea o Saulo ‘ua leo tele.#1 Samu 26.17 17‘Ua fai mai fo‘i o ia ‘iā Tavita, “‘Ua sili lau amiotonu i la‘u, auā ‘ua e taui mai ‘iā te a‘u i le lelei; a o a‘u, ‘ua ‘ou taui atu ‘iā te oe i le leaga. 18‘Ua e fa‘aali mai i le aso i le lelei ‘ua e faia mai ‘iā te a‘u; auā na tu‘uina a‘u e le ALI‘I i lou lima, a ‘ua e lē fasi ‘iā te a‘u; 19‘āfai e maua le tagata e lona fili, e tu‘u atu ‘ea ‘iā te ia e alu ma le lelei? ‘Ia taui atu e le ALI‘I le lelei ‘iā te oe, ‘ona o le mea ‘ua e faia ‘iā te a‘u i lenei aso.#Mata 5.43-44 20O lenei, fa‘auta, ‘ua ‘ou iloa e fai lava oe ma tupu; e fa‘atumauina le mālō o Isaraelu ‘iā te oe. 21O lenei, ‘ia e tautō mai ‘iā te a‘u i le ALI‘I, ‘e te lē fa‘auma la‘u fānau pe a mavae atu a‘u, ma e lē tinei lo‘u igoa i le ‘āiga o lo‘u tamā.” 22‘Ua tautō Tavita ‘iā Saulo, ‘ona alu ai lea o Saulo i lona fale; ‘ua ō a‘e fo‘i Tavita ma ona tagata i le ‘olo mauga.#1 Samu 23.29
Currently Selected:
1 Samuelu 24: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
