1 Tupu 16
16
O Paasa le Tupu o Isaraelu
1‘Ona tulei mai lea o le afioga a le ALI‘I ‘iā Ieu le atali‘i o Hanani ‘iā Paasa, ‘ua fa‘apea mai,#2 No 16.7; 19.2 2“Na ‘ou fa‘aeaina oe mai le ‘ele‘ele ma ‘ou tofia oe e fai ma ta‘ita‘i i lo‘u nu‘u o Isaraelu; a ‘ua e savali i le ala o Ierepoamo ma ‘ua e fa‘atupu ai le agasala i lo‘u nu‘u o Isaraelu, e fa‘a‘ono‘ono mai ai ‘iā te a‘u i latou agasala. 3Fa‘auta, o le mea lea ‘ou te ‘ave ‘ese ai le gafa o Paasa ma le gafa o lona ‘āiga; ‘ou te faia fo‘i lou ‘āiga ‘ia pei o le ‘āiga o Ierepoamo le atali‘i o Nepata.#1 Tu 14.10; 15.29; 16.11 4O so sa Paasā e oti i le ‘a‘ai e ‘aina lea e ulī o sona tagata e oti i le vao e ‘aina lea e manu felelei.”
5O toe o mea na faia e Paasa ma mea na ia faia, ma lona fitafita, e le‘i tusia ‘ea ia i le tusi o tala i nofoa‘iga a tupu o Isaraelu. 6‘Ona ta‘oto ai lea o Paasa fa‘atasi ma ona tamā, ‘ua tanumia fo‘i o ia i Tiresa; ‘ona soloa‘i ane lea o Ele lona atali‘i e fai ma tupu.#1 Tu 15.21
7O Ieu fo‘i le perofeta, o le atali‘i o Hanani, na o‘o mai ai le afioga a le ALI‘I ‘iā Paasa ma lona ‘āiga; ‘ona o mea leaga uma na ia faia i luma o le ALI‘I, i lona fa‘a‘ono‘ono atu ‘iā te ia i galuega a ona lima, ‘ina ‘ua fa‘apei o le ‘āiga o Ierepoamo o ia; ‘ina ‘ua na fasioti fo‘i ‘iā te ia.#1 Tu 15.27, 29; 2 No 19.2; Hose 1.4
O Ele le Tupu o Isaraelu
8O le luafulu ma le ono o tausaga o Asa le tupu o Iuta na fai ai Ele le atali‘i o Paasa ma tupu i Isaraelu i Tiresa, i tausaga e lua. 9Na fōua fo‘i o ia e lana ‘au‘auna o Semeri, o lē pule i le vaeluagalemū o ona kariota, a o i Tiresa o ia o inu ia ‘ia ‘onā i le fale o Arasa o lē na pule i lona ‘āiga i Tiresa. 10‘Ua ulufale atu Semeri ma na taia ma fasioti ‘iā te ia, i le luafulu ma le fitu o tausaga o Asa le tupu o Iuta; ‘ona fai ai lea o ia ma tupu e sui a‘i o ia.#2 Tu 9.31
11‘Ua fai o ia ma tupu ma ‘ua ti‘eti‘e o ia i lona nofoāli‘i, ‘ona fasiotia lea e ia o le ‘āiga uma o Paasa; ‘ua ia le fa‘atoeina ‘iā te ia sē tula‘i atu i se ‘aupā, po o sona ‘āiga, po o sana uō.#1 Samu 25.22; 1 Tu 16.3 12‘Ua fa‘aumatia lava e Semeri le ‘āiga o Paasa, e tusa ma le afioga a le ALI‘I ‘ua ia fetalai mai ai ‘iā Paasa na ‘aumaia e Ieu le perofeta,#1 Tu 16.1, 3 13‘ona o agasala uma a Paasa ma agasala a Ele lona atali‘i na la agasala ai ma fa‘atupuina ai le agasala ‘iā Isaraelu, i lo latou fa‘a‘ono‘ono i le ALI‘I le Atua o Isaraelu ‘iā latou mea fa‘atauva‘a.#Teu 32.21; 1 Tu 16.26 14O toe o mea na faia e Ele ma mea uma na ia faia, e le‘i tusia ‘ea ia i le tusi o tala i nofoa‘iga a tupu o Isaraelu?
O Semeri le Tupu o Isaraelu
15O le luafulu ma le fitu o tausaga o Asa le tupu o Iuta na fai ai Semeri ma tupu i aso e fitu i Tiresa. ‘Ua si‘i le tau‘a e le nu‘u i Kipetonu, o le ‘a‘ai o Filisitia lea.#1 Tu 15.27 16‘Ua fa‘alogo fo‘i le nu‘u i le toagalauapi i le tala, “‘Ua fouvale Semeri, ‘ua fasiotia fo‘i e ia le tupu;” ‘ona tofia ai lea e Isaraelu uma o Omeri, o le pule i ‘au, e fai ma tupu o Isaraelu i lea aso i le toagalauapi. 17‘Ona ō a‘e ai lea o Omeri ma Isaraelu uma fa‘atasi ma ia ai Kipetonu ma latou vagaia Tiresa. 18‘Ua iloa fo‘i e Semeri ‘ua maua le ‘a‘ai; ‘ona alu lea o ia i le ‘olo i le fale o le tupu ma na fa‘amūina le fale o le tupu i le afi i ona luga, ‘ua oti ai o ia,#2 Samu 17.23 19‘ona o ana agasala na ia agasala ai i lona fai mea leaga i luma o le ALI‘I ma lona savali i le ala o Ierepoamo ma lana agasala na ia faia e fa‘aagasala ‘iā Isaraelu. 20O toe o mea na faia e Semeri ma lona fouvale na ia fouvale ai, e le‘i tusia ‘ea ia i le tusi o tala i nofoa‘iga a tupu o Isaraelu?
O Omeri le Tupu o Isaraelu
21‘Ona vaeluaina lea o le nu‘u o Isaraelu; ‘ua mulimuli atu le tasi vaega o le nu‘u ‘iā Tipeni le atali‘i o Kinati e fai o ia mo latou tupu; ‘ae mulimuli atu le isi vaega ‘iā Omeri. 22A ‘ua manumālō le nu‘u na mulimuli atu ‘iā Omeri, i le nu‘u na mulimuli atu ‘iā Tipeni le atali‘i o Kinati; ‘ona oti lea o Tipeni, ‘ae fai Omeri ma tupu. 23O le tolu sefulu ma le tasi o tausaga o Asa le tupu o Iuta, na fai ai Omeri ma tupu o Isaraelu; e sefulu ma le lua tausaga o lana nofoa‘iga; e ono tausaga na fai ai o ia ma tupu i Tiresa. 24Na fa‘atau e ia le mauga o Samaria mai ‘iā Semeri i ario e lua taleni; ‘ua faia fo‘i e ia le ‘a‘ai i le mauga, na fa‘aigoa fo‘i e ia le ‘a‘ai ‘ua ia faia i le igoa o Semeri, o ali‘i e ona le mauga, o Samaria.
25A ‘ua amio leaga Omeri i luma o le ALI‘I; ‘ua sili ‘ona leaga o ia ‘iā te i latou uma na muamua ‘iā te ia.#Mika 6.16 26Auā na ia savali i le ala uma o Ierepoamo le atali‘i o Nepata ma lana agasala na ia fa‘atupu ai le agasala ‘iā Isaraelu i lo latou fa‘a‘ono‘ono atu i le ALI‘I le Atua o Isaraelu ‘iā latou mea fa‘atauva‘a. 27O toe o mea na faia e Omeri ma lona fitafita sa fai, e le‘i tusia ‘ea ia i le tusi o tala i nofoa‘iga a tupu o Isaraelu? 28‘Ona ta‘oto lea o Omeri fa‘atasi ma ona tamā, ‘ua tanumia fo‘i o ia i Samaria; ‘ona soloa‘i ane lea o Aapo lona atali‘i e fai ma tupu.
O Aapo le Tupu o Isaraelu
29O le tolu o sefulu ma le valu o tausaga o Asa le tupu o Iuta na fai ai Aapo le atali‘i o Omeri ma tupu o Isaraelu; ‘ua fai fo‘i Aapo le atali‘i o Omeri ma tupu o Isaraelu i Samaria i tausaga e luafulu ma le lua. 30‘Ua sili ‘ona amio leaga o Aapo le atali‘i o Omeri i luma o le ALI‘I ‘iā te i latou uma na muamua ‘iā te ia.#1 Tu 21.25 31‘Ua se mea māmā ‘iā te ia ‘ona savali i agasala a Ierepoamo le atali‘i o Nepata, a ‘ua ia fai avā ‘iā Iesepela le afafine o Etepaala le tupu o sa Saitonū, ‘ua alu fo‘i o ia ma ‘au‘auna ‘iā Paala ma ifo i ai.#Eso 34.16; Teu 7.3; 1 Tu 21.25-26; 2 Tu 10.18 32‘Ua ia fa‘atū fo‘i le fatafaitaulaga ‘iā Paala i le fale o Paala na ia faia i Samaria.#2 Tu 10.21, 26, 27 33‘Ua faia fo‘i e Aapo le tupua o Asaira; ‘ua sili lava mea na faia e Aapo e fa‘a‘ono‘ono ai i le ALI‘I le Atua o Isaraelu i tupu uma o Isaraelu na muamua ‘iā te ia.#Eso 34.13; 1 Tu 16.25; 18.19; 21.25; 2 Tu 21.3 34O lana nofoa‘iga na fai ai Ieriko e Ieli le Peteli; na fa‘avaeina e ia ‘iā Apiramo lana ulumatua, na fa‘atūina fo‘i e ia ona puipui ‘iā Sekupo lana ui‘i, e tusa ma le afioga a le ALI‘I na ia fetalai mai ai na ‘aumaia e Iosua le atali‘i o Nuno.#Iosu 6.26; 2 Samu 10.5
Currently Selected:
1 Tupu 16: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
