1 Tupu 15
15
O Aviama le Tupu o Iuta
(2 No 13.1—14.1)
1O le sefulu ma le valu o tausaga o le tupu o Ierepoamo le atali‘i o Nepata, na fai ai Aviama#15.1 Aviama: O nisi fa‘aliliuga; o Avia. ma tupu o Iuta. 2E tolu tausaga na fai ai o ia ma tupu i Ierusalema. O le igoa o lona tinā o Maaka le afafine o Apisaloma. 3Na savali o ia i agasala uma a lona tamā na ia faia e muamua ‘iā te ia; ‘ua lē ‘ato‘atoa lona loto i le ALI‘I lona Atua, e pei o le loto o lona tamā o Tavita.#1 Tu 11.4 4‘Ae peita‘i ‘ona o Tavita ‘ua foa‘iina e le ALI‘I lona Atua ‘iā te ia o le lamepa i Ierusalema, i le fa‘atūina o lona atali‘i ‘ina ‘ua mavae atu o ia ma le fa‘atumauina o Ierusalema.#1 Tu 11.36 5Auā na faia e Tavita o mea e tusa i luma o le ALI‘I, na ia le liliu ‘ese i se mea e tasi na ia fetalai mai ai ‘iā te ia, i aso uma lava o lona ola, ‘ua na o le mea na ia faia ‘iā Uria le sa Hetī.#2 Samu 11.1-27; 1 Tu 9.4; 14.8 6‘Ua utu tau Reopoamo ma Ierepoamo i tausaga uma o lona ola. 7O toe o mea na faia e Aviama ma mea uma na ia faia, e le‘i tusia ‘ea i le tusi o tala i nofoa‘iga a tupu o Iuta? Na utu tau fo‘i Aviama ma Ierepoamo.#2 No 13.2-22
8‘Ua ta‘oto Aviama fa‘atasi ma ona tamā, ‘ua latou tanu fo‘i ‘iā te ia i le ‘a‘ai a Tavita; ‘ona soloa‘i ane lea o Asa lona atali‘i e fai ma tupu.#2 No 14.1; Mata 1.7
O Asa le Tupu o Iuta
(2 No 15.16—16.6)
9O le lua sefulu o tausaga o Ierepoamo le tupu o Isaraelu na fai ai Asa ma tupu o Iuta. 10E fagafulu ma le tasi o tausaga na fai ai o ia ma tupu i Ierusalema. O le igoa fo‘i o lona tinā o Maaka le afafine o Apisaloma. 11‘Ua amiotonu fo‘i Asa i luma o le ALI‘I, e pei o Tavita lona tamā.#2 No 14.2 12‘Ua ‘ave ‘ese e ia tagata fa‘asotoma i le nu‘u, ma na ‘ave‘esea tupua uma na faia e ona tamā. 13O Maaka fo‘i lona tinā, ‘ua ia ‘ave‘esea o ia ‘ia lē fai o ia ma sa‘o tama‘ita‘i, auā na ia faia le tupua o Asaira; ‘ua ta i lalo e Asa o lana tupua ma susunuina i le alia o Ketarono.#2 No 15.16-18 14‘Ae le‘i ‘ave‘esea o mea maualuluga; a o le loto o Asa na ‘ato‘atoa lea i le ALI‘I i ona aso uma. 15‘Ua ‘aumai fo‘i e ia i le fale o le ALI‘I o mea na fa‘asāina e lona tamā ma mea fo‘i na fa‘asāina e ia, o ario ma auro ma ipu.
16Na utu tau Asa ma Paasa le tupu o Isaraelu i o la aso uma.#1 Tu 15.32 17‘Ona alu a‘e ai lea o Paasa le tupu o Isaraelu i Iuta, ‘ua ia faia fo‘i Rama, ‘ina ‘ia lē mafai ai se tasi ‘ona sau pe alu atu ‘iā Asa le tupu o Iuta. 18‘Ona ‘ave lea e Asa o le ario ma le auro uma ‘ua totoe i ‘oloa o le fale o le ALI‘I ma ‘oloa o le fale o le tupu, ‘ua avatu a‘i i lima o ana ‘au‘auna; ‘ua avatua fo‘i e le tupu o Asa ‘iā Peniata le atali‘i o Taperimoni le atali‘i o Hesiona, le tupu o Suria, o lē sa nofo i Tamaseko, ‘ua fa‘apea atu,#1 Tu 14.26; 2 Tu 12.18 19“O lo‘o ‘iā te i tā‘ua le feagaiga ma oe, o lo‘u tamā fo‘i ma lou tamā; fa‘auta, ‘ua ‘ou avatu ‘iā te oe mea alofa, o ario ma auro; ‘ina e maliu mai ia ma tatala la ‘oulua feagaiga ma Paasa le tupu o Isaraelu, ‘ina ‘ia alu ‘ese ia ‘iā te a‘u.”#2 No 16.7
20‘Ona fa‘alogo lea o Peniata i le tupu o Asa ma ia ‘a‘auina atu i ‘a‘ai o Isaraelu o ē ‘avea ‘au sa ‘iā te ia ma na fafasi i Iono ma Tanu ma Apela Petemaaka, ma Kinereta uma, i le ma le nu‘u uma o Nafatali.#Iosu 11.2; Fa‘ama 18.29; 2 Samu 20.14; 2 Tu 15.29 21‘Ua fa‘alogo ai Paasa, ‘ona tu‘ua lea e ia ‘ona fai o Rama; ‘ua nofo fo‘i o ia i Tiresa.
22‘Ona tala‘i atu ai lea e le tupu o Asa ‘iā Iuta uma, ‘ua lē tu‘u sa‘oloto se to‘atasi; ‘ona latou ‘ave ‘ese lea o ma‘a o Rama ma ona la‘au na fai ai le galuega e Paasa, a ‘ua fai a‘i e le tupu o Asa o Kipea i Peniamina ma Mesepa.
23O toe o mea uma na faia e Asa ma lona fitafita uma ma mea uma na ia faia ma ‘a‘ai na ia faia, ‘ua lē tusia ‘ea ia i le tusi o tala i nofoa‘iga a tupu o Iuta? A ‘ua o‘o ‘ina toeaina, ‘ona ma‘i ai lea o ia i ona vae.#2 No 16.11-14 24‘Ua ta‘oto Asa fa‘atasi ma ona tamā, ‘ua tanumia fo‘i o ia fa‘atasi ma ona tamā i le ‘a‘ai a Tavita lona tamā; ‘ona soloa‘i ane lea o Iosefatu lona atali‘i e fai ma tupu.
O Natapu le Tupu o Isaraelu
25O le lua o tausaga o Asa le tupu o Iuta, na fai ai Natapu le atali‘i o Ierepoamo ma tupu o Isaraelu, e lua tausaga na fai ai o ia ma tupu ‘iā Isaraelu.#1 Tu 14.20 26‘Ua amio leaga fo‘i o ia i luma o le ALI‘I, ‘ua ia savali fo‘i i le ala o lona tamā ma lana agasala na ia fa‘atupuina ai le agasala ‘iā Isaraelu.
27‘Ua fōua o ia e Paasa le atali‘i o Akia o le ‘āiga o Isakara; ‘ua fasia fo‘i o ia e Paasa i Kipetonu o le ‘a‘ai a Filisitia; auā na vagaia Kipetonu e Natapu ma Isaraelu uma.#Iosu 19.44; 21.23; 1 Tu 14.14; 16.15 28‘Ua fasiotia o ia e Paasa i le tolu o tausaga o Asa le tupu o Iuta; ‘ua fai fo‘i o ia ma tupu e sui a‘i o ia. 29‘Ua fai o ia ma tupu, ‘ona ia fasiotia lea o le ‘āiga uma o Ierepoamo; ‘ua ia le fa‘atoeina se tasi tagata ola ‘iā Ierepoamo, a ‘ua fa‘aumatia lava, e tusa ma le afioga a le ALI‘I na ia fetalai mai ai na ‘aumaia e lana ‘au‘auna o Akia o le Sailo,#1 Tu 14.10 30‘ona o agasala a Ierepoamo na ia faia ma agasala fo‘i a Isaraelu na ia fa‘atupuina i lona fa‘a‘ono‘ono na ia fa‘a‘ono‘ono ai i le ALI‘I le Atua o Isaraelu.#1 Tu 12.30; 14.16
31O toe o mea na faia e Natapu ma mea uma na ia faia, e le‘i tusia ‘ea ia i le tusi o tala i nofoa‘iga a tupu o Isaraelu? 32Na utu tau Asa ma Paasa le tupu o Isaraelu i o la aso uma.#1 Tu 15.16
O Paasa le Tupu o Isaraelu
33O le tolu o tausaga o Asa le tupu o Iuta ‘ua fai ai Paasa le atali‘i o Akia ma tupu o Isaraelu uma i Tiresa; e lua sefulu ma le fa tausaga o lana nofoa‘iga. 34‘Ua amio leaga ia i luma o le ALI‘I, ‘ua ia savali fo‘i i le ala o Ierepoamo ma lana agasala na ia fa‘atupuina ai le agasala ‘iā Isaraelu.
Currently Selected:
1 Tupu 15: RSCB
Highlight
Copy
Compare
Share
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
