Rut 2
2
Rut Puasa nuṉke̱n takakmasma
1Nui̱ Nuimí aishri̱ Irimirík shuar, Puas náartin, ti páantin pujumiayi. 2Nuyá̱ Muápnumia̱ nuwa̱ Rut Nuimin chicharuk “Wait aneasam tsaṉkatrukta. Sewata juwinia ai̱ wena uku nemasan wekakui waitnentruiniakka núkap ikiurtukiarainti. Nuna juurmaktaj” takui̱ tsatsarí̱ chicharuk “Ayu makú, wetá” tímiayi. 3Tutai Rutcha wémiayi. Tura aya aneachma Irimiríkia shuari̱ Puasa nuṉke̱n jeamiayi. Tura sewatan juu juwiniak akakeamun juurmaktaj tusa nisha uku pujursamiayi. 4Nuyá̱ Puas Piriṉnumia̱ támiayi. Tura sewatan juu juwiniak pujuinian chicharainiak “¡Uunt Yus atumín pujurtamsarti!” Tuíniam nisha chichainiak “¡Amincha Uunt Yus shiir awajtámsati!” tiármiayi. 5Nuyá̱ Puas ni takarniúri̱ sewata juu úuntri̱n anintrak “¿Ju̱sha yana nawantrimpiait?” 6Tutai ni takarniúri̱ sewata juu uuntri̱ chichaak “Muápnumia̱ Nuimiji̱a̱i̱ tama nú nuwa̱iti. 7Tura ‘Wisha sewatan juu juwiniamunam uku nemasan sewata juurmaktaj’ túrutkui tsaṉkatkájai tura káshik takakmasmak je̱a̱ṉka peṉké ishichik ayamar yamaisha tuke takakmawai” tímiayi.
8Tutai Puas Rútan chicharuk “Nawantru antukta. Ju̱yá̱ weme chikichniumka takakmauwaip. Antsu winia takartin nuwa̱ pujuinia ju̱ja̱i̱ juaktá. 9Sewata juu ainia nu tui̱ takakmainia nui̱ nemasta Winia takartin ainia ju̱na chicharainiakun itit awajsairap tiarjai tura kitiamakmesha winia takartin ichiṉnanam entsa áimpramu pujuinia nuyá̱ umarta” tímiayi. 10Tutai Rutcha nuṉká tikishmar tsuntsumpruá chicharuk “¿Urukamtai chíkich nuṉkanmaya̱ nuwa̱ ai̱sha imiá péṉkersha waitnentrurum?” tímiayi. 11Takui̱ Puas aya̱k “Warí áishrum jakamia tímianaiṉ ame tsatsaram péṉker túraitmena nuna ántsaṉ apasha nukusha nuyá̱ nuṉkemsha ikiukim nékashtai̱ shuarnum táwitmena nuna mash ujatkarai. 12Tura Israer shuara Uunt Yusri̱ ayamprútmaktinium weanka asakmin ame ashí péṉker túramurmin Uunt Yus patatrámas akirmákti” tímiayi. 13Nuyá̱ Rut chichaak “Uuntru, wikia ame takarniúrmechu ai̱ṉ ti waitnentrusam chichartukumna nuja̱i̱ ti shiir enentáimtikrurume” tímiayi. 14Tura yurumátin jeamtai Puas Rútan chicharuk “Ju̱i̱ winia takartintruja̱i̱ iruntram yurumkum paṉ churuinnium ayakam yuitiá” tímiayi. Tutai Rutcha irunar pujuarmia nui̱ pujusmatai Puas sewata nuíkman susamiayi. Túram yurumá nútsur ampirmiayi. 15Nuyá̱ ataksha Rut sewata juwak wekái̱ Puas ni takarniúri̱n chicharainiak “Yamaikia sewata neré̱ kákekan tura tsupirar irumpramunmaya̱ncha juurmakti. Iniatsá̱rairap. 16Antsu átum juwarmena nuyá̱ nisha juurmakat tusarum akankarum aepruktiarum. Nuna túrakuisha áitkiawaip tiirap” tímiayi.
17Rutcha, Puasa sewatari̱n juwá juwakua ki̱arai̱ umirmiayi. Tura pakara nekapmamka painti jeá íniaṉkasaṉ júukmiayi. 18Tura umik sewatan entsakí̱ péprunam waketkimiayi. Nui̱ jeá ni tsatsarí̱n ju̱na juukjai tusa iniaktusmiayi. Nútiksaṉ yurumá ejemara ampirmancha susamiayi. 19Túram ni tsatsarí̱ chicharuk “¿Yainia takakmasmea sewatasha júukum? Maa, waitnentrampra asakmin ti shiir yúmiṉkiajai” takui̱ Rut tsatsarí̱n chicharuk “Kame ni náari̱ṉkia Puásaiti nui̱ takakmasjai” tímiayi. 20Tutai Nuimisha ni najati̱n chicharuk “Kame nincha Uunt Yus yaiṉkti. Iwiaakutincha áintsaṉ jákaru ainia nunasha waitnenniuiti. Núnisaṉ nu áishmaṉsha íi shuaraiti. Tuma asa iincha ayamprutmakminiaitji” tímiayi. 21Tutai Muápnumia̱ nuwa̱ Rut chichaak “Nu arantcha chichartak ‘Winia takartin ainia nuja̱i̱ iruntram sewata júuktin amuumam takakmasta’ túrutui” tímiayi. 22Tutai Nuimisha ni najati̱n Rútan chicharuk “Winia nawantru, núnaka tí peṉker túramui. Ni takarin nuwa̱ ainia nuja̱i̱ métek takakmasta. Antsu chikichniumka weep itit awajtámiara̱i̱ṉ” tímiayi. 23Tura sewataja̱i̱ trikiu júukar amuumam Puasa takarniúri̱ nuwa̱ takaarmia nui̱ uku pataas juurmamiayi. Túrasha tsatsari̱i̱n pujusaṉ takakmamiayi.
©2009 Avant Ministries in cooperation with Wycliffe Bible Translators, Inc. All rights reserved.