Rut 3
3
Rut Puásan yáintkiata timia
1Nuyá̱ chíkich tsawantin Nuimí najati̱n chicharuk “Nawantru, nuatnaikiam shiir pujusai tusan ¿áishmaṉkan e̱a̱tkachminkiaitjiam? 2Kame Puasai̱ ni takarniúri̱ji̱a̱i̱ iruntra takakmasmamna nuka íi shuarchakait. Nisha ju̱ kashi sewata irumtai̱niam saepe̱n pakarman awa̱jtiuttawai. 3Tuma asamtai maim péṉker iwiarmampram kuṉkuin ukatmamkam sewata irumtai̱niam wetá. Túrasha nu áishmaṉ yurumá umar umíachuk wantintiukaip. 4Tura kanartaj tusa tui̱ṉ tepesat péṉker nekaram weritia. Túram itiura nawemsa tepestata nui̱ nawe̱nmaani̱ tepakum esekmatai̱ri̱ uratkam esekmaram tepesta. Túrunawakmin urukattam núnaka niṉki ujatmáktatui.” 5Tutai nuwa̱sha chichaak “Ashí túrutmena tímiatrusnak umiktajai” tímiayi.
6Tutai Rutcha sewata pakatai̱niam we tsatsarí̱ jintintramia tímiatrusaṉ umikmiayi. 7Tura Puas yurumá umutairi̱n umar umik ti shiir waras sewata júukar irumpramunam ayaam tepes kanuumiayi. Túrunamtai nu nuwa̱sha yáitmataik nawe̱nmaani̱ jearí esekmatai̱ri̱n uratak esekmar tepesmiayi. 8Tura kashi ajapéṉ ai̱ nú aishmaṉsha awakmámki̱ shintiar ayantár ni nawe̱e̱n nuwa̱ tepan nekaamiayi. 9Tura tepá wainiak “Yáitiam” tutai aya̱k “Rútaitjiai ámin takarniuitjiamna núitjiai. Tura ámetme winia waitkiamniamka. Tuma asam nuwemea ímiatrusmek wáitkiata” tímiayi. 10Tutai Puas chichaak “Yaunchu túrutairmiji̱a̱i̱sha naṉkaamas yamái túramna ju̱ imiá péṉkeraiti. Kame náṉkamas shuar wíji̱a̱i̱sha uchí kuítrintin tura kuítrinchaksha natsa e̱a̱kcha asakmin makú, Uunt Yus yaintmakti. 11Yamaikia makú, sapijmiakaip. Ame seatmena núnaka tímiatrusnak umiktatjai. Kame ju̱ péprunam pujuinia ju̱ka péṉker núwa̱itmena nuna ashí nekarmainiawai. 12Kame wisha ní shuari̱ṉkitjiai. Túrasha ame tsatsarmi umai̱ya̱ nekas ámin waitmakminkia pujawai. 13Túrasha ju̱ kashi ju̱i̱ṉ juaktá. Kashin ni sumarmakka sumarmakti. Nusha wíji̱a̱i̱ṉkia péṉkeraiti. Antsu nakitrámpramtaiṉkia wi sumaktajme, Uunt Yus íimmianum tájame. Nui̱ tepesta. Tsawa̱a̱rti.
14Túrasha aents pujuinia ju̱ waitmakar nuwa̱ sewata irumtai̱niam tamai turamara̱i̱ṉ kíritiak nantaktia” Puas timia asa nui̱ ni nawe̱ni̱ṉ kanar tsawa̱a̱k nantakmiayi. 15Nuyá̱ Puas chicharuk “Awaṉkémprum ayapá̱rta.” Tutai jusa ayapá̱rmatai sewata nekapmam kijintri̱ sais jean susá áentskamiayi. Nu túram nisha péprunam waketkimiayi.
16Tura Nuimisha najati̱ támatai chicharuk “Najatru, ¿itiur naṉkaamasumea?” tutai Rut Puasa chichame̱n mash ujakmiayi. 17Nu arant chichartak “‘Ame tsatsarmiiṉkia aya jú̱nikkia waketkishtiniaitme’ tusa ju̱na sewata kijintri̱ sais nekapek jean surusai” tímiayi. 18Tutai Nuimí chicharuk “Nawantru, chícham ¿itiur iwiarnartiṉ? Nákasta. Nú aishmaṉka chichaman iwiartsukka iniaisashtatui” tímiayi.
©2009 Avant Ministries in cooperation with Wycliffe Bible Translators, Inc. All rights reserved.