Rut 1
1
Irimirík ní shuari̱ji̱a̱i̱ Muápnum pujusma
1Kame sumamtikin akupiármia nu tsawantin Jutá nuṉkanam tsuka ámiayi. Tura Piriṉnumia̱ áishmaṉ nua̱rtiuk tura jimiará uchirí̱ji̱a̱i̱ Muap nuṉkanam pujuuttsa wémiayi. 2Nu áishmaṉka náari̱ṉkia Irimiríkiauyayi tura ni nua̱ri̱ṉkia Nuimí nuyá̱ ni uchirí̱ náari̱ṉkia Majrun tura Kiriun ármiayi. Tura nisha Jutanmaya̱ Piriṉ Éprata péprunmaya̱ shuarauyayi. Kame Muápnum wéar nui̱ pujusármiayi. 3Túrasha Irimiríkkia jakamiayi. Túrunamtai Nuimí aya jimiará uchirí̱ji̱a̱i̱ṉ juákmiayi. 4Tura nu uchi armia nusha Muápnumia̱ nuwa̱n Urpa tura Rut náartinian nuatkarmiayi. Kame nui̱ṉkia tias uwí pujuschariawash. 5Kame Nuimikia ni uchirí̱ Majrun nuyá̱ Kiriuncha mai̱ jákarmatai núnisaṉ áishri̱sha jaka asamtai aya niṉki juákmiayi.
Rut Yusan enentáimtin armia nuní̱ pachinma
6Chíkich tsawantin Nuimisha Muápnum pujus Uunt Yus ni shuari̱n waitnentraiti. Tuma ásar yurumkan taramkarai táman antuk “waketkitjiai” tímiayi. 7Nuyá̱ Nuimisha ni jimiará najati̱ji̱a̱i̱ pujumia nuyá̱ Jutanam waketainiak jíinkiarmiayi. 8Tura jintiá wésar Nuimí ni najati̱n chicharainiak “Atumí nukurí̱ni̱ṉ waketkitiarum. Kame jákarusha iwiaaku pujuarmia nui̱ waitnentrachmakarum tura winiasha waitnentrurmarmena nútiksaṉ atumniasha Uunt Yus ti shiir waitnentrampratarum. 9Atumniasha Uunt Yus yaintmakarti tura chíkich áishmaṉja̱i̱ nuatnaikiarum shiir pujustinian ákantsaṉ amasárti” tinia yapiniam mai̱ mukunáwarmiayi tura kakantar útkamaikia 10chichainiak “¡Atsá! Iisha ámiji̱a̱i̱ nuṉkemín winitiái tusar wakeraji” tiármiayi. 11Tura Nuimí chicharainiak “Najatru, waketkitiarum. ¿Urukamtai winí̱ winitniusha imiá wakerarum? Kame atumín nuatramkartinian wi uchin takusminkiaitiaj. 12Antsu najatru waketkitiarum. Tí uuntach asan niniurtukchamniaitjiai. Tura wi atumín chichareakun niniurtukminiaitjiai tinia yamaik nuatnaikian uchin takusmataisha 13atumsha nu tsakarmatai niji̱a̱i̱ nuatnaikiataj tusarum ¿nákasaintrumeash. Nu aneakrum nuatnaitsukeash pujusaintrum? Nuka makú túrunachaintrume. Atumniaja̱i̱ṉkia winia imiá kúntutsaiti. Kame wi wáitsatniuṉka Uunt Yus yumiṉkruruiti” tímiayi. 14Tu chicharainiam ataksha útiarmiayi. Tura Úrpaka ni tsatsarí̱n yapiniam mukuná ikiuak waketkimiayi. Antsu Rutka tsatsari̱ji̱a̱i̱ juákmiayi.
15Nuimisha Rútan chicharuk “Ame kaimkia ni shuari̱ni̱ṉ tura ní yusri̱niak waketratsuk. Amesha niji̱a̱i̱ waketkitia” tímiayi. 16Tutai Rut aya̱k “¡Atsá! Wini̱ya̱ kanaktia turutip. Ame tui̱ wéam nui̱sha winittiajai tura tui̱ pujustatam nui̱sha ámiji̱a̱i̱ṉ pujustatjai. Núnisaṉ ame shuarumka wi shuar ártatui. Nu arantcha ame Yusrumsha winia Yusur átatui. 17Antsu aya jákatniuk akantámkittiaji. Ame tui̱ jakattam wisha nui̱ṉ jakan ikiuntsattajai. Tura wi táyatan umitsuk amiiya̱ kanakmiataiṉkia Uunt Yus kakaram asuttiuáti” tímiayi. 18Tutai Nuimisha Rut nekas nemarsattajme táman nekáa nú arantka tíchamiayi.
19Nuya̱ṉka jímiarchik Piriṉnum jeatái tusa wéarmiayi. Tura Piriṉnum jeawarmatai ashí aents nui̱ pujuarmia nu, nuwa̱n wininian wáinkiar charaatum ajainiak “Ausha Nuimichukait” tiármiayi. 20Tutai chichaak “Nuimiyá turutirap antsu Mara#1:20 Nuimí támaka warastin tura Mara támaka tí kuntuts awajsamu tawai. turuttiarum. Warí Ashí Tujintkiachu Uunt Yus tí kuntuts awajtúsuiti. 21Wi ju̱ya̱ṉka ashí takaru wémiajai. Túrasha Uunt Yus peṉké takakcha awaṉtukní̱. ¿Urukamtaik Nuimiyaiti turuttiarum? Warí Ashí Tujintkiachu Uunt Yus wáitsar tí kuntuts pujustinji̱a̱i̱ asuttiuaiti” tímiayi.
22Nuní̱ Muápnumia̱ Nuimí ni najati̱ Rut, Muápnumia̱ nuwa̱ja̱i̱ Piriṉnum sewata júuktin náṉkammanum táarmiayi.
©2009 Avant Ministries in cooperation with Wycliffe Bible Translators, Inc. All rights reserved.