Neka. 8
8
Nekatai̱ṉkia nuwa̱a núnis nékana nuna chicharui
1Nekatai̱ṉkia untsumui
tura enentáimtai̱ṉkia kakaram untsumtsuk.
2-3Tura jintia náintiaani̱ wéamunmasha
ántsaṉ jintia íṉkiuntramunmasha
nuyá̱ uunt pepru wáitiri̱ncha wajawiti
ántsaṉ wá̱i̱ti̱a̱i̱ri̱n wajas untsumuk chichaak
4“Maa, ashí aentstiram wi chichareajrumna ju̱ nekas antuktarum.
5Nékachutiram péṉker enentáimkia átin
tura péṉker enentáimkiachutiram neka ajastin unuimiátratarum.
6Ti shiir chichaman nekasa nuna ujaktinian takurkajrume
tuma asamtai anturtuktarum.
7Kame wi tájana nuka nekasaiti
warí anaṉkartushim chichaktinian wikia nakitiajai.
8Winia chichampruka anaṉkartichuiti.
Kame péṉker chicham asa yajauchichuiti.
9Ímiatrus antinji̱a̱i̱ṉkia ashí péṉker áiniawai
tura antukarua nuka nekasaiti tuíniawai.
10Tura wi jintinkiartamu unuimiátratniuka kuítji̱a̱i̱sha
tura kuriji̱a̱i̱sha naṉkaamas wakerújataiti.
11Ántsaṉ shíirmach kayaja̱i̱
tura ju̱ nuṉkanam wakerú ajamai írunna nuja̱i̱ apatkar iismasha nekatai̱ naṉkamantuiti.
Tuma asamtai winia jintíamur unuimiátram nekaata.
12Wi nekatai̱ asan esetra enentáimsatniun nékajai.
Tuma asamtai péṉker jintíamu ainia nu nekaatin wíji̱a̱i̱ṉkia yúpichuchiti.
13Uunt Yus ashamakum yajauchia nu nakitráttame.
Kame waantu enentáimtumastinniasha tura chikichji̱a̱i̱ṉkia naṉkamantuitjiai tu enentáimtumastinniasha
núnisaṉ yajauch túratniuncha nuyá̱ yajauch chichastinniasha wikia peṉké nakitiajai.
14Kame chicharkartin péṉker enentáimsa túratniusha tí neka átincha
nuyá̱ kaka̱a̱rtincha wini̱ya̱ṉ áiniawai.
15Akupin ainia nusha wiji̱a̱i̱ ímiatrus akupáiniawai
tura úuntri̱sha nekasa nuja̱i̱ métek péṉker túruiniawai.
16Tura uuntri̱ ainia nusha wíji̱a̱i̱ṉ akupénawai.
Nuyá̱ peṉkeri̱ ainia nusha túramuja̱i̱ métek iis nekáa jú̱ nuṉkanam péṉker umimtikiainiawai.
17Kame anenta núnaka wisha aneenajai
tura ásump enentáiji̱a̱i̱ émamkes e̱a̱tainia nuka wáitiainiawai.
18Wikia amuicha kuítniasha núnisaṉ páantin awajsatniuncha
tura naka wekasatniuncha sukartiniaitjiai.
19Wi súaj nuka kuri unuikiar aya kúrik awajsámuja̱i̱sha naṉkamantuiti
tura wi túraj nusha kuit unuikiar aya kuítiak awajsámuja̱i̱sha naṉkaamasaiti.
20Wikia nekatai̱ asan winia nekatairka nákakete.
Tuma asan péṉker túrutai̱ jintianmaani̱ wekaajna nui̱ waitkiattame.
21Anentainia núnaka súsartin péṉker iwiarturma ainia nuna patattsan súsartatjai.
22Ashí najankamu áiniana núnaka najantsuk
émkaka winia nekas tí peṉker enentáimturas Uunt Yuska najatamiayi.
23Tura nuṉka najanatsa̱i̱ṉ
akupin atí tusa emka anaitiukmiayi.
24Tura nayantsa kunarí̱sha
kame atsuiniai̱ wikia juárnakmiajai.
25Murasha najanatsa̱i̱ṉ wikia juárnakmiajai.
26Nui̱ nuṉka najanatsa̱i̱ṉkia
kampunniusha nuṉká ju̱yu̱mchiri̱ṉsha peṉké atsuyayi.
27Nayaimpin nájanuk
tenten kunanmaya̱ najanamia nui̱sha pujumiajai.
28Yuraṉkim yakí̱ naṉkantratniuri̱n
tura uunt nayantsa púkuniri̱ naṉkantratniun chicharmia nui̱sha pujumiajai.
29Yus nayantsan ‘ju̱i̱ṉ naṉkantia tura nu arantka naṉkaamakip’ timia nui̱ wisha pujumiajai.
Tura nuṉká tépakma muchitkiachmin ajasat tusa pujurmia nui̱sha
30niji̱a̱i̱ pujumiajai. Ashí najankatniun tí nékana núnisauyajai.
Tura ashí tsawant shiir enentáimtutaiyajai.
Nuyá̱ nin tuke warasan pujuyajai.
31Yus nuṉka najanamunam pujuiniakui wisha wararainiajai.
Núnisaṉ aentsnasha tí shiir enentáimtuiniajai.
32Tuma asamtai uchirtiram yamaikia anturtuktarum,
wi tájarmena nu umikrum wekaakrumka warastatrume.
33Nekatai̱ya̱ nu nakittsuk
péṉker anturkatarum.
34Aents winia anturtaná
tura winia wáitkiataj tusa
kashí kashini̱ṉ e̱a̱tuk nákarná nuka ti nekas waraawai.
35Wi nekataintjiana ju̱na wáitkianka iwiaakman wáinkiaiti
tura Uunt Yusa waitnenkartutairi̱n takakui.
36Antsu winia tuntupea iniaitiana nuka niṉki yajauch awajmamui
tura ashí nakitruinia nuka jákatniun wakeruiniawai.”
©2009 Avant Ministries in cooperation with Wycliffe Bible Translators, Inc. All rights reserved.