Neka. 9
9
Nekatai̱ untsumma
1Shuar je̱a̱n je̱a̱muk numin ukuá̱ je̱a̱mna núnis
nekatai̱ siati paun ukur ni je̱e̱n je̱a̱mmai.
2Tura taṉkuri̱ ainia nuna maa iwiar nuyá̱ uwa yumiri̱ peṉkeri̱ji̱a̱i̱ pachimiak
yurumtainiam ekentsaiti.
3Nuyá̱ iwiar umik ni takarniúri̱n nuwa̱ natsachin akupkarmai.
Nisha jiinkí̱ pepru mash íirkamunam waka untsuiniak
4nekatai̱ chichartamuk “Natsatiram péṉker enentáimkiachu árumna nu winitiárum.
5Namperan nájanjana ju̱i̱ winirum apatuk yurumárum
tura winiu umarum wi iwiarajna nuja̱i̱ warastarum.
6Netse enentáimtai̱ya̱ nuka iniaisatarum.
Tura neka ajasrum pujustarum” tu untsumkarmai.
7Shuar wishikkiartin jintintiámka íksan niṉkia arantúrmakchattawai.
Tura Yusan enentáimtichua nuka chichareamsha yajauch chichartamkattawai.
8Wishikiartinia nu chicharkaip, kajertamka̱i̱ṉ.
Antsu péṉker enentáimniuka chicharkamsha anenmattawai.
9Neka nuka jintintiam tí neka ajastatui.
Núnisaṉ péṉker enentáimniusha unuiniaram nuna naṉkaamas nekaattawai.
10Uunt Yus ashamamuja̱i̱ neka ajastin juárnawai.
Núnisaṉ Peṉké Tunaarincha Nu nekaatniuka péṉker enentáimin ajastiniaiti.
11Warí aya wíji̱a̱i̱ṉ núkap tsawant wainkiattame
tura núkap uwí iwiaakmarmesha eketnaktatme.
12Kame nékaitkiumka ame péṉkerumkete
túrasha wishikiartiniaitkiumka ame wáitsatniukete.
Enentáimcha nuwa̱ untsumma
13Enentáimcha núwa̱ka emesmawiti
tura wáurkaiti nuyá̱ natsaamchaiti.
14Nú nuwa̱ka ni je̱e̱ wáitiri̱n pujus
tura pepru mash íirkamunam yakí̱ waka
15paasa jintianam naṉkaamainian
núnisaṉ nákak wénancha untsuktaj tusa iimia pujuwiti.
16-17Natsa péṉker enentáimchan untsúawai
tura enentáimsatniun nékachuncha chicharainiak
“Ju̱i̱ winitiárum kasamkámu éntsaka yuminiaiti
tura apatuk u̱ka yuámuka yuu ajamainti” tawai.
18Kame nisha nui̱ jakaa matsatainia nunasha nékainiatsui
tura ni ipiaamuka jakaa matsamtai̱niam nú init pujuiniawai.
©2009 Avant Ministries in cooperation with Wycliffe Bible Translators, Inc. All rights reserved.