Neka. 7
7
Tsanirmatai nuwa̱ anaṉkartutairi̱
1Ámeka uchiru, winia chichamur umikta,
kajinmátkip tájame.
2Tura winia chichamur umikta túrakmeka iwiaaku pujuttame.
Núnismek winia jintíamursha ame ji̱mi wáinmena ímiatrusmek enentáimtusta.
3Núnisaṉ kajinmatki̱j tusam tsara uwejmín jiṉkiamátniua nútikiata
tura enentáiminkia aarma tímiatrusam enentáimtitia.
4Tura nekatai̱ chicharkum “Ámeka winia umaruitme”
nuyá̱ enentáimtai̱ṉkia “Wí shuaraitme” titiá.
5Tura nisha chikicha nuwe̱ya̱ aṉkant awajtámsattawai
nuyá̱ ti shiir chichartamkuisha anturkashtatme.
6Kame wikia je̱a̱rui̱ áṉkasmachiniam iimiá wajasan
7-8áishmaṉ natsa peṉké enentáimcha núnin wekaikiní̱ ajaan wainkiamjai.
Tura nu áishmaṉsha tsukin jeá nu nuwa̱ pujamunmaani̱ wemai.
9Tura kí̱a asa kashi ajasmai.
Kame kashi ajasu ai̱
10nuwa̱ ti aneram tsanirmatai nuwa̱ pushiri̱ entsaru
áishmaṉkan iṉkiuṉtaj tusa jintiukmiai.
11Nu nuwa̱sha ántichu suírintin asa
ni je̱e̱n tee ajas pujustinian nékatsui.
12Tuma asa jintiasha tsukincha
tura aents tu̱a̱tai̱ya̱ nui̱sha ú̱mak nakamkiní̱ wekainiuiti.
13Kame nu nuwa̱ áishmaṉkan paket miniakak mejeas ni yapi̱n íiras tímiayi
14“Yusa shiir awajkun nekas áestuattajme tímiaj núnaka yamái umikjiai.
15Tuma asan ámin e̱a̱kun wékasataj tukamán
aya aneachma wainkiajme.
16-17Tura winia peakrunka Ejiptunmaya̱ riniu tarachji̱a̱i̱ áintkian atamprutai̱ncha ikiusan
tura mira, aruí nuyá̱ ishpiṉᵏ kuṉkuinji̱a̱i̱ ukatkan iwiaran ikiukjiai.
18Tuma asamtai winitiá. Ii aya̱shi̱ wakeramu sunaisami.
Túrar pujú pujurnáiyakuar tsawa̱a̱na ímianai ikiunaikmi.
19Warí winia áishruka je̱a̱ṉka pujatsui.
Jeachat iraumai.
20Kame núkap kuítian jukí̱ wemai.
Tura nántuka nayantumamunam tátatui.”
21Tu ti yuminian chicharás miniakak natsá enentái̱n ikiajtiúkmai.
22Kame waakasha maattsa júamsha pachimiawak
tura muriksha jiṉkiataj tutaisha nekaamawak
núnisaṉ natsasha wárikmas nuwá̱ úkuri̱n patas wéawai.
23Ántsaṉ áutsuk naṉkiji̱a̱i̱ akapruí ijiuti mantuawaraintia tu enentáimsaṉ wekáa.
Tura chiṉkisha ajatkampramunam nemaktajtsa wárichik wéatsuk
núnisaṉ natsasha áutsuk jákaintiajtai tuuka enentáimtsui.
24Tuma asamtai uchirtiram, yamaikia winia chichamur péṉker anturtuktarum.
25Nú nuwa̱ka enentáimtustaj tiip.
Tura wajakui̱sha íikmaikia wekasaip.
26Nú nuwa̱ja̱i̱ untsurí katsumnakar numpamnararmiayi.
Tura chíkichkia kakaram áiniayat jákaruiti.
27Warí nú nuwa̱ pujamunam untsurí jintia jeainiawai
tura jaka meṉkakatniunam wénawai.
©2009 Avant Ministries in cooperation with Wycliffe Bible Translators, Inc. All rights reserved.