Neka. 6
6
Tumashmakchatin
1Uchiru, ame amikrum tumashmakmatai wi akikmatkatjame tusam nékashtai̱ ame uwejém susamka
2timiá amek itiurchatnum súmameame
tura ame chichammiji̱a̱i̱ṉ jiṉkiar emetamua núnikiuitme.
3Túrunam chíkich takarin ajasume.
Tuma asamtai tímiam nuyá̱ aṉkant ajastaj tákumka
amikrum werim atsaṉmamsam “akikmatkashtatjame tsaṉkurturta” timi aṉkant ajasta.
4Kame nu túrutskeka “kanartajná”
tura “ayampratjaná” tiip.
5Antsu japa e̱a̱mniun wainiak tsékeaná
tura chiṉki ajatkampramun wainiak nanaak yajá wéaná núnikta.
Naki jintintiátin
6Nákitiram week takakmainia nu
íisrum takakmastin unuimiátratarum.
7Kame úuntri̱nchaitiat
tura ju̱ní̱ takakmasta táchamaitiat
8weekka ni enentái̱ji̱a̱i̱ṉ tuke tsawant takakmainiawai.
Tura yumitin yurumámi tusar esatái̱ takakmasar
ni yurumkari̱n júukar ikiuiniawai.
9Maa nakí, amesha nakimtasha ¿urutái iniaisattam?
¿Urutái shintiaram takat enentáimturtatam?
10-11Ántram yamaikia ayampratjai tusam takakmastin ishí íniaisamni̱ṉ shuar jatekratna ántsaṉ tsuka jatetmaktatui.
Tuma asamtai kakaram ajasam takakmasta tájame.
Yajauch enentáimkia
12Shuar yajauch enentáimkiana nu jú̱nisaiti,
wait chichaman jukí̱ chíkich shuaran tsanukní̱ wekainiuiti.
13Anaṉkataj tusa ji̱ji̱a̱i̱ mítsumsaṉ
tura nawe̱ja̱i̱ ántiniaisaṉ
tura uwejé̱ja̱i̱ íniakmasaṉ ajawiti.
14Ni enentáimmiari̱ṉkia ti yajauchiti.
Tuma asa tui̱ wekáa nui̱sha aya yajauchiniak enentáimiuk mámtikiatniun tuke wakerus wekainiuiti.
15Tuma asa nu shuaran wáitsatniuri̱ aneachma arittiawai
tura itiurchatri̱ya̱ peṉké ayamprashtatui.
Yus muí̱jiamu
16Yus nakitia nuka sais áiniawai
nuíchuka siátiti kame Yus peṉké muí̱jiamuka jú̱ áiniawai.
17Naṉkamantu íimiamsatin,
waitruatin, maṉkartuatin,
18yajauchia nu enentáimtustin,
yajauchia nu wekaatustin,
19nekascha nu nekasaiti títin,
nuamtak yachiji̱a̱i̱ mámtikiatin.
Natsa chicharma
20Uchiru, ame apa akupkámusha umikta
ántsaṉ ame nuku jintintramna nusha nakitraip.
21Kajinmatki̱j tusam esetram enentáimkiak wekasata.
22Tsawai̱sha tuí̱ṉkish wekaittiam nui̱sha jintintrámawartatui.
Tura kashi tepakmincha nui̱sha enentáimmiarmin waitramiartatui.
Nuya̱ṉka kashin shintiartatmena nui̱sha chichartamiartatui.
23Akupénamusha shirikip keeá núnisaiti.
Tura chichartamniua nuka shiripkiji̱a̱i̱ métek
péṉker wekasatniun jintintramaiti.
24Tura uchiru, chichartamna nuka yajauch nuwa̱ ikiajtiúrmakiṉ tusa aṉkant awajtámsattawai
tura yuminian chichartamna nuya̱sha uwemtikramprattawai.
25Ni shíirmari̱ enentáimtusam wakerutkaip
núnisaṉ nisha ji̱n peertamka̱i̱ṉ.
26Tsanirmatai núwa̱ka áishmaṉkan aya kuítriniak amutnuiti.
Antsu nuwa̱ áishri̱nniuitiat tsanirmakka yaja̱i̱ tsanirma nuna shiir pujamun emestiniaiti.
27Warí ji kapa̱a̱n miniakeana nuka
ni pushiri̱n áesachminkiait.
28Tura jinia amutuaṉka
ni nawe̱n áesachminkiait.
29Núnisaṉ shuar ni írutramuri̱ nuwe̱n tsanirma nuka jiji̱a̱i̱ sukumana núnisaiti.
Yaaksha ni írutramuri̱n tsanirma nuka páchitsuk asutniáttawai.
30Kasa tsukamak yurumáttsa kasamea nusha ¿nakitmainchukait?
31Túmaitkiuisha kasamkámu nekanaṉka siati pataas awaiṉkitniuiti.
Táasmataiṉkia ni warirí̱n je̱e̱n ana nuna mash surumakminiaiti.
32Tura tsanirma nuka mutsuktichuiti.
Nuna túmak niṉki emesmamui.
33Áyatik awatnar natsanmai̱ ajaktatui.
Túrasha natsanmai̱ ajakmári̱nkia peṉké emeṉkákchattui.
34Warí áishmaṉ akasmakka suíran ka̱e̱ kaje̱ntkattawai.
Tuma asa yapajkiatniuitkiuiṉkia peṉké tsaṉkurashtatui.
35Tsaṉkurnáiratai tusa núkap akiktajme tutaisha
peṉké anturkashtatui.
©2009 Avant Ministries in cooperation with Wycliffe Bible Translators, Inc. All rights reserved.