Neka. 5
5
Tsanirmatai nuwa̱ áishmaṉkan yúpichuch ánaṉkeamu
1Uchiru, wi neka asan ámin chicharjamna nu ímiatrusam enentáimsam antukta.
2Kame neka tura enentáimias chicháu átaj tákumka
wi chichareajmena nu péṉker antukta.
3Warí tsanirmatai nuwa̱ áishmaṉkan emka ti yuminchin chicharui
tura tí peṉkera nuna iniaktawai.
4Túrasha ukunam puyá̱ atsakamuja̱i̱ akaṉtinia núnis
tura yapaja̱i̱ métek nekapratin winiawai.
5Nu nuwa̱ wekaamuka meṉkakatniunmaani̱ wéakui
nin némarna nuka jákatniunam jeawai.
6Nú nuwa̱ka iwiaaku jintianka ántraiti tu enentáimtawai.
Warí ni wekaamuri̱ mái̱ yapaji̱ ajakui tui̱ wea nuna nékatsui.
7Tuma asamtai uchirtiram antuktarum.
Winia chichamur kajinmátkirap.
8Chíkich nuwa̱ je̱e̱ní̱ peṉké wekasaip
antsu nuni̱ṉkia wétsuk yajá menaṉtia.
9Tura ame kakarmaram wasurka̱i̱m
nuyá̱ kajennum jeawa̱i̱m yajauchia nu wekaatusaip.
10Nu túrakmeka ame takatrum tura kuítrumsha chikicha je̱e̱n ántar ajapnattawai.
11Tura winia chichamur peṉké ántutsuk yajauchia nu túrukim wéakmeka
ame aya̱shim yaitias amuiki̱ wéakui nekaamattame.
12Nui̱ útkum “¿urukamtaik chicharmaitiatnasha enentáimtsuk péṉke antukchamiaj,
13jú̱niktin asaná jintintruinia chichame̱ncha antuktinian imiá nakitniuyaj?
14Yamaikia wi shuarsha tura írutramursha yajauchi túriniaiti turutiartatuapi” títiatme.
15Tuma asamtai chikicha yumirmatri̱n wétsuk
ame yumirmatrumiya̱ṉ umaram kitiakrum imikrata.
16Warí ame entsaram ukaráinmeash
tura nu arant péprunmasha weme ukaram wasurkaintmeash.
17Nu yumirmatcha áminiuk atí
antsu chikichna áchati.
18Ame nuwemji̱a̱i̱ shiir pujusta
tí peṉker awajsamu atí.
19Kame nuwemsha taṉku uchich miniaksar saúkú ajata núnis enentáimtuschamniakait.
Tuma asamtai miniaksam shiir awajeakum níjia̱i̱ṉ warasta.
Túramka amincha ti anenmak waramtikramtiatui.
20Tuma asamtai uchiru warí chíkich nuwa̱ áminiuchuja̱i̱sha
¿urukamtaitsuk miniaksam wekasaintiam?
21Warí Uunt Yus shuara wekaamuri̱n mash wáinniuiti
túrak ni túrutairi̱n nekarniuiti.
22Antsu Yusan enentáimtichuka ni yajauch túrutairi̱n emetamu áiniawai
kame ni tunaari̱n chapikji̱a̱i̱ jiṉkiatniua nútikiamu pujuiniawai.
23Nu asamtai péṉker chicham jintinmaitiat ní nakittsaṉ jakattawai
tura ti netse enentáimin asa wáitsatniunam jeattawai.
©2009 Avant Ministries in cooperation with Wycliffe Bible Translators, Inc. All rights reserved.