Neka. 30
30
Akura Chichame̱
1Ju̱i̱ti Akura chichame̱ Jaké uchirí̱. Ju̱ Yusai̱ya̱ chichaman étserui. Pimpikjiai Yusru,
maa pimpikjiai Yusru, túran peṉké kakarmachu nekapeajai.
2Nekas chikichja̱i̱ṉkia naṉkaamas wikia imian nékachuitjiai
kame aentsun nekatairi̱ ana nuna takakcha ániuitjiai.
3Wikia nekatai̱ unuimiárcha asan
Tunaarinchan nekaatniun jeatsjai.
4¿Ya nayaimpiniam waka ataksha táarait?
¿Ya ni uwejé̱ja̱i̱ nasen emetait?
¿Ya tarachji̱a̱i̱ entsan áreṉkuit?
¿Ashí nuṉkanam írunna nunasha ya najankait?
¿Ni náari̱sha tura uchirí̱ náari̱sha yait? ¿Nu nékamek?
5Yusa chichame̱sha timiá nekasaiti
tuma asa Niin weanainia núnaka tantara núnis uwemtikiainiawai.
6Ni chichame̱ pataakum wáitrin ajasaip, asutniáwa̱i̱m.
7Uunt Yusru jímiarchiniak seajmena nu
iwiaakjana ju̱i̱k anturtukta.
8Ántar ainia nuyá̱ tura wait chichamnumia̱sha akantuktia
núnisaṉ kuítrinniusha kuítrinchasha awajtúsaip.
Antsu yurumkan atsumajna nuke surusta.
9Kame ti takakkuṉka ámin kajinmátkin “¿Uunt Yussha yait?” tíiji̱a̱m
núnisnak kuítrincha ajasnaka kasamkun ame náarmin yajauch awají̱j.
10Takarin ni úuntri̱i̱n tsanumpruraip.
Nu túramka nisha yumiṉkrampramtai amesha sumamawa̱i̱m.
11Aents ni aparí̱n yajauchiniam yumiṉniusha
tura nukurí̱n shiir awajchasha írunui.
12Kame aents ni yajauch túrutairi̱nkia iniaisachiat
ni enentáimmiari̱ji̱a̱i̱ṉ péṉker enentáimtumasha írunui.
13Núnisaṉ aents waantu enentáimtumak
ímiancha enentáimkiartinkia naka imias wekainiusha írunui.
14Kame nu aentsu nai̱ṉkia puya̱na núnis áiniawai
tura uunt nai̱ṉkia kuchiiya núnis asa ju̱ nuṉkanam atsumainianka
tura ímianchach ainia núnaka yua nútikniusha írunui.
15Jitiachi nawantri̱ jímiar ainia nu seamainiak “surusta, ataksha surusta” ajainiawai.
16Núnisaṉ ejemachuka menaint áiniawai tura kuatrua nuka “máakete” tatsui.
Kame nuka ju̱ áiniawai, jaka matsamtaisha tura nuwa̱ kaa ajasusha
nuyá̱ nuṉka entsa pajamtushtai̱sha
tura jisha “máakete” tíchaiti.
17Uchi ni aparí̱n wishikniua núnaka
tura nukurí̱ chichareamsha kajek áimniua núnaka kayanmaya̱ pinchu ji̱n ukuitkiamtai
yapú uchirí̱ naintia kaketukar ji̱n yuruawartatui.
18Menaint ainia nusha wíji̱a̱i̱ṉkia nekaachmin áiniawai
kame kuatrua nunasha nékatsjai.
19Churuwia nanaaki̱ wema páantkait.
Napi kayanam japinki̱ wemasha páantkait.
Nayantsanam uunt kanú wemasha páantkait.
Tura áishmaṉ nuwa̱n werimiusha páantkait.
20Nuwa̱ tsanirmatan unuimiátraka jú̱nisaiti,
yurumá japí japimiá ajas pujusua núnis “wikia yajauchin túrachjai” tíniuiti.
21Menaint ainia nuja̱i̱ aents katsuntainiatsui
kame kuatrua nuka ti yajauch awajeawai. Tura ju̱ áiniawai,
22takarniuitiat akupin ajakui
nuya̱sha nétsetiat tárameakui
23núnisaṉ nuwa̱ muí̱jtiaitiat niniurtakui
nuyá̱ nuwa̱ chíkich nuwa̱n takarniúri̱ntiat nérentin ajakui nuja̱i̱ wáitiawai.
24Ju̱ nuṉkanam yajasmach írunna nuyá̱ kuatru ti uchichitiataṉ neka ainia nuja̱i̱ naṉkaamas ti neka áiniawai.
25Nuka ju̱ áiniawai, week kakarmachuitiat
ni yurumkari̱n esatái̱ juuk ikiuawai
26núnisaṉ miwiach ayamprumakchamniaitiat
kayanam jeam pujuiniawai
27núnisaṉ manchi akupniúrtichuitiat
pekamak yujawiti
28tura sumpa yúpichuch achikminiaitiat akupniu je̱e̱ya̱ ímiatrus pujuwiti.
29Menaint naṉkamantu enentáiji̱a̱i̱ wekain
kame kuatrua nuka ti péṉker wekain áiniawai tura ju̱i̱ti.
30Úunt ya̱wa̱ ashí yajasma ainia nuja̱i̱ naṉkaamas ti kakaram sapijmiachuiti
31núnisaṉ áyump waantu enentáimtuma tura chipiu áishmaṉ
nuyá̱ akupin ashí ni suntari̱ji̱a̱i̱ jiinkiui ashamtainti.
32-33Nekas muntsu kantemtikniuitkiumka macha takustatme
tura ti kakaram shí̱i̱kmakmeka numpá nujirkittiame
ántsaṉ kajeakmeka katsumkartukam suir mikirtatme.
Tuma asamtai nékachua áintsam waantu ajasuitkiumsha
tura yajauch túratin wakerukuitkiumsha nuka pachisaip.
©2009 Avant Ministries in cooperation with Wycliffe Bible Translators, Inc. All rights reserved.