Neka. 31
31
Remuera chichame̱
1Ju̱i̱ti Masanmaya̱ akupniu Remuera chichame̱ ni nukurí̱ jintinmia nu.
2Winia uchiru, ámeka wi takusmaitme.
Wi wakerakun Yus seam surusmia nuitme.
3Uchiru, nuwa̱nam ame kakarmaram wasurkaip.
Tura akupniu emesin ainia nuna túrutairi̱ túrawaip.
4Remuerá, ju̱ka akupin túrushtainti tura akupniúka nampekchatniuiti.
Núnisaṉ uuntri̱ ainia nuka awartiun umarchatniuiti.
5Kame nampekar akupkámun kajinmatkiar túratniua nuna umitsuk
ashí wáitiainia nuna itiurchat awajkara̱i̱ṉ tusan tajai.
6Antsu tí jaaka nu umutai̱n umararti.
Ántsaṉ tí kuntuts enentáimna nusha umararti.
7Kame nuna umarar atsumainiamuri̱n tura waitiainiamuri̱n nu arant enentáimtutsuk kajinmatkiarti.
8-9Muutcha tura wáitkiasma pujuinia nusha
nuyá̱ peṉké takurmakchasha núnismek atsumainia nusha
ashí métekrak enentáimtusaram
niniu átinia nu ayamprakum chichamprukarta.
Péṉker nuwa̱ shiir awajeamu
10Tí peṉker nuwa̱ wainkia nuka
kaya shíirmachi kuítri̱ji̱a̱i̱ naṉkaamas péṉkeran wáinkiaiti.
11Péṉker nuwa̱ asamtai ni áishri̱sha shiir enentáimias wekainiaiti.
Tuma asa kuítri̱sha táamtsuk kaweṉkattawai.
12Iwiaaka nui̱ṉkia ni áishri̱ncha yajauch awajtsuk
tuke tsawant péṉker wáinniuiti.
13Ni enentái̱ji̱a̱i̱ṉ uruchí̱n tura kamushan juuk
ikianak waras takakmawiti.
14Ásump nuwa̱ asa ni ajarí̱ jeashtanmaya̱nak yurumkan núkap ikianak suruktinia tímiatrus irumar pujuwiti.
15Tsawa̱a̱na nui̱ nantaki̱ ni shuari̱ncha ayurkamuk
tura nuwa̱ch iniatairi̱ ainia nunasha yurumkan akanar súwiti.
16Tura nuṉkancha wekatus iis péṉkeraitkiui súmawiti
nuya̱ṉka nui̱ takakmas arakmawai.
17Wári nuwa̱ asa kaki akachuma
kakaram takakmawiti.
18Ni takatrí̱ya̱ kuítri̱sha kaweṉki̱ wea nékak
nu arant káshisha takakmak ni shiripkiri̱ncha ikiajniatsui.
19Uruchniasha kutamar ka̱e̱r iwiarniuiti.
20Kuítrinchancha núnisaṉ atsumainia nunasha súwiti.
21Warí ní shuari̱ṉkia pushirí̱sha nuparman entsaru ásarmatai
micha iniarmataisha tsetsekái wáitsarainti tu enentáimtichuiti.
22Aintkiar tepetai̱ nuparman níniunak najanniuiti
tura ni entsatái̱ri̱ncha kuítrintin entsáu ainia íimmianun najanak entsawiti.
23Tura ni áishri̱sha nu nuṉká uuntri̱ ainia nu
irunainia nui̱sha paant nekaamuiti.
24Tarachniasha tura emenmamkancha najanak
sumau ainia nui̱ súriniaiti.
25Kakarmari̱ji̱a̱i̱ tura arankartutairi̱ji̱a̱i̱ entsarua núnis asa
shiir enentáimias pujak ukunam átatna nunasha páchichuiti.
26Chichaaksha nekatai̱ji̱a̱i̱ enentáimias chichaawai
tura waitneṉkratamuja̱i̱ jintinkratniuiti.
27Ni je̱e̱ncha warí urukainia nunasha mash nékawai
túmak nakimtsuk takakmaki̱ wéak yurumniuiti.
28Ni uchirí̱sha tura áishri̱sha ti shiir enentáimtusar shiir awajainiak
29“Untsurí nuwa̱ shíirmach péṉkera túrawaru irunainiawai.
Túmaitkiuisha ámeka núja̱i̱sha naṉkaamas tí peṉkeraitme” tuíniawai.
30Nuwa̱ shíirmach íirkaitkiusha nuka peṉké ántraiti.
Antsu nuwa̱ Uunt Yusan umirka nuka shiir awajmáinti.
31Ni takatri̱ya̱ja̱i̱ waitnentrampra asakrumin
atumsha nútiksarmek pepru uuntri̱ irunainia nui̱sha ni túramuri̱ enentáimtusrum shiir awajsatarum.
©2009 Avant Ministries in cooperation with Wycliffe Bible Translators, Inc. All rights reserved.