Neka. 29
29
Aneartarum tusar nekatai̱ jintinkratma
1Aents chicharmaitiat kattsuntsuk yajauchi túruki̱ wéamuri̱ji̱a̱i̱ aya aneachma iwiarnatsuk jakamniaiti.
2Yusan umirin káwenakuinkia ashí shuar warainiawai
antsu akupin Yusan enentáimtichuitkiuiṉkia kúntuts pujuiniak útainiawai.
3Aents nekaatniun ti wakera nuka ni aparí̱ncha waramtikniuiti
antsu tsanirmatai nuwa̱ja̱i̱ tsanía nuka ni warirí̱ncha ashí emeṉkártatui.
4Akupin péṉkera nuna túrakka ni nuṉke̱n iwiarniuiti
antsu akupin akikmaktinia nuna iniaṉkas ataksha akikmaktarum tíniuitkiuṉka ni shuari̱n emesmawiti.
5Aents ni írutramuri̱n ántar chichamja̱i̱ shiir awaju ajana
nuka awaṉkemkar iniartinia núnisaiti.
6Aents yajauchin túrinkia ní yajauchiri̱ni̱ṉ sumamattawai.
Antsu péṉkera túrinkia kantamuk warastatui.
7Shuar péṉker enentáimniuka kuítrincha ásar nekas atsumainiana nuna enentáimtiniaiti
antsu Yusan enentáimtichuka núnaka peṉké enentáimtichuiti.
8Netse enentáimniuka ashí aentsun akajar awajniuiti
antsu neka nuka kajeancha atsaṉniuiti.
9Aents nétsea nuka neka chicharmasha nu arant kajenaiti
nuíchuka aya wíshiniaiti. Tuma asa peṉké yapajniáchuiti.
10Aents maṉkartin ainia nuka péṉker aentsun muí̱jin áiniawai
antsu péṉker enentáimniuka péṉker aents shiir árat tusa wakerin áiniawai.
11Enentáimcha nuka kajekmája̱i̱ chichaman esettsuk chichawiti
antsu nékaaka chichaman émeteak aṉkant nekapmamniuiti.
12Akupin wait chichaman ánturkuṉka ashí ni takarniúri̱n yajauch awajsámniaiti.
13Atsumainiancha tura itit awajniúncha
Yuska mái̱ metek tsáapnin shiira nuna suawai.
14Akupin atsumainia nuna nekasa nuja̱i̱ métek iis nekáa
ni pujuttana ímianaisha tuke aṉkant akupin átatui.
15Úchikia chicharkar numiji̱a̱i̱ asutiam enentáimniuiti
antsu páchishtaiṉkia ni nukurí̱ncha natsant awajniuiti.
16Yajauch shuar ti pampaṉmataiṉkia yajauch túratniusha ti naṉkaamas átatui
tura péṉker shuarka nu aents wáitiamun wáinkiartatui.
17Ame uchiram péṉker jintintiata, nu túraitkiumka nisha ayamtikramprattawai
núnisaṉ ame enentáimji̱a̱i̱sha warastatme.
18Péprunam Yusa chichame̱ etserin atsakuiṉkia ti yajauch áminiaiti
antsu Yus akupkámu chichaman uminia nuka waraawai.
19Takarniua nuka aya chíchamja̱i̱ṉ jintintiáshtiniaiti
kame ántayat umíachkuiṉkia asutiátniuiti.
20Aents wárik chichawa nu ¿wáinchakaitiam?
Kame núja̱i̱ṉkia naṉkaamas netsé chichame̱ anturkamniaiti.
21Takarniua nusha waitnentsar úchichik weakar tsakatmarmaka
ukunam ni uuntri̱ wariri̱ írunna nuna nérentin ajasminiaiti.
22Shuar kajé kajetka maani̱ ajat nekapniuiti
tura nú arant suir nekapniuka yajauchin túrak tí ikiauntumnuiti.
23Shuar naṉkamantu enentáimtumana nu péejchach awajnástatui
tura íksan péejchach enentáimtuma nuka naṉkamantu awajnástatui.
24Shuar kasanam páchitkia nuka yúmiṉkiamsha ántayat
peṉké etsercha asa imia niṉki yajauch awajmamui.
25Aentsu ashamniua nuka jintia akiramunam eṉkemkatniua núnisaiti
antsu Uunt Yusan enentáimtinkia uwemprattawai.
26Untsurí shuar aya akupniu waitnenkartutairi̱n e̱a̱iniawai
antsu aṉkant aṉkant niniu átinia nuka Úunt Yusai̱ya̱ṉkete.
27Yajauchin túrin ainia nu péṉkera túrin ainia nuna muí̱jiainiawai
núnisaṉ péṉker wekainia nu Yusan enentáimtichu ainia nuna muí̱jiainiawai.
©2009 Avant Ministries in cooperation with Wycliffe Bible Translators, Inc. All rights reserved.