Neka. 26
26
1Esatái̱ micha kakeana ántsaṉ juwamunam yumi yútana
núnisaiti shuar nétsea nu péṉker enentáimtustiṉkia.
2Shuírpip tura chinimpⁱ atú we ju̱ní̱ we ajakush tui̱ wea nuna nékatsui.
Núnisaṉ shuar peṉké antrar yajauchiji̱a̱i̱ yumiṉkramuka yúmiṉᵏⁱ jearchaiti.
Nekatai̱ jintinkratma netsenu
3Kawaikia nuapja̱i̱ asuttiainti. Umpuruka wenunam jiruja̱i̱ áptainti.
Tura nétseka numiji̱a̱i̱ asuttiainti.
4Nétsea nu ámin áujtamkui ni tana nuja̱i̱ métek ai̱kiaip.
Túmakmeka niji̱a̱i̱ métek ajastatme.
5Wi imiá nékaitjiai tu enentáimtumasa̱i̱ṉ tusam
nétsea nuka waritia chicharkamniait nuja̱i̱ métek ai̱ktá.
6Shuar netseja̱i̱ atakmasar akupkatniuka
nawe̱nam awatmamtiniana tura tséas umartinia núnisaiti.
7Netse nekatai̱n jintinkiartin chichamja̱i̱ chichaamuka
shutuapa makui̱ ántar ana núnisaiti.
8Shuar nétsea nuna shiir awajea
nuka kaya naṉkimtai̱ji̱a̱i̱ jiṉkiá naṉkimna núnisaiti.
9Nampekú uwejnum jaṉkin meseana
núnisaiti shuar nétsea nu neka núnis métektaku chichamja̱i̱ chichaakka.
10Netse tura aya wékainia nuna winí̱ takakmaitia tusa takatan súakka shuar
tíshimkiuja̱i̱ eketak ashí aentsun íjiuana áintsaiti.
11Ya̱wa̱sha iyak awaiṉki̱ yúatsuk,
nétsea nusha yajauchin awaṉki̱ awaiṉkin túrakka núniskete.
12Shuar nékaitjiai tu enentáimtumawa nu ¿wáiniukaitiam?
Túrasha nétsea núnaka níji̱a̱i̱sha naṉkaamas yapaji̱ámniari̱ awai.
Nekatai̱ jintinkratma nakiniu
13Nakia nuka úunt ya̱wa̱ jintiá nákamui
tura a̱a̱sha wekaawai tíniuiti.
14Waiti ekenmia uram mai̱ áyanta ajana nuja̱i̱ métek nakia nuka peakri̱n tepes mai̱ áyanta ajá tepenaiti.
15Nakia nuka piniṉnumia̱n jusasha yuátaj tukamá tujiniuiti.
16Nakia nu ní enentáimtumaska
siati neka ainia núnaka naṉkaaka enentáimtumaiti.
Nekatai̱ jintinkratma tsanumniunu
17Shuar nisháa tunainian pachintinkia
ya̱wá̱ kuishnium achikiar takuitniua núnisaiti.
18-19Waurka nu maṉkartuattsa naṉkin tura jinia naṉkimna
nuja̱i̱ métekete shuar ni amikri̱n anaṉka “auka wasursan tájame” tiniua nuka.
20Kapa̱ji̱ iṉkiuarchamka ji kajinniuiti.
Núnisaṉ áujmatkartin atsakuiṉkia nemasmanaiktincha atsawai.
21Jinia kaí̱ri̱ṉkia kapa̱i̱chukait tura chíṉkimkia kéchukait
nuja̱i̱ métekete aents katsumnaik itiurchatan najanniua nuka.
22Tsanumniu chichame̱ṉka yuminiaiti
túmaitiat enentáin iniajmawai.
23Anturú ajamai chichatnaka chichayat yajauch awajtústaj
tú enentáiji̱a̱i̱ chichana nuka muits jakukuitiat pátatek ipiakja̱i̱ péṉker yakarma núnisaiti.
24Kajena nuka áujmatkartusiat chichascha tímiatrus pujuwiti.
Tuma nuka ni enentái̱nkia anaṉkartuattsa yajauch chichaman najanniuiti.
25Kame anturú ajamai chichartamkuisha “nekasapi túrutua” tiip.
Ni enentái̱ṉkia ti yajauch piákuiti.
26Ni suir enentáimkiartutairi̱n u̱a̱ksha ni yajauchiri̱ṉkia ashí iruntramunam paant awajnástatui.
27Aents wa̱a̱n tawa nuka ímia niṉki akaikí̱ iniaawai
núnisaṉ kayan akaṉkéa nuka niṉki nekemaktatui.
28Tsanumniua nuka chikichan áujmatuk wáitkiawai
tura wáitkiana nuna muí̱jiawai núnisaṉ ántar péṉker chichana nuka ashí emesmawai.
©2009 Avant Ministries in cooperation with Wycliffe Bible Translators, Inc. All rights reserved.