Neka. 25
25
Nekatai̱ jintinkratma úunt akupniunu
1Ju̱ka Saramúṉ ti nekaak aarmia nuiti túramun Esekías Jutá shuara úunt akupniuya̱ nuna shuari̱sha nunak áararmiayi.
2Wariṉkish u̱kma ainia nuka Yusa páantniuri̱nti
tura émamkesar iisar nekasa nu nekaatniusha úunt akupniu páantniuri̱nti.
3Nayaimp ¿urutá yakiṉkit nuṉkasha urutá initkit?
Akupniu enentáimtairi̱sha nuja̱i̱ métek nekarachmin áiniawai.
4Kuít jiru unuikma saurí̱ utsantkam akankata.
Núja̱i̱ṉkia piniṉkian najanin shíirmachin najankattawai.
5Shuar yajauchia nuka akupin pujamunmaya̱ṉka ji̱i̱ki̱ akupkata.
Túramka akupniuka ashí péṉker umiktin akupkámua nuna umimtikiattawai.
6Akupin pujamunam naṉkamantu enentáimtumasaip
tura shuar peṉkeri̱ ainia nu pujuiniamunmasha pachinkiaip.
7Antsu akupin chichartamuk “winitiá ju̱i̱ pujusta” túramkui péṉker átatme
núchaja̱i̱ṉkia peṉkeri̱ íimmianum natsanmai̱ ajaktatme.
Nekatai̱ jintinkratma írutkamuri̱niu
8Itiurchat wainkiamsha itiur títiatam nu péṉker nékachiatam wáursam akupniúnam wárik weep.
Túmakmam ame áentsrum natsanmai̱ chichartamainiakuisha urukattamek.
9Tuma asamtai itiurchat iwiaratin ákuisha jímiarchik chichasam iwiarata
túrasha nuka chíkich shuarka ujakaip.
10Nu túrawakmiṉkia anturtamainia nu núna itiurchat awajtámsattawai.
Túrunamtaiṉkia itiurchatrumka iwiarachmin ajastatui.
11Chícham enentáimsar nekas atsumamunam chichakmaka
piniṉ kuriji̱a̱i̱ nájankur kuít jiruja̱i̱ tí shiirmach aremprar najanamua timianú péṉkeraiti.
12Shuar neka péṉker chichaream ántinia nuka
nuṉkutai̱ kuriji̱a̱i̱ tí peṉker najanamu tura uwejnum ikiumatai̱sha írunna núnisaiti.
13Esatái̱ árak juwakur entsa micha atsumna nuja̱i̱ métek akatrámsha chichaman péṉker etserniua nuka akatmampran shiir waramtikiui.
Nuna tura asa ni úuntri̱n ikiakáawai.
14Shuar amastájai táyat súatsna nuka yumi kia̱r nasé naseja̱i̱ ajayat yútatsna núnisaiti.
15Yáitmataik áujsar naṉkamantua nusha nawamkatniuiti.
Núnisaṉ yáitmataik táyatrik kátsuram tsáirtinia núnisaiti.
16Míshik wáinkiachumek túrasha anearam yuátá,
ame wakeramna nuyá̱ iniaṉkakam yuáwaip mui̱ṉkim iyaka̱i̱m.
17Aents ámiji̱a̱i̱ ápatnik pujuinia nu iyakum waketrú pujurip.
Títmakmiṉkia iyamna nu yawe̱tramki̱ kajertamkattawai.
18Ii shuar tsanumprurtinkia ajintrutai̱ji̱a̱i̱
tura kuchiji̱a̱i̱ núnisaṉ naṉkiji̱a̱i̱ íjiutniua ímiatrusaiti.
19Itiurchat pujakur yaintkiat tusar shiir enentáimtamaitiat péṉker yáiṉkratcha
nú shuarka nai̱ akaaka tura nawe̱nam muunka najaimiana nuní̱ enentáimtusma áwiti.
20Aents tsetsema pushiri̱ ¿áitkiamniakait nuíchuka akamakmanum wee eṉketámniakait?
Núnisaiti shuar jakamnia enentáimiuk kúntuts pujá kantampruátniuka.
Nekatai̱ jintinkratma nemasenu
21Ame nemasrum tsukamakuisha ayurata.
Kitiamakuisha umartin susata.
22Nu túrakmeka péṉker ajachua nu iniatsá̱rtatme
tura nú túramuja̱i̱ Uunt Yus ámin akirmáktatui.
23Araki̱a̱ násentuk wárik yumin itiatsuk
núnisaṉ áujmatkartiṉkia shuaran akajniuiti.
24Kajen nuwa̱ nuja̱i̱ je̱a̱ iwiaramunam pujustinkia péṉkerchaiti
antsu yajauch je̱a̱nam pujustin imiá péṉkeraiti.
Nekatai̱ jintinkratma íiniunak
25Yajaya̱ péṉker chicham antuktinkia
nekas kitiamamunam entsa micha umarakrin enentáiniam michakáasá awajkartana nuja̱i̱ métekete.
26Yusan enentáimtichu ainia nu nupetkam péṉker enentáimin iniarka púkuninmaya̱ entsa kuchaja̱i̱ pachimnair wapik ajana nuja̱i̱ métekete.
27Míshik núkap mukunataj tamasha péṉkerchaiti
núnisaṉ íi peṉkeri̱ṉ e̱a̱ktincha peṉkeri̱ awajkartichuiti.
28Aents tsuumainian wáiniat aneechuka
uunt pepru wenuke̱ sa̱a̱natkimiua núnisaiti.
©2009 Avant Ministries in cooperation with Wycliffe Bible Translators, Inc. All rights reserved.