Neka. 27
27
Ii urukua átiniaitiajⁱ nuna nekatai̱ jintinkratma
1Ántram “eem tímiatruattajai” tiip.
Warí kashin átatna nuka ámeka nékatsme.
2Amek shiir awajmamsaip
antsu chíkich shuar “nuka péṉkeraiti” turamarti.
3Kayasha tura naikmisha kijin áiniawai
tura netsé kajetáiri̱ṉkia núna naṉkaamas kijiniaiti.
4Suir kaje̱ntkamuka emesmawiti
tura akasmaktiniasha ¿yaki katsuntraint?
5Ú̱kar aneatniuja̱i̱sha naṉkaamas
nekas péṉkerka iisar paant chicharkatniua nuiti.
6Ii nemasri̱ anaṉkrak shiir awajtana
núja̱i̱ṉ nekas péṉkerka ii shiir awajtin amikrí̱ anentak asuttiana nuiti.
7Yurumá ejemaruka yuminniak nakitiawai
tura tsukamaka yapancha yuminia núnis nekapeawai.
8Aents ni nuṉke̱ya̱ jiinkí̱ aya wekaikiní̱ ajawa
nuka chiṉki yajá weak ni pasunke̱n enentáimtatsna núnisaiti.
9Asuitisha tura kuṉkuin ukatmamkar shiir enentáimtsujik.
Núnisaṉ ii amikri̱ shiir enentáiji̱a̱i̱ jintintramaj nusha ii enentái̱n waramtikiawai.
10Ame amikrumsha tura apá amikrí̱sha peṉké ikiukip.
Yatsumi je̱e̱n ame itiurchatrumji̱a̱i̱ peṉké weep.
Ii yachi̱ jeachat pujana núja̱i̱sha naṉkaamas ii amikrí̱ṉkia péṉker yáiṉkratniuiti.
11Uchiru, neka atá. Túrakum winia waramtikrustatme.
Núja̱i̱ṉkia yajauch túrutai̱ya̱ nunasha ayamprumaktatjai.
12Shuar péṉker enentáimniua nuka yajauchia nuna wainiak ú̱mprawai
antsu péṉker enentáimkiachua nuka tuke wáitsatniunmaani̱ wéawai.
13Nékashtai̱n wiki akikmatkatjai tusa tumashmataiya nuka pushiri̱ áitkiam juruktia.
Tura nuwa̱ wáinchatain tumashmataiyana nuka ni wariri̱ ujutukta.
14Aents ti káshik nantaki̱ ni írutramuri̱n nantainiachunak kakantar chichareakka
yajauchiniam yumiṉnartatui.
15Suir nekapin nuwa̱ nuka yumi yútakui makis kitiak ¿kanarchamnia ajachukait
16núnisaṉ nase emetamniakait
tura asuitisha untsuur uwejja̱i̱ weṉkukminkiait? Nú nuwa̱ka núnisaiti.
17Jirusha mái̱ jiruk atsaknatsuk.
Núnisaṉ aentska nuamtak aentsuk péṉker jintinniáiyamniaiti.
18Arakan péṉker wáinniua nuka ni nere̱n yuáttawai.
Núnisaṉ ni uuntri̱ wakeramuri̱n umía nuka shiir awajnástatui.
19Jimiará aents métek anturnaiya nuka entsá iis ni yapí wáinmamna núnisaiti.
20Jaka matsamtainmasha tura tuṉkuruánmasha pímiatsna
núnisaṉ aents iisa wakerutairi̱sha náṉkatkachuiti.
21Nekas kuítiashit tura kuríashit tusa unuitiai̱niam nekapkamsar íistinia
núnis aentsun chíkich aents shiir awajeana nui̱ paant nekanniuiti.
22Nétsea nuka arus ijiutai̱niam arusja̱i̱ métek eṉkear ijiurmasha
netse enentáimtairi̱nkia peṉké iniaisashtatui.
23Ame murikrumsha tura waakarme̱sha péṉker enentáimtusam wáinkiata.
24Kuítriniatniusha tura akupin átincha túkeka áchartiniaiti.
25Sa̱a̱k táasa̱i̱ṉ tusam núkap takarsatniuitme
túram iwiartukim wétiniaitme.
26Nuiṉkia ame murikrumi ure̱ja̱i̱ entsatái̱sha najanattame
tura chipiu kuítri̱ji̱a̱i̱ṉkia nuṉka sumarmaktatme.
27Tura chipiu muntsurí̱ṉkia amesha tura uchirmesha
núnisaṉ takartámniusha je̱e̱min pujuinia nu umarartiniaiti.
©2009 Avant Ministries in cooperation with Wycliffe Bible Translators, Inc. All rights reserved.