Neka. 24
24
-19-
1Yajauch túruinia nuja̱i̱ métek ajastaj tiip.
Tura núja̱i̱sha iruntratin wakerukaip.
2Ni enentái̱nkia aya yájauchiniak túrachminian túratniun enentáimin áiniawai
túmainiak yajauch ainia nunak áujmatin áiniawai.
-20-
3Aya nékamuja̱i̱ṉ je̱a̱sha je̱a̱mnatsuk tura péṉker enentáimturmaja̱i̱ pauri̱sha kaki ukuneatsuk.
4Núnisaṉ nékamuja̱i̱ṉ je̱á̱ init tesarmánum
ashí péṉker shíirmach íi ajamai áiniana nuja̱i̱ piákuiti.
-21-
5Neka nuka kakarmaja̱i̱sha naṉkaamasaiti
núnisaṉ neka ajastinkia kakaram átinji̱a̱i̱ naṉkaamasaiti.
6Tuma asamtai mesetnasha chichaman péṉker júsar najanainiawai
tura untsurí chichamprukmaja̱i̱ nupetmatainti.
-22-
7Nétsea nuka neka ajastinian jeachminiaiti
tuma asa pepru wá̱i̱ti̱a̱i̱niam chichaktinian jeatsui.
-23-
8Aya emesmaktinian enentáimniua nuka “aya yájauchiniak enentáimniuiti” tunattawai.
9Tura nétsea nuna enentáimtairi̱ṉkia tunaiti
núnisaṉ yajauch shuara túrutairi̱ṉkia muí̱jmiainti.
-24-
10Itiurchat ana nui̱ kakarmachuitkiumka nuja̱i̱ paant nekanattame.
-25-
11Jákatniunam jukimiu ainia nu aṉkant awajsarta
núnisaṉ jákatniunam sumamtikiamu ainia nusha uwemtikrarta.
12“Iikia nekaachmaji” tu tákumnisha
enentáin neka nuka áminkia ¿nekarmashtatuak?
Ame wakanmin wainia nuka ¿nekashtatuak?
Túrak ame túramna nuja̱i̱ métek ¿akirmákchattawak? Rum. 2:6
-26-
13Uchiru míshik tí peṉker asamtai yuátá.
Warí chinirí̱sha yumin asa yúu ajatchakait.
14Ame wakanim nekatai̱n yuminia núnisaṉ nekaprattawai.
Nu nekatai̱ wainkiamka ukunam péṉker pujustatme
tura ame nekas enentáimtamna nusha wainkiattame.
-27-
15Péṉker shuara nu peṉké ántram chícham jurusaip
túram ni je̱e̱sha emesturaip.
16Kame péṉkera túrin ainia nuka inia íniaku̱a̱ siati ejesha ataksha tímiatrusaṉ nantaktiatui
antsu yajauch shuar ainia nuka wáitsatniunam iniarartatui.
-28-
17Ame nemasrum itiurchatnum pujakui wararsaip
núnisaṉ tukumak iniarmataisha shiir enentáimsaip.
18Warí Uunt Yus nuna wainkiaṉka shiir enentáimsashtatui
antsu nui̱ṉkia ninkia kajerkashtatui.
-29-
19Yajauch shuar ainia nu kajerkaip
tura áintsamek ni pujuinia nui̱sha pachinkiaip.
20Warí yajauch shuarka tuke péṉker pujustinian wáinkiachartatui
tuma ásar ni iwiaakmari̱ṉkia shirikpia núnis kajinkiattawai.
-30-
21Uchiru, Uunt Yussha núnismek úunt akupniusha umirkata
tura chichaman mái̱ yapaji̱ ajá ainia núja̱i̱sha tsaniṉkiaip.
22Kame aya aneachma ti itiurchatja̱i̱ wáitias pujusártatui.
Warí Úunt Yusnancha tura úunt akupniu asutkiari̱ncha ¿yaki nekaat?
Tuma ásar yajauch shuarka Uunt Yus asutiámji títinian peṉké nékainiatsui.
Ti neka chikichnasha jintíamu
23Ju̱sha núnisaṉ ti neka ainia nuna chichame̱nte.
Uunt akupin eketainia nui̱ aents métekcha enentáimturtinkia nekas péṉkerchaiti.
24Akupin yajauch shuaran “ámeka péṉkeraitme” tákuiṉkia
nuiṉkia ashí shuar yajauchiji̱a̱i̱ yumiṉkrartatui tura chíkich nuṉkanmaya̱sha nú akupniun muí̱jkiartatui.
25Antsu eserat tusa chicharea nuka wararnastatui.
Warí, nuna túruinia ásar nu aentska péṉker pujutnum yumiṉnarartatui.
26Péṉker chichamja̱i̱ aimna nuka
shiir anturú ajamainti.
27Takatrum iwiarkata núnismek nuṉkemíncha takakmasta túram nuya̱ṉka je̱a̱ je̱a̱mprumta.
28Ame írutkamuram nekascha nuja̱i̱ ántram tsanumpruraip
tura nekascha nuja̱i̱ anaṉkawaip.
29Ni itiurtukma nuja̱i̱ métek nincha túratjai tiip.
Tura warí itiurtukma áitkiasnak yapajkiataj tu enentáimsaip.
30Nui̱k nakia nuna nuṉke̱ni̱ naṉkaamakmiajai
tura enentáincha ajarí̱n íirkutak támajai.
31Tura aya jáṉkik narak nupa̱k awamai
tura wenukesha sa̱a̱narun wainkiamjai.
32Wi nuna iisan winia enentái̱rja̱i̱ enentáimsamjai.
Túran nuna iisan unuimiátramjai.
33Atamprusam kánakum mesekramu tepamin tura miniakmamsam péṉker kanú pujamin
34ame atsumkarmesha yaitias winitrámtiatui
tura kuítrincha juáktinkia mesetja̱i̱ wininiana áinis arutmáttawai.
©2009 Avant Ministries in cooperation with Wycliffe Bible Translators, Inc. All rights reserved.