Neka. 2
2
Nekatai̱ péṉkera nuna shuaran suawai
1-2Uchiru, wi tájamna nu antukam tuke enentáimtakmeka jintíamu chicham antukta.
Tura “nekas enentái̱rja̱i̱ péṉker nekaataj” tusam wakerakmeka esettsam enentáimtusta.
3Kame ti wakera asam péṉker enentáimkia átin nekas seakmeka
4kuítian wáinkiatai tusar e̱a̱inia núnismek amesha neka átin e̱a̱ktá.
5Nuiṉkia Yus ashamkatniusha
núnisaṉ Uunt Yus urukuit nusha nekaattame.
6Nekas nekatai̱nkia Uunt Yusak amaawai,
tuma asa ni chichame̱ja̱i̱ péṉker wekasatniuncha tura unuimiártinniasha jintíawai.
7Péṉker wekainia núnaka Uunt Yus péṉker túruki̱ wétinian ti nekamtikiawai.
Ántsaṉ esetar wekainia núnaka tantara núnis ejamtairi̱nti.
8Núnisaṉ esetar wekainia núnaka
tura Nin umirin ainia nunasha péṉker wainiui.
9Nu asamtai ashí métekrak enentáimkiartin átinniasha ni túramuri̱ túa péṉkerait túa yajauchit
nu nekaatniusha péṉker túratniusha tura péṉker jintianam wekasatniusha nekaattame.
10Kame neka ajasmeka tura nékamna nuja̱i̱ shiir nekapeakmiṉkia jú̱nis arutmáttawai.
11Esetra enentáimin ajasu asam itiurchatnum waya̱shtatme.
Nu asamtai yajauchiniam wekasashtatme.
12Nu neka asam yajauchinmaya̱ tura péṉkeran nakitín ainia nuya̱sha aṉkant ajastatme.
13Nu aentska péṉker wekasatniun ikiuiniak kiritniunam wekainiawai.
14Núnisaṉ yajauchin túrawar warainiawai
tura netse túramun shiir enentáimtuiniak “tí shiirchak túraj” tuíniawai.
15Tura tui̱ wekainia nui̱sha nekasa nuna utuntiuiniawai.
Kame nusha mash nekaattame.
16-17Tura chíkich nuwa̱ yuminchin chichas anaṉkramattana kame natsa asaṉ niniumkamia nuna ikiukí̱
nú arant Yus íimmianum chichaman najanamia nunasha umichu nuwa̱nmaya̱ aṉkant awajtámsattawai.
18Nu nuwa̱ je̱e̱n waya̱na nuka jákatniunmaani̱ wénawai.
Tura ukunam jákaru matsamtai̱niam jeawartatui.
19Nú jintianam wena nuka atakka waketkichartatui.
Tuma ásar tuke iwiaaku átinian wáinkiachartatui.
20Tuma asamtai péṉker jintianam wekasata
túram naka jintia nu achikta.
21Warí anaṉmatsuk péṉkera túrinia nuka ju̱ nuṉkanam shiir pujusártatui,
22íksaṉ aents Yusan yajauch chicharin ainia nuka
tura anaṉkartin ainia nusha
nupa̱ uwé ajapatniua núnis ártatui.
©2009 Avant Ministries in cooperation with Wycliffe Bible Translators, Inc. All rights reserved.