Neka. 3
3
Ju̱ umikta tusar chicharma
1Uchiru, jintintiakun tímiajmena nu kajinmáttsuk tuke enentáimtusta.
2Ímiatrusmek umíakmeka núkap tsawant warasam pujustatme.
3Tura nekasa nusha waitnenkartutaisha peṉké iniaisaip.
Shauk nuṉkurtinia núnis tura enentáimin aarma áintsam kajinmatkichmin enentáimtusarta.
4Nuiṉkia Yussha tura aentsush waitnentakur shiir enentáimtutai̱ átatme.
5Wikia ashí nékajai tú enentáimtumatsuk
nekas enentáiji̱a̱i̱ Uunt Yus enentáimtusta.
6Ame tui̱ṉsha wekaittiam nui̱sha tuke enentáimtitia.
Túrakmiṉkia Niṉki naka ewekátmastatui.
7Tí nekáa ímianu enentáimtumatsuk
Uunt Yus ashamakum umirkam yajauch túrutaiṉkia iniaisata.
8Kame núiti ame aya̱shmi tsuákri̱ṉkia
tuma asa ikiakátmartatui.
9Kuítrumja̱i̱sha arakrumja̱i̱sha Uunt Yusa naari̱ shiir awajsata.
10Nu túrakmeka núkap taramkattame
núnisaṉ nijiamchirmesha tátramsashtatui.
11Uchiru, Uunt Yus jintintramuk asutiamna nu ántraiti tu enentáimsaip.
Tura chichartamkuisha kajerkaip.
12Warí apa ni uchirí̱n aneak asutiána
nútiksaṉ Uunt Yussha ni anea núnaka jintintiak asutniuiti.
13Aents nekatai̱ tura enentáimtai̱ susamua nuka warasti.
14Nekaatniuka kuitji̱a̱i̱ naṉkaamasaiti
tura neka átinkia kuriji̱a̱i̱ naṉkaamas yáintmaji.
15Shíirmach kaya kuítri̱ji̱a̱i̱sha naṉkaamasaiti.
Tura ame iisam wakerú ajamai írunna núja̱i̱sha naṉkaamas tí peṉkeraiti.
16Nekatai̱ jimiará péṉkeran amaawai. Untsuurí̱ni̱ṉkia núkap tsawant pujustinian
tura menanmaani̱ṉkia kuítriniatniun tura shiir enentáimtutai̱ átinian amaawai.
17Nekatai̱ji̱a̱i̱ wekasatniuka ti shíiraiti
tura níji̱a̱i̱ṉkia imiatkinchanum pujusminiaiti.
18Nekatai̱ṉkia iwiaaku pujutai̱ numi nere̱a núnisaiti.
Nu tuke yúakrum warastatrume.
19Uunt Yuska Ni nekatairi̱ji̱a̱i̱ nuṉkancha
tura Ni enentáimtairi̱ji̱a̱i̱ nayaimpincha najanamiayi.
20Núnisaṉ ti neka asa “nayants akannákti
tura nuṉkanka sanamtikti” takui̱ túrunamiayi.
21Uchiru, wi jintintiáitjiamna nu esetra enentáimtitia,
kame túa péṉkerait túa yajauchit iisam neka atá,
tura amek íimiasam tuke péṉker wekaitia.
22Núiti ame iwiaaku péṉker pujustintrumka.
Kame shuar iwiarmamuk sháukan nuṉkur shíirmach ajasua núnis awajtamui.
23Tuma asam tui̱ wekaittiam nui̱sha shuar tukumtsuk wekáa núnis naka wekaittiame.
24Tura kánakmesha sapijmiatsuk shiir kanartatme.
25Núnisaṉ aya aneachma ti itiurchat naṉkamakuisha
tura Yusan enentáimtichu chichaman jurutrámainiakuisha peṉké ashamkashtatme.
26Warí nu tsawant átatna nui̱ṉkia ame Yúsrum itiurchatnum iniara̱i̱m tusa péṉker waitmaktatui.
27Shuar nekas atsuma,
yáiṉtin jeakmeka nakittsuk yaiṉtá.
28Núnisaṉ ame írutramuram susamnia takakiatam
“weme waketuta, kashin amastai”
tútsuk nuya̱i̱k susata.
29Ámin shiir enentáimturmas pujuwa nu itiurchat awajsataj tu enentáimtusaip.
Warí shiir enentáimturmas pujuchukait.
30Núnisaṉ itiurchat awajtámsachua nu
peṉké ántram katsumkataj tiip.
31Shuar yajauchin túrinia nu wáinkium suir enentáimtusaip.
Núnismek ni túrana nusha túrawaip.
32Warí Uunt Yuska yajauchin enentáimtinia núnaka muí̱jiawai,
antsu esetar wekainia núnaka nekas péṉker amikri̱ya nútikias shiir enentáimtuiniawai.
33Yusan enentáimtatsna núnaka ní shuari̱miak Uunt Yus yajauchiji̱a̱i̱ yumiṉkraiti,
antsu Nin enentáimtana núnaka shiir pujustinian yumiṉkraiti.
34Wishikiartin ainia núnaka Uunt Yus nincha íksaṉ wishikrartatui,
antsu péejchachinkia waitnentrartatui.
35Neka ainia nuka paant awajsamu áiniawai
tura nétseka natsanmai̱ iisma áiniawai.
©2009 Avant Ministries in cooperation with Wycliffe Bible Translators, Inc. All rights reserved.