Neka. 1
1
1Israer shuarnum akupin Tawitia uchirí̱ Saramúṉkaitjiai. Nekatai̱n jintinkiartin sútamek chicham wi aarma ju̱ áiniawai.
2Aents nekáa enentáimias péṉker túrawarat tusan áaruitjiai.
3Núnisaṉ unuimiátar péṉker enentáimkia átinniasha
nuyá̱ esetar wekasatniuncha
tura yajauchinmaani̱ wekasashtinniasha nékamtikiainiajai.
4Ántsaṉ uchí enentái̱ enentáimin ainia nuna péṉker enentáimsatniun jintintiáiniajai.
Tura natsancha neka awajsam esetar enentáimias péṉker túrin árat tusan nékamtikiainiajai.
5Tura esetar enentáimna nuka wi jintíaj ju̱na antuk,
nékana núna naṉkaamas nekaattawai.
Kame neka nusha ashí túratniun wárik unuimiártatui.
6Tura chicharkamu asa enentáimsa sútamek chicham timia jintíamun
tura métektaku chicham jintíamuncha
núnisaṉ nékashtai̱ chichamnasha
nuyá̱ neka ainia nuna chichakmari̱n mash neka atí tusan ju̱na aajai.
7Neka átaj tákuṉka emka Uunt Yusan enentáimtus ashamak umirkatniuiti.
Tura nétseka nekatai̱n tura jintíamuncha nakitniuiti.
Yajauchinmaya̱ anear wekasat tusa jintíamu
8Uchiru, ame apa chichartamna nu anturkata,
núnisaṉ ame nuku jintintramna nusha kajerkam wekasaip.
9Kame umirkumka shíirmach iwiarmamak iwiarmampratniua núnis
tura shauk nuṉkurtinia imianú péṉker arutrámtiatui.
10Uchiru, yajauchi túrin ainia nu anaṉkramuk
11chichartamainiak “Iini̱i̱ pachiniata.
Umitmákcha ainia nu ú̱mprukar maar
12iwiaakuk wá̱a̱nam jaka matsamtai̱niam aju̱a̱tniua nútikiakur aya émeṉkaimi.
13Túrakur ashí kuit ainia nu kasampramuja̱i̱
yúpichuch wáinkiur kuítriniar ii je̱e̱ncha ipiakami.
14Wats iin pachiniata métek kuítriniawarmi”
15turamainiakuisha, uchiru, yajauchi túrin ainia nuya̱ṉka íkian ajasta.
16Warí yajauchin túrin ainia nuka maṉkartuataj tusar aya wáurtin áiniawai.
Tuma asamtai uchiru, umirkaip.
17Iis, chíṉkikia chiṉki achitiái̱n wainiak íkiaṉ yajá wéatsuk.
18Antsu nú aents anaṉka maṉkartuatniunmaya̱ pisatsuk nui̱ṉ pachiniui.
Túmainiak ni iwiaakmari̱n tsuumainnium pujuinian nekamainiatsui.
19Shuar aya takustaj tusa ti wakeruinia nuka
ni wakeramuri̱ amuichaiti antsu jákatniunam júwiti.
Nekatai̱ untsumma
20Jintiasha, paasa jintianmasha,
pepru á̱a̱ri̱ncha nekatai̱ untsumui.
21Untsurí aents iruntrar pujuinia nui̱sha
tura uunt péprunam wá̱i̱ti̱a̱i̱niam untsumuk
ni enentáimmiari̱ji̱a̱i̱ jú̱nis tawai.
22Esetra enentáimcha árum nútiram ¿urutáiṉ péṉker enentáimkia ajastarum?
Áintsaṉ wishikkiartin ainia nu ¿urutáiṉ wishikiartutai̱ncha iniaisarat?
Tura nékachu ainia nusha ¿urutáintsuk nekaatniuncha wakerukarat?
23Antsu wi tájana nuja̱i̱ seertarum.
Wi nekatai̱ asan wakantruja̱i̱ jintintiakun paant nékamtikiattajrume.
24Warí untsuamsha nakitramarme.
Ipiaamakuisha yaaksha anturtukchamai.
25Átumka tumá wi chichareamsha anturtukchamarme
tura jintintiamsha nakitramarme.
26Tuma asamtai atumí ashamtairi̱ jeartámmiatai sapijmiakrumnisha waitnentsuk wishikrattajrume.
27Kame emeskartin ashamkarumna nu uunt nase iniana núnis jeartámkuisha wishikrattajrume.
Ántsaṉ wáitsatniusha ti itiurchat nekapratin tarutrámmataisha wishikrattajrume.
28Nuiṉkia untsurkartatui túrasha ái̱kchartatjai
núnisaṉ wáuras e̱a̱tkartatui túrasha peṉké wáitkiachartatui.
29Warí nekatai̱n muí̱jkiár
Úunt Yusnasha ashamkacharmai.
30Tura wi jintíamuncha nakitrar
núnisaṉ wi chicharkamiaj nunasha umirtukcha ásar
31ni túrutairi̱ji̱a̱i̱ṉ yurumá ejemartinia ánis
ni yajauch jintinkiartutairtiuk emesnarartatui.
32Nekasaiti. Shuar ántichu ainia nu ni náṉkamas wekatairi̱ji̱a̱i̱ mantamnawartatui.
Núnisaṉ nétseka “Warí iikia tí peṉker pujatsjik” tuinia nuja̱i̱ amunkartatui.
33Túrasha winia chichamprun umíana nuka péṉker pujustatui,
kame ashammainian íṉkiuaksha sapijmiakchattawai.
©2009 Avant Ministries in cooperation with Wycliffe Bible Translators, Inc. All rights reserved.