Neka. 19
19
1Shuar kuítrincha ákusha esetar enentáimniuka,
netse tsanumniuja̱i̱ naṉkaamas péṉkeraiti.
2Núnisaṉ nékatsuk wariṉkish túratniuka péṉkerchaiti
tura wáurtus túrincha yajauchin íṉkiuawai.
3Aentska ni nékashtairi̱ji̱a̱i̱ṉ yajauch wekainiaiti.
Tura íksaṉ Uunt Yusan ni enentái̱ji̱a̱i̱ṉ makuwaiti.
4Kuitkia untsurí amikrintin awajkartiniaiti
tura kuítrinchanka ní shuarsha ikiuiniawai.
5Shuar nekas nékachiat chichawa nuka asutniátskeka iniainiáschattui
núnisaṉ wáitrincha peṉké uwemprashtatui.
6Shuar tsaṉka núnaka untsurí shuar e̱a̱iniawai
tura sutai ásar aṉkant aṉkant ni amikri̱ áiniawai.
7Kuítrinchanka imia ni yachi̱sha nakitiáiniamunmasha
¿itiurak ni amikrí̱sha ajapa ikiukcharat?
Túramusha ¿yája̱i̱ṉ chichastaj tákusha chichasat?
8Esetar antuk nekáa asa ni iwiaakmari̱ncha péṉker wáinniuiti.
Túmak péṉkera nuna wainkiattawai.
9Shuar nékasa nuna nékachiat nekascha chichawa nuka asutniátskeka iniainiáschattui
núnisaṉ wáitrinkia jákatniuiti.
10Netse iwiaramunam pujustinkia péṉkerchaiti.
Nuja̱i̱ naṉkaamas yajauchiti takarin ni úuntri̱n akupin ajastin.
11Shuar péṉker enentáimkia nuka kajektinniasha katsuntniuiti
tura kajeramsha ni páantniuri̱ji̱a̱i̱ páchichuiti.
12Uunt akupniu kajetáiri̱ṉkia úunt ya̱wa̱ kajeana ántsaiti
tura ni waitnenkartutairi̱ṉkia sana nupa̱n ukatna núnisaiti.
13Yajauch uchia nuka ni aparí̱n wáitkiawiti
tura nuwa̱ kajenka makis tuke kitiatáiniam pujustinia núnisaiti.
14Kuítniasha je̱a̱ncha apa ni uchirí̱n súwiti
antsu nuwa̱ péṉker enentáimkiaka Yusai̱ya̱iti.
15Shuar nakia nuka je̱á̱ aya tépenaiti.
Ni tumas tsukái wáitniuiti.
16Akupkámu chichaman umía nuka ni wakaní̱n wainiui
tura nuna nakitniuka jákatniuiti.
17Kuítrinchan sua nuka Uunt Yusan íkiawai
tura asamtai Uunt Yus patatas awaṉtuktiatui.
18Ame uchiram uchichia nui̱ṉ asutiáta
túrasha waurtukmaja̱i̱ṉkia emesra̱i̱j tu enentáimsam túrata.
19Shuar tí kajena nuka asutniátniuiti
tura asutiámnia auk ayampramka nú arant ajawiti.
20Shuar chichartamainiakuisha péṉker anturkata tura eseetamprataj turamainiakuisha umirkata.
Nu túrakmeka úuntach ajasmesha enentáimin átatme.
21Aentska ni túratta nuna ti enentáimtiniaiti.
Túrasha aya Uunt Yusa wakeramuri̱ṉ uminniuiti.
22Waitneṉkratai̱ṉkia aentsun waramtikiui.
Antsu waitrinji̱a̱i̱ṉkia kuítrincha átin péṉkeraiti.
23Uunt Yus ashamamuka iwiaaku pujustinnium jukartawai.
Tura aents aya núja̱i̱ṉ yajauchisha itit awajsachma ayamar pujustatui.
24Shuar nakia nuka piniṉnumia̱n uyu̱á jusa apaatniuṉkesha jeachuiti.
25Wishikkiartin ainia awatnármaja̱i̱ uchi enentáinkia ainia nusha nuna iisar enentáimprartatui.
Tura péṉker enentáimkia nu jintintiámka nuna núkap nekaattawai.
26Aparí̱n kasareak tura nukurí̱ncha ji̱i̱ki̱ akupniúka uchi aparí̱n natsanmai̱
tura áujmattai̱ awajniuiti.
27Uchiru, jintinkratai̱ nekatai̱nmaya̱ akantámkimia nuka anturkaip.
28Shuar wáitrinia nuka nekasa nuna wishiknuiti
tura Yusan enentáimtichuka yajauch túramun ú̱witi.
29Wishikkiartin ainia nu sumamtikiatniuka iwiarturma áiniawai
tura shuar netse ainia nusha awatnarartiniaiti.
©2009 Avant Ministries in cooperation with Wycliffe Bible Translators, Inc. All rights reserved.