Neka. 20
20
1Wíniuka wishikmai awajkartiniaiti. Tura awartiuka wáurmamtikiartiniaiti.
Tura nuja̱i̱ nampenka nékachu ajawiti.
2Úunt akupniu kajetái̱ri̱nkia úunt ya̱wa̱ ashamái̱ chichana núnisaiti
tuma asa ákajeana nuka niṉki yajauch awajmámniuiti.
3Mániktai támaitiat ikiuaka arantútai ajawiti.
Antsu nétseka aya mánaitniak wakeriniaiti.
4Nakia nuka takakmastin ai̱ṉ takakmatsui
tura júuktaj tákusha peṉké wáinkiashtatui.
5Aentsu enentáimmiari̱ entsa kuna ímianaitkiuisha
enentáimniuka tímianunak ejetuamniaiti.
6Untsurí aents ántuiniamunam “péṉker waitnenkartiniaitjiai” tuíniakuisha
nekas chichamtinniasha ¿yaki wainkiamniait?
7Péṉker enentáimniuka naka wekainiaiti
tuma asa ni uchirí̱sha shiir awajsamu ártatui.
8Sumamtikiur pujutái̱ri̱n úunt akupin pujakka
aya íimmiari̱ji̱a̱i̱ṉ ashí yajauchia núnaka nekamniaiti.
9¿Yaki wikia peṉké tunaarinchaitjiai tura winia enentái̱rka ti péṉkeraiti tiint?
10Kijin nekapmatai̱ tura esantí nekapmatai̱sha
métekcha ainia nuna Uunt Yuska mai̱ muí̱jiainiawai.
11Peṉké uchichisha imiatkincha
tura naka enentáimniuka ni túramuri̱ji̱a̱i̱ paant nékanui.
12Kuíshja̱i̱ṉkia antutainti tura jí̱ji̱a̱i̱ṉkia íimtainti.
Núnaka mái̱ metek Uunt Yus najankaiti.
13Aya kánin aip. Shintiaram takakmasta túrakmeka taramkattame.
14Súmana nu chichaak “timiá yajauchitia” tinia
ikiukí̱ wesa niṉki shiir awajmamui.
15Péṉker enentáimkia ainia nuna chichame̱ṉka
ju̱ nuṉkanam kuri tura shíirmach kaya irunainiana núja̱i̱ṉkia naṉkamakuiti.
16Nékashtai̱n wi akikmatkatjai tusa tumashmataiya nuka pushiri̱ áitkiam juruktia
tura wáinchatai ainia nuna tumashmataiya nusha akikmaamam ni warirí̱ṉsha ujutukta.
17Aentsu wáitri̱ṉkia yurumak yuu ajata tímianisaiti.
Túmaitiat ni wene̱ṉkia naikim tsarirpátniun áimiak apakua núnisaiti.
18Iruntrar chichamprukmaja̱i̱ takatcha ímiatrusaṉ uminniuiti.
Núnisaṉ péṉker enentáimturam anearmaja̱i̱ mesetcha najanata.
19Chíkich nekashtinia nu ujakmasha tsanumniuka ú̱chuiti.
Tuma asamtai tsanumin ainia nui̱ṉkia pachinkiaip.
20Ni aparí̱n nukurí̱ncha yajauchiniam yúmiṉkia núnaka
ni iwiaakmari̱n jurukí̱ kirit téenam apujsattawai.
21Kuítrintin wáurtus ajakka
nú kuitkia ukunmasha péṉker pujutnumaani̱ yumiṉkramu áchattui.
22“Wikia yapajmiáktájai” tiip antsu Uunt Yus niṉki nákasta.
Túram uwemtikramprattawai.
23Kijin nekapmatai̱ métekcha ainia nuka Úunt Yusja̱i̱ṉkia mui̱jmiai̱ áiniawai
núnisaṉ kijin nekapmatai̱ji̱a̱i̱ anaṉmar suruktincha péṉkerchaiti.
24Úunt Yusak aents wekasatniunka iwiarturuiti.
Nuíchuka Yusja̱i̱ wekasatniuncha aentssha ¿itiurak nekatⁱ?
25Aents enentáimtsuk “Yúsnaiti” tusa susayat awake enentáimna nuka peṉké itiurchatnum sumamaiti.
26Akupin nékaka ashí yajauch ainia nuna arant akupniuiti.
Túrayat nu arant kijin awaṉkar akaṉkékní̱ awajtinia núnis túriniaiti.
27Yusak aentsu wakaní̱ncha súsaiti tura wakankia tsáapniniaiti
tuma asa aentsu ashí enentáimiari̱ncha paant awajtiniaiti.
28Úunt akupniusha nekasa nuja̱i̱ métek tímiatrus waitneṉkratamuja̱i̱ uminiaitkiuṉka tuke akupú pujuwiti.
29Nátsaka wari áwiti tura úuntchikia jemperuru ásar enentáimiat arantumain áiniawai.
30Aents yajauchia nuka asutiár numpamkamuja̱i̱ péṉker enentáimtikramniaiti
tura asutkiaka enentáin péṉker awajniuiti.
©2009 Avant Ministries in cooperation with Wycliffe Bible Translators, Inc. All rights reserved.