Neka. 18
18
1Níniunak enentáimniuka ni írutramuri̱ enentáimmian páchitsuk aya ní wakeramunak umirtukarat tusa
enentáimtumas chíkich enentáimias chichainiamun emestiniaiti.
2Nétsea nuka unuimiártinniasha wakerichuiti.
Tura ni nékana núja̱i̱ṉ neka ímianu enentáimtumaiti.
3Yajauchia nuja̱i̱ natsanmai̱ ajatainti
núnisaṉ naṉkamantu enentáimtumatai̱ji̱a̱i̱ṉkia arantúkma áchatainti.
4Aentsu chichame̱ṉka entsa kuna tímianuiti
tura nekatai̱ṉkia ashints waana núnisaiti.
5Sumamtikin ainia nu umitmakua nuna waitnentak íksaṉ umikmatchan súmamtikiuṉka péṉkerchaiti.
6Nétsea nuna chichame̱ṉka aya mámtikniuiti
tura ni chichame̱ja̱i̱ṉ asutniáwiti.
7Nétsea nuka ni chichame̱ja̱i̱ṉ emestumawiti
túmak chapikji̱a̱i̱ suénam jiṉkiama pujana núnisaiti.
8Tsanumniu chichame̱ṉka yuminia núnisaiti
túmaitiat enentáin iniajmawiti.
9Núnisaṉ nakimshim takakma ainia nuka emesma yáchi̱nti.
10Uunt Yusa náari̱ṉkia kayaja̱i̱ je̱a̱mma núnisaiti
tura péṉker enentáimkia ainia nuka Niin uwemprattsa weanainiawai.
11Kuítrinniua nuka ní kuitri̱ṉ pepru wenuimiu
yakí̱ tanishmarma pujana tímianu enentáimtiniaiti.
12Emeskamnia nuka emka waantu enentáimtumatainmaya̱iti
tura shuar péejchachia nuna Yus páantin awajsattawai.
13Ántutsuk chichawa nuka netse asa natsantmai ajawiti.
14Shuar jaaksha ni enentái̱n shiir nekapeak suṉkuran katsunniuiti
antsu ti kúntuts nekapeakka ¿itiurak katsuntratiṉ?
15Ti enentáimniuka unuimiáki̱ wétinian wakeriniaiti
tura nékaka antukmaja̱i̱ unuimiawiti.
16Shuar wariṉkísha ántar sukarta nuka
nu túramuja̱i̱ ni shiir ajatairi̱ji̱a̱i̱ páantin nákam awajnastatui.
17Ni itiurchatri̱n niá niá ayamprumana nuka péṉkeran túrinia núnis ajawiti.
Túmaitiat nemasri̱ taa ni wáitramuri̱n paant awajtiniaiti.
18Aents kakaram áiniaksha tura itiurchat pujuinia nusha
yaki awakmakat tusa nakurúsar itiurchatnaka iwiaratin áiniawai.
19Shuar ni yachi̱ji̱a̱i̱ kajernaikia nu nawamnaikiachmin asa uunt pepru kayaja̱i̱ tanishmarma wajana núniniaiti
tura ni suíri̱sha jiru wáitiji̱a̱i̱ epenmia núnisaiti.
20Péṉker jintinkiartinia nuka yurumá ejemar warana áintsaiti.
Tura ni chichame̱n nerektatna nuna nútsurtatui.
21Ii chichame̱ṉ jákatniunam tura iwiaaku átinniumsha jurukminiaiti.
Tura tí chicháa nuka chichas túramuja̱i̱ métek yajauchincha tura péṉkernasha wainkiattawai.
22Nuatea nuka péṉkera nuna wainiui
tura Uunt Yusa waitnenkartutairi̱n wáinkiaiti.
23Kuítrinchaka péejchach ajas yainkiai tusa seamniuiti
antsu kuítrinnua nuka kakarmaja̱i̱ áimniuiti.
24Untsurí amikri̱nniuitkiursha itiurchatnum ejekartin ainia nusha nekaamnia áiniawai.
Túrasha yachiji̱a̱i̱sha naṉkaamas ii nekas amikri̱ awai.
©2009 Avant Ministries in cooperation with Wycliffe Bible Translators, Inc. All rights reserved.