Neka. 17
17
1Nampernum kajernaishim yurumin ainia núja̱i̱sha naṉkaamas
aya ápatkuk yúakri̱sha shiir aṉkant pujustinia nuiti naṉkamantuka.
2Uchi ni aparí̱n natsanmai̱ awajna núnaka iniatairi̱n esetar takaana nuka akupkáttawai.
Tura ashí ni uchirí̱ji̱a̱i̱ métek aparí̱ warirí̱n nuamtak nakarnáiniakuisha iniatai̱sha sunastin átatui.
3Kurincha kuítniasha jinium unuiniawai aya péṉkeri̱n juákat tusa.
Núnisaṉ Uunt Yuska shuara enentáimmiari̱n nekapkamas íiniaiti.
4Yajauch shuar tura wáitrin ainia nuka yajauch chichaman anturin áiniawai.
5Shuar kuítrinchan wishikiana nuka Uunt Yusan wishikiawai.
Tuma asamtai kuítrinchan wishikiainiak warainia nu shuarka páchitsuk asutniáwartatui.
6Úuntach ajasúka tiraṉkrumka asa shiir enentáimniuiti
tura úchikia ni aparí̱n shiir awajsamuiti.
7Shuar ti yajauchia nu nekas chichama nuna tití tusar nákaschatniuiti
tura úunt akupniun waitri̱sha nu naṉkaamas yajauchichukait.
8Shuar anaṉma emesmaktinian unuimiátainia nu, shíirmach kaya tímianu enentáimtuiniawai.
Tura nuna túruinia nuja̱i̱ ikiauntumainiawai.
9Yajauch túramtaisha etsertunaichuka tuke shiir nawamnaikiar pujuwiti.
Antsu yajauch túramtai etsertinkia ni amikrí̱ya̱ kanawiti.
10Shuar enentáimniuka chíchamnak ántiniaiti.
Antsu nétsea nuka naṉkaamas asutramsha peṉké ántichuiti.
11Shuar yajauchia nuka péṉkera nuna e̱a̱tsuk antsu aya yajauchiniak pujurniuiti.
Nuna túriṉkia nisha nútiksarmek túratarum timia átiniaiti.
12Shuar enentáinchajai iṉkiukatniuka
chai̱ uchirí̱ jurukmiája̱i̱sha naṉkaamas yajauchiti.
13Péṉker enentáimtamaitiat yajauch enentáimkiartiṉkia
ni je̱e̱ncha tuke núnisaṉ pujú átatui.
14Yajauch shuar kajernaik jiania nuka entsa pajankam piak metsana áintsaiti
tuma asamtai nú arant kajernaiki̱a̱i̱j tusarum iniaisatarum.
15Yajauch shuaran “péṉkeraitme” tuíniak péṉker shuaran makuiniana nuka
Úunt Yusja̱i̱ṉkia mái̱ mui̱jmiainti.
16Enentáimchasha nekas enentái̱ji̱a̱i̱ unuimiártaj táchasha akikmaksha
¿itiur unuimiártiṉ imiá nékachusha?
17Amikrí̱ṉkia tuke aneṉkratniuiti.
Antsu yátsutka kúntuts pujakrin shiir awajkartustinian akiinniuiti.
18Shuar imian enentáimchaka amikrí̱ tumashri̱n akikmatak atak íksaṉ tumashmanaik pujuwiti.
19Shuar mánitian wakerinia nuka tunáa túratniun jikiatniuiti.
Tura waantu enentáimtuma nuka emestumaktinian e̱a̱witi.
20Shuar aya yájauchiniak enentáimniuka péṉkera nuna peṉké wáinkiashtatui.
Tura ni chichame̱nak pachimniuka yajauchiniam iniartatui.
21Apa uchi enentáimchan yajutmarua nuka kúntuts awajeam wáitniuiti.
Tura uchi nétsea nuna aparí̱ṉkia warachuiti.
22Enentai warakuiṉkia péṉker tsuaka núnisaiti
tura kúntuts enentáimmiaka aya̱shniasha jaa awajniuiti.
23Yusan enentáimtichuka naka jintian emeskat tusa ú̱srik akikia útsuamka “ayu” tíniuiti.
24Naka enentáimniuka nékaskea nuna tuke wainniui.
Antsu nékachuka nuṉká náṉkatkamuri̱n yajá enentáimniuiti.
25Uchi nétsea nuka aparí̱n aya ákajniuiti.
Núnisaṉ nukurí̱ncha tí waitkiawiti.
26Aents umitmákcha asutiátin nekas péṉkerchaiti.
Núnisaṉ uuntri̱ ainia nusha péṉker túruiniá nékayatar katsumkatin yajauchiti.
27Shuar neka nuka chichaman wasurchaiti
núnisaṉ enentáimniuka aya ántiniaiti.
28Aents nétsesha chichatsuk aya antú pujakka tí neka núnis enentáimtunui.
Núnisaṉ aya antú pujaksha neka núnis enentáimtutainti.
©2009 Avant Ministries in cooperation with Wycliffe Bible Translators, Inc. All rights reserved.