Neka. 16
16
1Aents ju̱na umiktatjai tusa ni enentái̱ji̱a̱i̱ṉ iwiarnuiti
túrasha nekas uminkiattana nuka Úunt Yusai̱ya̱inti.
2Aents ni enentáimtumaska “tí peṉker túrajai” tu enentáimtumaiti
túrasha núnaka Uunt Yus nekasashit tusa nekapma íiniaiti.
3Ame takatrum Uunt Yus íktusta.
Nu túrakmiṉkia ame enentáimsamurmesha nékaseṉ jintiurmattawai.
4Uunt Yus ashí ni wakera nuja̱i̱ métek ashí uminkiati tusa najankaiti.
Nu arantcha Nin enentáimtichu asutniátin tsawantcha jeartiniaiti.
5Shuar naṉkamantu enentáimtumin ainia núnaka Uunt Yus nakitniuiti.
Tuma asa asuttsuk iniaisashtatui.
6Nekasa nuja̱i̱ tura waitnenkartutai̱ji̱a̱i̱ yajauch túrutai̱ tsaṉkuramuiti
ántsaṉ aents Uunt Yusan ashamak yajauchinmaya̱ kanaawiti.
7Uunt Yus iisam aents péṉker túrakuiṉkia
ni nemasri̱n takakkuisha aṉkant awajniuiti.
8Anaṉmar takakmasmaja̱i̱ núkap ikiauntumkamuja̱i̱ṉkia
nékaskea nuja̱i̱ ishichik takustin imiá péṉkeraiti.
9Aentska ni wakeramuri̱niak umiktaj tu enentáimniuiti.
Antsu Uunt Yuska esetrar wekasatniun jintinniuiti.
10Uunt Yus tana nuja̱i̱ métek akupniúsha umimtikniuiti
tura náṉkamsaṉka sumamtikchaiti.
11Kijin nekapmatai̱ péṉkeraitkiuṉka nuka Yúsnaiti
tuma asa nekapmatai̱ nekasketkuṉka Ni najankamu áiniawai.
12Uunt akupin yajauchin túrakka muí̱jmiainti.
Antsu péṉker túrakka akupniúsha tuke kakaram ajas akupin átatui.
13Shuar nekas enentáiji̱a̱i̱ chicháa núnaka úunt akupniusha anenaiti
tura péṉker túrinniaka shiir enentáimtiniaiti.
14Úunt akupniu kajetái̱ri̱ṉkia jákatin chichaman takakuiti
tura neka ainia nuka atsaṉmamtiniaiti.
15Úunt akupniu waratáiri̱ṉkia iwiaakma takakua áintsaiti.
Tuma asa yumi arakan péṉker tsakatma núnisaiti.
16Ti neka átinkia kuri wakerajnia nunasha naṉkaamasaiti.
Tura enentáimin átinkia kuítji̱a̱i̱sha naṉkaamasaiti.
17Naka enentáimkia ainia nuka yajauchia nuyá̱ kanakí̱ wekainiawai.
Ni iwiaakmari̱n péṉker wainnia áintsaṉ ni jinti̱ncha péṉker wáinnuiti.
18Waantu enentáimtumastiṉkia itiurchatnum jukartiniaiti.
Tura naṉkamantu enentáimtumastiṉkia aya̱shniasha wakanniasha emesniuiti.
19Waantu enentáimtuma ainia nu werir atankímiuri̱ akantúnairtinja̱i̱nkia,
péejchachiji̱a̱i̱ métek imiancha enentáimtumastin imiá péṉkeraiti.
20Nekas chichaman ántinia nuka péṉkera nuna wáinkiatnuiti.
Tura Uunt Yusan enentáimtus pujaaka ti warawiti.
21Nékaka péṉker enentáimkiaiti
nuyá̱ shiir chichamtiṉkia nuna núkap nekaattawai.
22Shuar enentáimniua nuka púkuninmaya̱ entsa kitiakan imikniua núnisaiti.
Antsu nétseka peṉké jintintiáchminiaiti.
23Neka chichame̱ṉka péṉker anturú ajamainti
tura ánturusha “nekas tawai” tíniuiti.
24Péṉker shuara chichame̱ṉka mishkia núnisaiti.
Tuma asa enentáinniasha aya̱shniasha shiir ayamtikniuiti.
25Aentsti péṉkertsuk túraja tu enentáimtai̱ awai.
Túrasha jintia awajirar wekáa núnis enentáimtaiṉkia jákatniunam jeawai.
26Shuaran ní tsukari̱n takamtikiui
tura takakmasat tusa utsúawai.
27Shuar yajauchia nuka ni chichame̱ja̱i̱ ni írutramuri̱n yajauch awajniuiti,
ni chichame̱sha ji keá núnisaiti.
28Shuar wari kajena nuka aya mánaiktinniak e̱a̱witi
tura tsanumniua nuka amikrí̱ncha natúpáiniaiti.
29Aents yajauchikia ní shuaran anaṉniuiti
tura yajauch jintianmaani̱ júuwiti.
30Shuar yajauchin túrataj tusa enentáimna nuka ni ji̱n anu mitsuma íimniuiti
tura ni wene̱ja̱i̱sha chúchutmasan ajawiti.
31Péṉker enentáimias túrin asa we̱a̱mar jempée puju ajasúka arantúkmaiti.
32Shuar kajetan katsunniuka kakarmancha naṉkakaiti.
Tura iik nupetmamkatniuka untsurí nupetkatniuja̱i̱sha naṉkaamasaiti.
33Aents yaki awakmakat tusa nakuruiniakuisha aya Uunt Yusak awakmáktinniaka súwiti.
©2009 Avant Ministries in cooperation with Wycliffe Bible Translators, Inc. All rights reserved.