Neka. 13
13
1Uchi enentáimniua nuka ni aparí̱ chichareamun péṉker anturniuiti
kame wishikkiartinkia ni aparí̱ chichareamsha ántichuiti.
2Aents péṉker chichamtin ainia nuka péṉkeran wáinkiartatui.
Tura yajauch enentáimkia ainia nuka aya yajauchiniak wáinkiartatui.
3Shuar aetak enentáimias chichaana nuka niṉki péṉker awajmamui
antsu náṉkamas chichawa nuka niṉki emestumawai.
4Shuar nakia nuka enentái̱ji̱a̱i̱ṉ aya wákerin asa peṉké wáitmachuiti.
Antsu ásumpia nuka atsumcha átatui.
5Shuar wáitrichuka wait chichaman nakitniuiti.
Antsu Yusan enentáimtichua nuka nakitrámu tura natsanmai̱ ajawiti.
6Shuar yajauchin túrichu wekaana núnaka ni péṉker wekatai̱ri̱n ayampriniaiti.
Antsu shuar yajauchia núnaka ni yajauch túrutairi̱n imia nin émeseawai.
7Shuar kuítian takakchiat kuítrinniua ánis enentáimin írunui
tura shuar kuítrinniuitiat kuítri̱ncha ánis enentáimniusha awai.
8Shuar kuítrinniua nuka ni kuítri̱ji̱a̱i̱ṉ akimiatmamkamniaiti
tura kuítrincha nuka áujmatmancha anturmamchaiti.
9Yusan enentáimtin ainia nuka shirikip ekemákam tsáapin shiir ajana ánis waramtikin áiniawai
tura Yusan enentáimtichu ainia nuka shirikip ekemákmaitiat wárik kajinnia áinis áiniawai.
10Shuar naṉkamantu enentáimtumana nuka aya mánaiktinniak enentáimniuiti.
Antsu chichaream ántinia nuka tí neka áiniawai.
11Kuitcha ántar ainia nui̱ ájapeamka ti wárichik amuiniaiti
antsu takakmasar ishichkisha ikiurmakar awajmaka káwenaiti.
12Shuar nákana nuna wárik wáinchaka kúntuts nekapeawai.
Antsu ni nákana nuna umikkia ni enentái̱ waramtikiui.
13Shuar akupeamu antuktinian nakitia nuka imia niṉki súmamui.
Antsu shuar nuna antuk umía nuka shiir enentáimtutainti.
14Péṉker enentáimkia nu jintinkiartamuka tsuumainiumia̱ uwemtikiui.
Kame púkuninmaya̱ entsa shuara kitiakén imiktana núnisaṉ nu shuaran ikiakáwai.
15Shuar péṉker enentáin takakna núnaka ni péṉkeri̱ji̱a̱i̱ṉ arantútainti.
Antsu shuar wishikiartin ainia nuka aya itiurchatnumaṉ wekain áiniawai.
16Ashí aents tí enentáimin ainia nuka ni nékamuriji̱a̱i̱ túrin áiniawai.
Antsu nétsea núnaka ni netse túramuri̱ṉ paant awajniuiti.
17Yajauch shuara nuka akatmampramun étserea nui̱ itiurchat enentáimtikniuiti.
Antsu péṉker shuara nuka chícham akatmampramun étserea nui̱ tsuaka áinis shiir awajniuiti.
18Shuar chichaream ántichua nuka kuítri̱ncha natsanmai̱ ajawiti
antsu chichaman tí peṉker ántinia nuka arantúkmaiti.
19Shuar ni takatrí̱n iniamar amukka warawiti.
Tura shuar nétsea nuka mui̱jmiainniumia̱ kanaktinian peṉké nakitniuiti.
20Shuar tí neka ainia nuja̱i̱ irunar wekaana nu tí neka átatui
antsu netse shuar ainia nuja̱i̱ irunar wekaana nu wáitsattawai.
21Yajauch shuar ainia núnaka yajauchia nu pataatukartatui.
Antsu shuar péṉkerka péṉkerja̱i̱ akinkiartatui.
22Shuar péṉker enentáimniuka ni warirí̱n takakna núnaka ni uchirí̱n tura tiraṉki̱ncha jaak ikiurniuiti.
Antsu yajauch shuara nuna warirí̱nkia péṉker shuar takusarat tusar ikiursamu áiniawai.
23Shuar kuítrincha nuna nuṉke̱n takakmasa arakma yurumak ti ákuisha nekasa nuja̱i̱ ayamprin atsakuiṉkia atannakminiaiti.
24Shuar ni uchirí̱n asutiatsna nuka aneatsui
tura anea nuka úchichiniak péṉker ati tusa asutiawai.
25Shuar Yusan enentáimta nuka iwiaaku pujustaj tusa yurumui
antsu shuar yajauchia nuna yurumkari̱ṉkia táastatui.
©2009 Avant Ministries in cooperation with Wycliffe Bible Translators, Inc. All rights reserved.