Neka. 12
12
1Shuar unuimiártinian wakera nuka nekatai̱n aneawai
tura shuar chicharam antuktinian nakitia nuka enentáinchaiti.
2Péṉkera túrin ainia núnaka Uunt Yuska “péṉker túrame” tawai.
Tura shuar yajauch enentáin takakainia núnaka sumamtikiui.
3Shuar yajauchin túrinia nuka tariar wajastinian tujinniuiti.
Antsu shuar péṉker enentáimkia ainia nuka numi ni kaṉkape̱ja̱i̱ achimiar wajana ánis áiniawai.
4Péṉker nuwa̱a nuka ni áishri̱ncha arantuk shiir enentáimtikniuiti
antsu yajauch nuwa̱a nuka ukunchí imiámín suṉkura núnisaiti.
5Péṉker enentáimin ainia nuka péṉkera nuna jintiniaiti
antsu Yusan enentáimtichu ainia nuna jintíamuri̱ṉkia anaṉkartuamnia áiniawai.
6Yusan enentáimtichu ainia nu umitmákchan maatai tusar ú̱mkan chichaman najatainiakuisha
péṉker enentáimin ainia nu ni chichame̱ja̱i̱ ayampruiniawai.
7Yusan enentáimtichu ainia nuka emesnarar atsuartatui.
Antsu Niin shiir enentáimtuinia nuna shuari̱nkia tuke pujusártatui.
8Shuar esetar enentáimias jintinia nuka ni nékamuja̱i̱ shiir awajsamu áiniawai
tura yajauchia nuka nakitniaruiti.
9Yurumkari̱ncha takakchiat naṉkamantu enentáimtumana núja̱i̱ṉkia imiancha enentáimtutaintiat takarniúrtinia núiti imiá nekas péṉkerka.
10Shuar ni taṉkuri̱n waitnenniua nuka winia taṉkur yurumá ejemar pujusat tusa waitnentas wainiui
antsu shuar ni taṉkuri̱n waitnentsuk kajerniua nuka ni taṉkuri̱ tsukamá nunasha nékatsui.
11Shuar takakmas arakmana nuka taramak pujuwiti
tura chíkichkia antra nuna enentáimias pujú asa enentáimchaiti.
12Yusan enentáimtichu ainia nuka yajauchi túrin ata̱a̱rman irutmampratniun wakerin áiniawai.
Antsu péṉkera túrinkia árak péṉker kaṉkapruru neré̱ wajawa ímiatrusaiti.
13Shuar Yusan enentáimtichua nuka ní waitri̱ji̱a̱i̱ṉ jiṉkianáikiuiti.
Antsu péṉker enentáimniua nuka wáitian chichachu asa itiurchatnumia̱ aṉkant wekaawai.
14Shuar péṉker chichamtinkia ni chichame̱n numí neré̱ yuá ejemarua núnis nekapniuiti.
Núnisaṉ ni takatrí̱ncha akinkiáttawai.
15Nétseka wi túrajna ju̱ka ashí péṉkeraiti tu enentáimniuiti.
Túrasha nékaaka chicharmaka ántiniaiti.
16Nétseka kajetáiri̱n wárik iniakmawiti.
Antsu péṉker enentáimniuka kajetá katsuntniuiti.
17Étserna nu nekasa nuna paant awajniuiti.
Antsu nekaschan étserna nu páchim enentáimtikniuiti.
18Shuar yajauch chichamtinkia ni chichame̱ja̱i̱ puya̱ja̱i̱ íjiutniua áitkias ni írutkamuri̱ enentái̱n wáitkiawai
antsu péṉker chichamtinia nuna chichame̱nka tsuákaiti.
19Shuar nekas chichaawa nuka tuke pujuttawai
antsu wáitrinkia yamaichik pujawai.
20Yajauch túratniun wakeruinia nuka aya anaṉkartuatniunak enentáimin áiniawai.
Antsu péṉker pujustinian chicharainia nuka warainiawai.
21Shuar péṉker enentáimkia ainia nuka peṉké wáitsachartatui
antsu yajauch shuar ainia nuka ti wáitsartatui.
22Wáitrin ainia nuna Uunt Yus muí̱jiawai.
Antsu péṉkeran túruinia núnaka shiir enentáimtuiniawai.
23Shuar péṉker enentáimkia nuka unuimiármari̱n etserchaiti.
Antsu shuar nétsea nuka ni túramuri̱ji̱a̱i̱ṉ iniakmamui.
24Shuar kakaram takakma nuka nupetmawai
antsu nakia nuka kakaram takamtiktainti.
25Shuar enentáimias wáitiana nuka jata nekapniuiti.
Túman shiir chichama nu waramtikniuiti.
26Shuar péṉkera túrinkia ni írutramuri̱n péṉkeran jintinniuiti.
Antsu Yusan enentáimtichuka awajimtikiainiawai.
27Shuar nakia nuka kuntinian itiayatan iniarátniun peṉké nakitniuiti.
Antsu shuar ásumpia nuka takakma ajat nekapniuiti.
28Yusan umirak wekáa nuka iwiaaku pujawai.
Nú jintianmaani̱ṉkia jákatniuka atsawai.
©2009 Avant Ministries in cooperation with Wycliffe Bible Translators, Inc. All rights reserved.