Neka. 14
14
1Péṉker nuwa̱ nuka áishri̱ncha tura uchirí̱ncha péṉkera nui̱ ikiakáiniaiti,
antsu enentáincha nuwa̱ nuka ikiakátsuk ni chichame̱ja̱i̱ṉ ni shuari̱n emesniuiti.
2Shuar péṉker jintianam wekainia nuka Uunt Yusan arantuiniawai
tura yajauch jintianam wekainia nuka Úunt Yusnasha arantuiniatsui.
3Netse shuarka ni waantu enentáimtumatai̱ chichame̱ja̱i̱ṉ asutniáwiti.
Antsu shuar neka ainia núnaka ni chichame̱n ayampriniaiti.
4Waakaja̱i̱nchuka núkap takakmaschamniaiti
antsu waakaja̱i̱nkia kakaram takakmakur kuit núkap ikiauṉkamniaiti.
5Wáitrichua nuka nékana nuna etserniuiti
antsu wáitrinkia ímiatrus etserchaiti.
6Shuar wishikkiartin ainia nu nekatai̱n wáinkiataj tusa ti e̱a̱wai tura e̱a̱ksha peṉké waintsui.
Antsu shuar tí neka núnaka nekaatniusha níji̱a̱i̱ṉkia ti yúpichuchiti.
7Aents nétsea nuya̱ṉka kanaktia.
Warí ni chichame̱ya̱ṉka péṉkera nu nekaashtatme.
8Aents tí enentáimniuka ni nékamuriji̱a̱i̱ emka íimiawiti.
Antsu nétseka ni nékashtairi̱ji̱a̱i̱ṉ anaṉnawiti.
9Netse shuar ainia nuka ni makumarmari̱n wishikiainiawai.
Tura péṉker shuarka nuamtak péṉker enentáimtunainiawai.
10Shuar ni enentái̱n tí kuntuts enentáimkiuṉka paant nekapmamui.
Núnisaṉ warakuisha shuar nékashtai̱ niji̱a̱i̱ waraschamniaiti.
11Yusan enentáimtichu shuara je̱e̱ṉkia mashiartatui
antsu péṉkera túrin shuara je̱e̱ṉkia imianchaitiat tuke emki̱ wétatui.
12Jintia awai shuaran péṉkernumaani̱yapi jurawa tu enentáimtikna nu
túrasha nú jintiaka jákatniunam jukartawai.
13Shuar ni enentái̱n najaimiayat “waraajai” tíchatpiash
tura wishiasua umirai nui̱sha tuke kúntuts enentáimtiatui.
14Shuar nétsea nu ni túrutairi̱ji̱a̱i̱ waraawai
núnisaṉ shuar péṉkera nuna túrak ti waraawai.
15Shuar uchi enentái̱ eṉkea nuka ashí antukmaja̱i̱ṉᵏⁱ nekasaiti tíniuiti.
Antsu shuar katsunta nuka itiurak wekaaj tusa tuke ii pujurniuiti.
16Shuar neka nuka tsuumai̱ ana nui̱ waya̱wa̱i̱j tusa ashamak íkian wekaawai
antsu netse shuara nuka “nékaitjiai” tu enentáimtumas chikichan peṉké arantichuiti.
17Shuar kajé kajeta nuka péṉker enentáimtsuk náṉkamas wáurin áiniawai.
Núnisaṉ áishmaṉ yajauchikia nakitrámuiti.
18Shuar uchi enentái̱ eṉkea nuka netse túratniun sunastatui.
Tura shuar péṉker enentáimkia ainia nuka péṉker túramuja̱i̱ nekatai̱ sunastatui.
19Yajauchin túrin ainia nu péṉkera túrin ainia nuna tsuntsumpruáwartatui
núnisaṉ Yusan enentáimtichusha péṉkera túrin ainia nuna wáitiri̱n seatái tusar nákasar wajasártatui.
20Shuar kuítrincha núnaka imia ni amikrí̱sha muí̱jiainiawai.
Tura shuar kuítrinniua nuka tí nukap amikrintin áiniawai.
21Shuar ni írutramuri̱n aneachkuṉka nu shuar tunaan túrawai.
Tura antsu shuar kuítrincha nuna waitnenta nuka warastinian takakui.
22Shuar yajauchin túrataj tusa e̱a̱inia nu awajiniatsuk.
Péṉkeran túrataj tusa e̱a̱inia nuka nekasa nuna tura waitnenkartutai̱ncha wáinkiachartatuak.
23Ti takakmakmeka ame takatruminia̱ núkap achiktatme
antsu aya chichamak pujurniuitkiumka kuítrincha átatme.
24Shuar neka ainia nuka péṉkera nu takustinji̱a̱i̱ akinkiatniuiti.
Antsu shuar enentái̱ncha ainia nusha tuke enentáimchak jákartatui.
25Nekasja̱i̱ chichainia nuka shuara iwiaakmari̱n uwemtikiawai.
Antsu anaṉkartin shuarka aya wáitriniaiti.
26Yusan arantuinia nuka niin enentáimtusmin áiniawai.
Tura nu enentáimtamuri̱ji̱a̱i̱ ni uchirí̱sha sapijmiatsuk matsamin ártatui.
27Iwiaaku pujustinkia Uunt Yus arantúktinji̱a̱i̱ áminiaiti
kame jákatniunmaya̱ aṉkant awajkartiniaiti.
28Untsurí shuar péprunam matsatáiniakuiṉkia úunt akupin shiir awajsamuiti.
Antsu péprunam ishichik pujuiniamunmaṉka anairamu ainia nu emesnakartatui.
29Shuar kajetáiri̱n katsuntea nuka ti nekas nékaiti.
Antsu ti wárik kajena nuka netse enentáimmiari̱n shuarnumsha ti paant iniakmamui.
30Aṉkant enentáimmiaja̱i̱ aya̱shsha shiir nekapniuiti.
Antsu chikichna wakerutakur suir enentáimtustinkia ukunchi̱n kama yuá amúa núnis awajniuiti.
31Shuar kuítrinchan waitnentatsna nuka ashí aentstin najatmamiaj nuna umirtsuk wishikiainiawai.
Antsu shuar kuítrinchan shiir awajainia nuka núnisaṉ Yusan shiir awajainiawai.
32Yajauch shuar ainia nu ni yajauchiri̱ji̱a̱i̱ṉ init najarma ánis áiniawai
tura shuar péṉker enentáimin ainia nuka jákatin tsawant jeamtaisha uwemprartatji tusar nákasar shiir pujuiniawai.
33Shuar péṉker enentáimkia nuna enentái̱nkia nekatai̱ pujurui.
Tura netse shuar matsatainia nuiṉkia nekatai̱ peṉké atsawai.
34Aya péṉkera núja̱i̱ṉkia matsatkamusha páantin átin awai.
Antsu náṉkamas írutkamunmasha yajauch túrutai̱ ti pampaakui̱ṉkia natsanmai̱ ajaktatui.
35Úunt akupniu takarniúri̱ umin shuaraitkiuṉka úunt akupniu waitnenkartutairi̱n achíakui
tura ni takarniúri̱ natsanmainian túrakka úunt akupniu kajetáiri̱n wainkiattawai.
©2009 Avant Ministries in cooperation with Wycliffe Bible Translators, Inc. All rights reserved.