Neka. 11
11
1Kijin nekapmatai̱ métekcha núnaka Uunt Yus nakitiawai
antsu kijin nekapmatai̱ métekea núnaka warareawai.
2Naṉkamantu enentáimtumataiṉkia natsanmai̱ awajkartiniaiti.
Antsu péejchach ainia nuka neka áiniawai.
3Shuar péṉker enentáimkia ainia núnaka ni péṉker enentáimmiak péṉkernumaani̱ júawai.
Antsu ti yajauchin túrin ainia núnaka ni túrutairi̱ṉ emesniuiti.
4Yusa kajetáiri̱ tsawant jeatta nui̱ṉkia kuítriniamuka peṉké ántar ajastatui.
Antsu aya péṉker túrutairi̱ṉ jákatniunmaya̱ uwemtikrattawai.
5Péṉker enentáimkia nuka péṉker túrutairi̱ṉ péṉkernumaani̱ wekasatniun iwiartiniaiti.
Tura Yusan enentáimtichu ainia nuka ni yajauchiri̱ji̱a̱i̱ṉ wáitsattawai.
6Shuar naka enentáimkia núnaka ni péṉker túrutairi̱ṉ aṉkant awajui.
Antsu anaṉkartiṉkia ni wakerutairi̱ji̱a̱i̱ṉ jiṉkiamua núnisaiti.
7Yusan enentáimtichu kuítrinniuitkiusha jákaṉka
ni túrataj timiasha tura enentáimsamusha nui̱ṉ mash amukáttawai.
8Shuar péṉker enentáimkia nuka wáitsatniunmaya̱ aṉkant awajnásuiti.
Túrunamtai Yusan enentáimtichuka íksaṉ ní waitsatniuri̱n súmamui.
9Shuar yajauch chichamtin ainia nuka ní chichame̱ja̱i̱ṉ ni írutramuri̱ncha emesmawai.
Túrasha péṉker enentáimin ainia nuka nekatai̱ji̱a̱i̱ aṉkant ajasártatui.
10Péṉker enentáimin ainia nu péṉker túramuja̱i̱ uunt péprunam matsatainia nusha warainiawai.
Antsu yajauch shuar jakamtaikia wará áiniawai.
11Péṉker enentáimin pujuinia nu yáiniamuja̱i̱ péprusha shiir awajnawai
tura yajauch shuara chichame̱ṉka nú peprun émeseawai.
12Shuar péṉker enentáimkiachua nuka ní irutramuri̱ncha áujmatniuiti
tura shuar péṉker enentáimkia nuka áujmatchaiti.
13Tsanumniua nuka ú̱kmancha paant etserkiní̱ wekainiuiti.
Tura chichama etsercha nuka aya niṉki emeṉkáiniaiti.
14Péprunam uuntri̱ péṉker jintinkiartin atsakuiṉkia nupetmakchamniaiti.
Antsu untsurí chicharkartinji̱a̱i̱ṉkia nupetmakminiaiti.
15Nékashtai̱n tumashri̱n akikmatniua nuka itit enentáimtumawiti.
Antsu nékashtai̱n tumashri̱n akikmatkatniun nakitniua nuka itit awajsachma pujuwiti.
16Tsaṉka nuwa̱ núnaka shiir enentáimtin áiniawai.
Tura shuar kuítniak enentáimtus ti kakaram takakmassha aya kuítriniak juákuiti.
17Shuar waitnenkartinia nuka ímia niṉki shiir júwawai
antsu ti kajena nuka ímia niṉki yajauch júwawai.
18Yusan enentáimtichua nuna túrutairi̱ṉkia ántraja̱i̱ akikma áiniawai.
Antsu nekasa nuja̱i̱ túrinia nuka ukunam amukachminia nuja̱i̱ akinkiáttawai.
19Péṉker túratniuka iwiaaku pujustinnium jukartiniaiti.
Núnisaṉ yajauchin túrinia nusha jákatniunmaani̱ wénawai.
20Peṉké yajauch enentáimin ainia núnaka Uunt Yus muí̱jiainiawai
tura ímiatrus péṉker wekainiaṉka shiir enentáimtuiniawai.
21Yajauchia nuka tsaṉkurnatsuk asutniátniukete
antsu péṉker enentáimkia ainia nuna shuari̱ṉkia aṉkant awajnásartatui.
22Nuwa̱ shíirmachitiat esetar enentáimcha nuka
kuchi nuji̱niam ji̱i̱r sarsea kuriji̱a̱i̱ najanamu netuamua núnisaiti.
23Shuar péṉker enentáimkiaka aya péṉkernak wakeriniaiti.
Antsu Yusan enentáimtichu ainia nuka Yusa kajetáiri̱n jeariártatui.
24Aents ni warirí̱n sukartinia nuka patatnástatui.
Antsu súrikia ni warirí̱n takakna nuna naṉkaamas takustaj tákusha aya jú̱nisaṉ ajastiniaiti.
25Shuar tsaṉka enentái̱ takakna nuka nuna núkap takustatui.
Núnisaṉ chikichan yayá̱ nuka enentái̱n imiktiniaiti nuna tura nuka nisha núnisaṉ imiktúntratui.
26Shuar araka nere̱n surimiak u̱u̱k ikiuwa núnaka ni shuar yajauchiniam yumiṉkiainiawai
antsu shuar súrana núnaka shiir enentáimtuiniawai.
27Shuar péṉkera nuna túrataj tusa wakerinkia waitnentramuiti.
Antsu yajauchin e̱á̱a̱ nuka yajauchiniam wáitsattawai.
28Shuar yaintkiattawai tusa ni kuítri̱n ti enentáimta nuka numí nuke̱ káker mash ajá núnisaiti.
Antsu péṉkera túrinia nuka numi ti nukara ukat ukata núnisaiti.
29Shuar ni shuari̱n péṉker waincha nuka aya wa̱a̱k juwawai.
Shuar enentáimcha nuka neka nuna takarniúri̱ ajawai.
30Péṉker enentáimin túrana nu numi nereana núnisaṉ iwiaaku átinian nereawai.
Ántsaṉ Yusna átinian jintintiáinia nu nekas nékaiti. Mat. 7:17-20; 12:33-35; Ruk. 6:43-45
31Kame esetar wekain ainia nuka yajauchi túrinji̱a̱i̱ Yusan enentáimtichu ainia nuja̱i̱ naṉkaamas ju̱ nuṉkanam akinkiartin áiniawai.
©2009 Avant Ministries in cooperation with Wycliffe Bible Translators, Inc. All rights reserved.