AITANGISIHA 9
9
1“God iata na êvariku, Araha ni takiha,
igo ko tamasi ma, ma ka vora me na ara ni marâ hato.
2Ma renia na takoha mataha iamu igo ko hagavorara na enoni,
hanana ga marungira na ara ni marâ hato, go bani hagavorara,
3hanana ga hagaotoa ma ka suria na maveta
igê na tarani ga koro ma ka oto i maamu.
4Gu haganahuniê renia na takoha mataha
i oga ngahisia na atohamu.
Gu nakê be vora re na hitangita na karemu.
5Inê ka na kariamu manga kenaku.
Inê ka na enoni ma. Inê kê makumakusiga.
Na mêriha iaku ki page abubu ma.
Inê kê girara râ sisite ma na ramata
se na ta ki oto tanga vi gê katoa.
6Naka ma na enoni i koro teha ngavê igê na ara ni tarani
ma ki pe nahunia na takoha mataha i râ me tenigo,
ga vi ma vi ngaia ka na marâ purua mênga.
7Igo ko ateê, mareha vi tani râ nikâ,
hanana gê maneraha iata na kariamu maremu
ma hanana gê surira o karemu ma ka karemu.
8Igo ko bonasiê kê tagarahia na ruma ni rotu henia na bea ni vogasiha
igê na hungana apuna iamu i Jerusaleme,
na hinua go atea vigo gâga igê.
Ngaia ki na nununa na ruma apuna iamu
go bani hagarêa me igê na haganegahana.
9Na takoha mataha ki oga henigo ma ki aitangisigi na tauhamu.
Ngaia ki bani oga henigo, matena go hagavora na maveta.
Ngaia ki giraragi na tarani ga hagakoro obamu
ma ka oto surigi na ramata iamu.
10Gu hagatorangenia me tenia i pasimu.
Gu naka ke so me tenia na atohamu na bâbâhamu raha,
hanana ge oga heniê ma ke tagara heniê,
hanana ve giraragi na tarani ga hagakoro obamu.
11Ngaia ki girara erasigi na ara ni marâ.
Ngaia ke haganahuniê renia na takoha koro
ma ke hagaotoê igê na tagaraha iaku,
hanana na raramohana raha ke anumasiê.
12Vikana inê kê page surira oto na kariamu
ma na atohana o vaemaku ki page arariê
ma ka page aganarigi na tauhaku.
13Ti ki giraragi na katoha iana God?
Ti ki giraragi na obaniha iana?
14Na ramoha ni takoha iana na enoni ka arisigi
ma na takoha iamami ka girara ga bêngenigami bera,
15suria na apemami ga girara ga meme ka higegi so na ataromami.
Na apena na enoni ki manga na ruma na torasuka ikê i maveta,
i hagahigea na aitangihana i takotako.
16Na marâ i maveta igami kami takusigi râ ma
ma ki pe mataku tangagami vigami giraragi na marâ i pasimami.
Vikana ti ki girara i tarahugi na marâ i pasimu?
17I mareha rârâ tani vige girara na katoha iamu,
manga vigo pe haganahunia renia na takoha mataha
ma ko pe hagatorangenia na higona apu iamu tanga, hanana vige angaria.
18Vikana igo ko hagaotogi na tara tangara na enoni i maveta
ma ko hagesurira renigi na tarani ga hagakoro obamu
ma na takoha mataha ki hagatahira.”
Currently Selected:
AITANGISIHA 9: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific