AITANGISIHA 8
8
1Na raramohana raha ki marungigi ma ki hagaotogi
na ara ni marâ hato i maveta.
O Solomone ki takuia na takoha mataha
2Inê kê takuia na takoha mataha.
Inê kê bani rapasia me matena gê karekare mênga.
Inê kê obania vigê auragia.
Na bâkorohana ki oga i na aitangihaku.
3Ngaia ki ageagesia vi ngaia ki râ me tenia God,
suria i oga i pasina God, i marungira na ara ni marâ hato
ma ki takuia.
4Ngaia ki aitangisigi maninga na takoha iana God
ma ki tagara haku henia God igê na tagaraha iana.
5Manga vi na ruruguha ka na marâ
i koro tanga viga nahunia igê na ogaha i ngekê,
na ani ta na ruruguha kani raha teharia na takoha mataha
i tagara i na ara ni agua hato?
6Manga vi na giraraha ka na marâ
i koro tanga viga nahunia tanga na tagaraha,
ti kani girara teharia na takoha mataha
i hagavoregi na ara ni marâ hato?
7Manga go takuigi na tarani ga oto,
na korohamu hato ka na guani na tagaraha iana na takoha mataha.
Ngaia ki hagesurigo hanana go ototo surigo maremu,
ko hagatogo surigo maremu, ko ototo ma ko pe rumakaka.
Na tarani ngegana ma tani râ nikâ ka raha ngavê
tanga na ogaha iaka teharigi na ani mavê na marâ.
8Manga go obania vigo aitangisigi maninga na mani marâ,
na takoha mataha nga kani bani giraragi
na bani tarani ma na tarani ga page voravora me.
Ngaia ki girara i ramatenigi na tamasinga ga barabara
ma ki girara i aramigi na hagahiana.
Ngaia ki bani giraragi na giraraha ma na mena
ma hemuri ka kahu voravora me,
ma ki bani girara vi manga i he ka na matena ma na bevoani
ka page arâ i muri me.
9Tahema inê kê tako vigê torea na takoha mataha i pasiku
hanana i gâga heniê,
suria gê girara, vi ngaia ki page hagaotoê
ma ki page kanukanuê igê na anumanumaha ma na obaeraha iaku.
10Inê kê tako kê vi: Renia ngaia nga
tahema na enoni ka page hagahigasiê, matena ga hakuhaku.
Na bani nuni ka page hanetasiê, henaka vi inê ka na enoni haoru.
11Ngaira ka page tahetara, vi na takoha iaku
ka hagabêngenia na aitangisiha,
ma na ani ga nahuni ramoha ka page koneteniê.
12Matena gê munimuni, ngaira ka page naasiê vigê tamasi
ma na matena gê tamasi, ngaira ka page karinga maninga.
Henaka inê kê tamasi arihu,
ma ngaira ka page karinga hahutogo.
13Renia na takoha mataha nga, tahema inê ki asa vi ve me,
suria na enoni i muriku me ka page takusiê tare ki bê ki arâ.
14Inê kê page marungira na agua
ma na agua ka page gâga i ruguhaku.
15Na maneraha ga raramo hagatare ka page bubununuga,
matena ga rongorongo tarohaku.
Ki page rongo raha na ataku,
suria inê ka na maneraha gê koro tangara na enoni
ma kê ramoramo igê na hearihatana.
16Matena gê aporo i pasiku tanga na takoha mataha,
inê kê page obakoro i pasina,
suria na ogaha henia ki mareha rârâ vi na hekorekoreana
se vi na mamasiaganiha,
nga noga ma na vagevageha ma na obakoroha.
O Solomone ki nungia God renia na takoha mataha
17Inê kê tako, vigê auragia na takoha mataha
hanana i asa vi ve page me
18vigê takuia hanana vigê obâbakoro teha ngavê,
vigê katogi na tagaraha iana hanana vigê ruruguha teha ngavê,
vigê tari suria hanana vigê nahuni aitangisiha mataha,
vigê metamasi hanana vi na hagarahasiha tangê.
I murina gê bani tako renigi na tarani ngegana,
inê kê tako hagetage vigê auragia na takoha mataha.
19Inê kê bani bâ ni vagevageha me, matena gê karekare mênga.
Inê kê babarisi, suria ga haganahuniê renia na ataroku i koro,
20se hete ga haganahuniê renia na apeku i apekoro,
hanana gê gâga igê, suria gê bani koro.
21Henaka vikana, inê kê tahetara,
vi i asa be nahunia na takoha mataha,
manga vi God ma ki pe vateê renia.
Na giraraha renia vi ngaia ma God kani girara i vateê renia,
ngaia nga ka na aitangisiha nikâ.
Vikê inê kê aharia na Araha
ma kê nungia nga i mêrihaku hagenani, kê vi:
Currently Selected:
AITANGISIHA 8: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific