AITANGISIHA 10
10
Na tagaraha iana na takoha mataha
1Matena na mane o vaemana na maveta God ki hagavora
ki oga getegetea mênga, na takoha mataha ki anumasia
ma ki hagatahia tenia na bagatauhana.
2Ngaia ki vatea renia na ramoha, hanana i marungia na maveta
henira na ara ni marâ hato igê.
3Ma ta na mane erataga ki rumakaka renia na takoha mataha.
Ngaia ki nahu hunia o vesina,
matena i gasuga ni mangariaga bâraha tanga.
Ngaia ki hagaratena marena.
4Suria vikana na maganuha raha ki anuia na maveta
ma na takoha mataha ki hagatahia nikâ,
suria igê na maganuha ngaia ki bêngenia na mane koro
i oga igê na haka na paparagê.
5Nikâ, matena na enoni i maveta ka hegêni igê na eraha
ma ka tugupu renia,
na takoha mataha ki tarahua na mane koro ma ki anumasia,
hanana i korokoro tare i maana God.
Ngaia ki hagaramonia, ki râ suria na bonasiha iana God tanga,
henaka i takuia ngavê o karena.
6Nikâ, matena na enoni ga pe botage renia God ka hemeri,
na takoha mataha ki hagatahia na mane i koro,
matena i gava pania na gi i hagamakakagi na hinua gi rima.
7Na peregana na eraha ngekana ki gâga mênga.
Na mako i ngekana ki matarotaroga ma ki vavangaga.
Na rauga ka takataka nunu.
Na u na vakivaki marasiga na gete i guguruga, ngaia ki gâga mênga.
8Na enoni i hinua ngegana ka pe botage renia na takoha mataha.
Tahema ngaira ka pe girara vi na ta ki koro ma na ta ki era.
Na rahugani na hinua iata ka hagatakusigia mênga
renigi na bekabekaganiha iata,
hanana na bagatauhata ki na hagesuringa tangagia igia hato.
9Ma na takoha mataha ki hagatahira na kariana tenia na perenga.
10Nikâ, matena ta na mane koro ki gavatenia na mangariaganiha iana o veogana,
na takoha mataha ki bêngenia suria na otona na tara.
Ngaia ki hagagirara renia na arahanga iana God
ma renigi na marâ igê na apanena iana God.
Ngaia ki haganahunia renia na ramana
ma ki katoa ki tavoraha bâkoro igê na tagaraha raha iana.
11Matena na enoni getera ka hengaria
ma ka rapasia viga raugi na nahuninga iana tenia,
na takoha mataha ki ngahisia ma ki katoa ki ruruguha.
12Ngaia ki anumasia tenira na merongana ma na ani ga gamorahia.
Ngaia ki katoa ki teha igê na hearihatana i higa,
hanana i tahetara, vi na tê viteana God
ki ramo teharigi na ani mavê na marâ.
13Nikâ, matena ga hagavuringenia na mane koro ki vora re na kare rakuraku
na takoha mataha ki pe sika pania,
ma ki hagatahia hete tenia na tasi.
Ngaia ki oga henia i ruma ni hagaitangiha,
14ma ki ngahisia rârâ tariha me matena i maneraha
ma ki marungira na enoni ga hagamamasiaga i nago.
Na takoha mataha ki ranganira na enoni ga hagatoraia,
vi ngaira ka hagaparu,
ma ki kasia akê hete na mane koro ki rongo raha hagahu na atana.
15Nikâ, na takoha mataha ki hagatahira na enoni
ga koro ma ka matarotaro i maana God
tenira na ani ga hagamamasiagara.
16Ngaia ki angaria na atarona na hitangita na kariana God
ma ki hagabarasira na maneraha ni haganunuha,
suria i katogi na mena ma na tagaraha raha.
17Na takoha mataha ki vurira na kariana God
renigi na mena na tagaraha raha iata.
Ngaia ki bêngenira igê na râha i menaga.
Ngaia ki mamarusira surigi na tangiani,
ma ki mavesira surigi na bungiani manga na higu ni bêngeniha.
18Ngaia ki bêngenira ka tarêhia na Asi Memera i rutuni
19ma ki anuira na merongata ka tono ka me
ma ki matarongenigi na gahuata i one. 20Vikana na enoni ga koro i maana God
ka rurugu tenira na ani ga pe botage renia God.
Ngaira ka ki ka visia raha na atamu apuna, Araha,
ma ka hagarahasigo, suria go rohe pusira.
21Na takoha mataha ki katora ka tamasi
na ani ga pegirara ge tamasi
ma ki katogi na ringeta ka rongo mataha.
Currently Selected:
AITANGISIHA 10: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific