AITANGISIHA 7
7
Na maneraha ki tagenana ma manga na enoni tokora
1Inê nogaku kê meme mangara na enoni getera.
2Inê nogaku na raraha iana na mane God i hagavorea tenia na mako.
Na apeku ki toto i obana na gete.
3Inê nogaku kê vora me i maveta mangara na enoni getera.
Inê kê haganega kê manava so nogaku
renia na rogaroga i tagenana ma tangagia igia hato.
Na ringeku hagenago inê kê angi nogaku.
4Ga rurumiê nogaku igê na gahu ma ka marupeê.
5Na maneraha ki haganega na mêriha tagenana ma manga igia hato
6Na voraha banu me i maveta ma na hurana tenia
karu taganaterua ma tangagia igia hato.
O Solomone ki nungia na Araha renia na takoha mataha
7Suria gê girara vi inê ka na enoni ma,
tahema inê kê nunginungi ma God ki haganahuniê renia na aitangisiha.
Inê nunginungi bâraha nga,
ma na higona na takoha mataha ki angariê.
8Na takoha mataha ki raha ngavê tangê
teharirerua na atohaku ma na bâhanaku gê maneraha.
Na ruruguha ka pe maratorana. Ngaigi ka na marâ purua ma.
9Tangê inê, ngaia ki teharigi na hê bâkoro i raha na meni.
Manga ge hagakitakitarerua ngaia ma na golo,
na golo hato i maveta ki manga na kere one
ma na siliva i manga na makomako ma.
10Inê kê takuia
teharirerua na apekoroha ma na bâkorohana na apena na enoni,
teharia na marara, suria na mavetana ki asa vige soso.
11Matena na takoha mataha ki angariê,
na marâ koro hato ka tarahuê nogani.
Ngaia ki migirâ me na ruruguha, i asa vige tomanigi.
12Inê kê vagevagesigi ngaigi hato,
suria na takoha mataha ki migirâ me tangê.
Inê kê pe bani girara,
vi ngaia nga kani kenani na ara ni marâ hato ngegana.
13Inê kê aganaria maninga na hagesuringa iana
ma kê ageage vigê hagatarêngenia.
Inê kê pe memaongo.
14I asa ta na enoni ge girara
vige tavo hatungigi na ruruguha iana na takoha mataha.
Na enoni ga tavogi ngaira ka tarahua na korohana God,
suria ga hagakoro obana renigi na guana na hagesuringa ga aganaria.
Na takoha mataha ki na mahatanga iana God
15God ke nakê be tako suria na aitangisiha i vateê
ma be tamasi suria na obaniha iana,
suria ngaia ki bêngenira na enoni tanga na takoha mataha
ma ki hagaotora na ani ga tako mataha.
16Igia ka oga i rimana God: igia mareka, na tamasinga iaka,
na aitangisiha hato iaka ma na manisingeniha hato iaka.
17Ngaia nga kani haganahuniê renia na giraraha monari
renigi na marâ hato ga oga:
na tagaraha haku iata na marâ hato ngegana, na ramoha iata,
18na haganegahani, na gupuni ma na hatungini na mateni,
na tara gi rua iana na arito i hatare se i vorovoro i mu,
na mateni ga heurusige,
19na harisi ga heheuri ma na guruha rârâ iata na higu,
20na tauhata na marâ mamauri, na parongata na marâ vasiga,
na ramoha iata na higona, na ramoha ni takoha iata na enoni,
na ataka mavê na apinige ma na rauga henigi na ani ni komaganiha.
21Inê kê hagesuringenigi na marâ ga pinihi
ma na ani ga oga mave,
suria na takoha mataha i hagavoregi na ara ni marâ.
Ngaia nga kani hagesuriê.
Na ta ka na takoha mataha?
22Na higona na takoha mataha ki nahuni aitangisiha.
Ngaia ngaia noga ma na tauhana ka rako.
Ngaia ki na higona ma ki arârâ tararu.
Ngaia ki togotogo tangagi na hunani na marâ.
Ngaia ki matarotaro ngavê ma ki mave.
I asa vige katoa manga i he.
Ngaia ki takusigi tare na tarani ga koro.
Na aitangihana ki masisiva.
23Ngaia ki tehateha tare.
Ngaia ki korokoro tangara na enoni ma ki takuira.
Ngaia ki tâtâ tonge i na agua gi tage ma ki pe heheurisige.
Ngaia ki asa vige angingi.
Ngaia ki raramohaga hunia ma ki girara erasigi na ara ni marâ hato.
Ngaia ki angarira na ara ni higona hato,
henaka vi ngaira ka nahuni aitangisiha,
ka matarotaro ma ka taranita.
24Na takoha mataha ki rêrê teha ngavê.
Ngaia ki pe obania na matena tenia tagua tanga i tagua.
Ngaia ki togotogo igê na ara ni marâ,
suria na raramohana ki taranina ngavê.
25Ngaia ki na rogaroga ni ramoha iana God,
na togatogana matarotaro ni bâbâhana raha God raramohaga hunia.
Na marâ makoraga ki asa vige hagamasuria na takoha mataha.
26Ngaia ki na togatogana na marara hagahu,
na nununa marava na raramohana ma na korohana God.
27Henaka ngaia ki gi tage togo ma,
ma ngaia ki girara i katogi na ara ni marâ hato.
Henaka ngaia ki pe riariaga,
ma ngaia ki hagahârungigi na ara ni marâ hato.
Tatarê surigi na apaparaha iata na enoni
ngaia ki angarigi na atarota na enoni ga tê viteana God
ma ki katora ka vora re na kariana koro God ma na poropete iana.
28God ki takuira ma na enoni ga oga henia na takoha mataha.
29Na takoha mataha ki bâkoro teharigi na arito ma na higu
ma ki teharia na mavetana na tangiana,
30suria na bungiana ki arâ suria na tangiana
ma na eraha ki asa vige teharia na takoha mataha.
Currently Selected:
AITANGISIHA 7: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific