AITANGISIHA 6
6
Na maneraha ke garia na takoha mataha
1Hoita, igamu na maneraha mu rongo.
Igamu mu nahuni ramoha suria na maveta mu karinga.
Mu karinga maninga hanana mu nahuni aitangisiha.
2Mu rongo, igamu mu marungigi rako na agua
ma kamu ageage suria ga rako na enoni i ruguhami.
3Na ramoha iami ki râ me tenia na Araha God raramohaga hunia.
Ngaia ki page haharirigi na tauhami ma na katoha iami.
4Igamu kamu hemarungi urusia God ma kamu bâsuria na arahanga iana.
Vikana, manga mu pe hemarungi igê na otoha,
manga mu pe marupegi na ramata,
manga mu pe mauri suria na obaniha iana God,
5hoi, God ki page hatani hagaitangigamu ngavê,
suria na suriha ki raharaha nga tangara na ani ga nahuni ramoha.
6God ki takira na enoni tokora ma ki bonotenigi na bagatauhata
ma tangara na ani ga nahuni ramoha na suriha ki raharaha nga hete tangara.
7Na Araha God ki pe magutenia rârâ ta na enoni,
henaka vi oga igê na tagaraha raha.
Ngaia marena ki hagavorara na enoni hato,
na ani ga nahuni ramoha ma na enoni tokora,
ma ki marupera tagenata.
8Ma na suriha ki page haharirigi maninga
na ogaha iata na ani ga nahuni ramoha.
9Maneraha, na tamasinga iaku ki tangagamu igamu,
hanana mu nahuni aitangisiha ma kamu pe tasitasi.
10Na tarani ngegê ka râ me tenia God
ma ki tuguhigamu vigamu katogi vigana.
Vikana na suriha ki page ranganigamu
vi igamu kamu koro ma kamu oto vari i maana God se mareha.
Manga mu katokato vigana, igamu kamu page girara
vigamu roherohe maninga pusigamu maremi.
11Hoi, mu nakagi na tamasinga iaku i obami
ma kamu ageagesigi, hanana mu nahuni aitangisiha.
12Na takoha mataha ki mave bâkoro tare ma ki asa vige page soso.
I mataku ma tangara na enoni, hanana viga tarahua,
manga vi ngaira ma ka takuia ma ka garia.
13Ngaia ki hatani hagagirara marena
tangara na ani ga rapasia.
14Manga go bani riterite i mavoraro,
igo ko page tarahua so ma i maani ruma.
I mareha ge bara.
15Manga na takoha mataha ma ki tâtâ nga i obamu,
igo ko bani nahunia noga na aitangisiha raha.
Manga go riteritehia, igo ki sugi hatara na obamu.
16Suria ngaia ki obanira na ani ga araria,
ngaia ki page tarahugo, naka ma i he.
Ngaia ki korokoro tangago
ma ki tamanigo igê na ara ni takoha iamu.
17Na takoha mataha ki haganega
igê na matena go rapasia maninga na hagesuringa.
Manga go rapasia na takoha mataha, ki vi go takuia.
18Manga go takuia, ki vi go marupegi na ramata iana.
Manga go marupegi na ramata iana, ki vi i asa vigu meme.
19Ma na tarana vi igo ko pe meme, ki torego i pasina God.
20Na rapasiana ni takoha mataha
ki hagarêgo tanga go marungira na enoni.
21Igamu mu marungigi na agua,
manga mu ageagesigi na atohami ma na bâhanami ni ramoha,
hoi, mu hagahigasia nga na takoha mataha,
hanana mu hemarungi hagahu.
O Solomone ki obania vi hagatarêngenia na aitangisiha iana
22Inê be hagarongogamu renia na ta ka na takoha mataha
ma manga i he kani voravora me.
I asa be pinihia ta na marâ renia tenigamu.
Inê be sihongenia haganego me
tenia na matena God ki hagavorara na marâ hato.
Na aitangisiha iaku renia be naka mave tangara na enoni hato.
I asa be page reke aharêngia tapanena na monariha.
23I asa be memaongo na aitangisiha iaku,
suria na tarana vikana ki pe araria ngavê na takoha mataha.
I mareha vê!
24Manga ga rakorako na enoni ni takoha mataha,
ngaira ka girara ga hagatahia na maveta.
Na maneraha i tako mataha ka na ramana tangara na enoni.
25Hoita, mu karingê maninga, matena gê hagesurigamu,
hanana i tamanigamu.
Currently Selected:
AITANGISIHA 6: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific